About mmendia

Author Archive | mmendia

Energia berriztagarriak, ingurugiroa jasaten ari den kalteen konponbide ote?

By on 2009(e)ko urtarrilak 3 in orokorra

haize energiaGaur egun ez dago zalantzan jartzerik energiaren garrantzia. Nork imajinatzen du argirik gabeko egun bat? Edota gau hotz batean berogailurik gabe lo egin behar izatea? Eta telebistaren pantaila erabat beltza, inongo mugimendurik gabe? Oso zaila egiten zaigu horrelako egoerak irudikatzea, ezta? Bada, horregatik guztiagatik eta beste zenbait arrazoirengatik ondorengo lerroetan energia berriztagarriez jardungo dut.

Hasteko, ezin dugu aipatu gabe utzi energia berriztagarriak planetako fluxu eta ziklo naturaletan oinarritzen direla. Kantitate handitan ditugunez, entzuna da milaka urtez gure planetan izango ditugula; eta hori gutxi balitz, inguruneari kalterik ez egitea ere abantaila garrantzitsu bat da. Beste zenbait onurekin batera, elektrizitatea, beroa eta airearen hoztea produzitzen dute; eta, horretarako, eguzkiaz, haizeaz eta hondakinez baliatzen dira, besteak beste. Komeni da jakitea horiek sortutako energia gehiago kontsumituko bagenu, CO2ren emisioa dezente murriztuko litzatekeela. Pasa gaitezen, bada, energia berriztagarriak gertuagotik ezagutzera.

HAIZE ENERGIA

Gizartean azkarren hazten ari den energia mota honi gobernuak laguntzatxo bat eskaintzen badio, 2020rako munduko elektrizitatearen %12 energia mota honetakoa produzituko dela diote adituek. Energia hau, erabilia izan dadin, arautzea falta da. Bestalde, interesgarria da jakitea 5 eta 12.5 m/s-ko abiadura daramaten haizeak baino ez direla aprobetxagarriak kontsideratzen. Jakina denez, haizeak energia zinetikoa du; izan ere, energia mekaniko edo elektriko bilakatzeko gaitasuna du aeroturbinei esker. Turbina hauek motore, hegal eta dorreetan integratzen dira energia mota hau sortzeko.

EGUZKI ENERGIA

eguzki-energiaGure planetak duen eguzki energia fusio nuklear baten ondorioa da, eta prozesu hori eguzkiaren barnean gertatzen da. Eguzki erradiazio hori elektrizitate edo bero eralda daiteke, eta azken honek ur-lurrina sortzeko balio du. Bi eguzki-energia mota bereiz ditzakegu:

  • EGUZKI ENERGIA ELEKTRIKOA. Energia hau elektrizitate transformatzen da zelula fotovoltaikoak direla eta, material erdieroalearen ezaugarriak aprobetxatuz. Zelula fotovoltaiko hauen konposiziorako oinarrizko materiala silizioa da. Honek guztiak gauez energia elektrikoa sortzeko zer prozesu jarraituko ote du? Oso sinplea da; izan ere, zelda fotovoltaikoak egunez sortutako energia elektrikoa jasotzen duten bateriak baitituzte. Hala ere, gaur egun, sare elektrikoetara konektatzen diren sistema fotovoltaikoak sortzen hasi dira; horrela, baterien erabilera ekidinez, energia hori momentuan erabil daiteke.
  • EGUZKI ENERGIA TERMIKOA. Ura eguzki energiarekin berotu daitekeela frogatzen duen sistema bat badago, gasaren erabilera alde batera uzten duena. Prozesu honetan, eguzki sistema planuak eta kontzentraziokoak bereiz ditzakegu. Lehenengo sistemak eguzki erradiazioaz berotzen dira eta fluidoei beroa transmititzen die, 200 graduko tenperaturara igoaraziz, nahiz eta normalean 75 gradura igo. Bigarren sistemak area espezifikoetan kokatzen direnak dira. Ispiluak erabiliz, eguzki zentral termoelektriko batzuetan erradiazioa kontzentratzen dute eta teknologia ezberdinen bidez erdi mailako edo maila altuko tenperatura duen beroa sortzen dute. Egunez jasotako eguzki beroa gorde egiten da; beraz, gauez edo lainotuta dagoen egunetan elektrizitateak sortzen jarraituko du.

ENERGIA GEOTERMIKOA

energia-geotermikoaLur azpiko beroa aprobetxatuz lortzen den energiari deritzo. Espainia, Estatu Batuak eta Filipinen ondoren, energia geotermikoa gehien produzitzen duen herrialdea da mundu mailan, 855 MW-ko potentzia instalatuta duela. Lurpeko ur lurruna hodi-instalazioetatik pasatzean sortzen da energia hau, zentrifugatzen denean ur eta ur lurrun lehor baten nahasketa produzitzen baitu. Prozesu horren ondoren lortutako energia elektrizitatea sortzen duten turbinak aktibatzeko erabiltzen da.

BIOMASA

biomasaEgur, erresiduo, uzta edo hiriko zaborra sarritan erretzen dira turbinak birarazteko eta elektrizitatea lortzeko. Erresiduo hauetatik gas sortzailetan sortzen den metanoari biogas deitzen zaio. Hau animalien ongarrietatik eskura daiteke. Horretaz gain, biomasako eta biogaseko erregaiak energia sortzeko erabiliko dira. Biomasa ikatza da; izan ere, karbono dioxidoa erretzen denean kanporatzen baita . Nahikoa biomasa dago behar adina elektrizitate sortzeko. Kontaminazio atmosferikoari erreparatzen badiogu, argi geratzen da energia mota honek kutsadura murriztuko lukeela, erresiduo asko eta asko aire librean erretzen baitira. Gauzak horrela, hondakin solidoak ez ditugu biomasa kontsideratuko, arriskutsuak eta kutsagarriak dira eta.

HIDROGENOA

H2Oren molekula puskatzean, hidrogenoa eskuratzen da, aurretik aipatutako energia guztietan bezala, elektrizitatea produzitzeko. Zelula hauek etxebizitza eta garatutako herrialdetako negozioetan erabiltzen dituzte, eta hori gutxi balitz, auto fabrikatzaile batek jada sistema honekin funtzionatzen duen autoa atera du merkatura. Eta nola ez, mekanismo hau garrantzitsua da George W. Bushen energia planerako, non ikatzaren eta energia nuklearraren erabilera potentziatu nahi dituen hidrogenoa sortzeko.

Energia berriztagarri hauen bereizgarriak aipatuta, ezin aipatu gabe utzi klima aldaketaren auzia; izan ere, Espainia da herrialde kaltetuenetarikoa. 2050. urterako Hadley Centerrek dioenez, tenperaturen igoera nabarmena egongo da eta, prezipitazioak %10 jaisteaz gain, lurreko hezetasunak ere %30 behera egingo du. Horren ondorioz, hondartzetan 3.000 kilometro desagertuko dira itsasoaren mailak gora egingo duelako. Alde batetik, klima aldaketa hauek gero eta sute gehiago piztuko dituzte basoetan. Bestetik, erosioak eta desertifikazioa produzitzeaz gain, lehorte, uholde eta trumoi izugarriak ere sortzea ekar dezake Mediterraneo inguruan.

Aurreko guztiaz gain, nekazaritzak behera egingo du pixkanaka, produkzio hidroelektrikoarekin batera. Hori gutxi balitz, eguzki eta hondartza turismoa larriki kalteturik suertatuko da tenperatura igoerak direla eta. Beste alde batetik, kosta inguruko herrixkak kalteak jasango dituzte itsasoaren mailak gora egingo duelako,  eta zenbait tokitan fauna eta flora desager daiteke.

Espainiako klima aldaketak sortutako ondorioak direla medio, politika beligerantea egin beharko luke administrazioak. Ez hori bakarrik, gobernuak 1990etik 2010era burutu behar dituen proiektuei ez genieke muzin egin behar; hala nola, industria %3 jaitsi beharko litzateke urte horietan zehar, garraioa %73 eta zerbitzuak %42ra arte igo beharko lirateke; energia transformatzaileak %5 baino ez. Hau guztia energia berriztagarrien erabilera alde batera utzi gabe betiere.

Hementxe duzue SOSTENIBILIDADek ingurugiroan gertatzen ari denari irtenbidea aurkitu nahian atera zuen bideoa:

Comments { 0 }

Orain egiten ez badugu, bihar berandu izan daiteke…

By on 2008(e)ko abenduak 22 in orokorra

suizidioa 12008ko azaroaren 21a, 19 urteko gazte batek bere buruaz beste egin du pilulen edonolako kontsumoa dela eta. Horrez gain, bere buruarekiko gorrotoa adierazten zuen ohar bat utzi du… Harrigarria albistea, ezta? Bada, Floridako gazte honek bizitza nola kentzen zuen Justin.TV web orriko ikusleei erakutsi zien etxeko web kamera erabiliz. Abraham K. Biggs-ek, lehen esan bezala, pilulak gehiegizko kopuruan kontsumitu zituen eta etxean zeukan kamerari bizkar emanez ikusleei bere suizidioa transmititu zien. Gauzak horrela, Fox News-ek dioenez, foroko hainbat pertsonak Biggs iraindu zuten muntaia bat zelakoan. Beste batzuk, aldiz, poliziarekin kontaktuan jarri ziren, eta hauek Abraham bizi zen tokira gerturatu ziren. Han bizitzarik gabeko gorpua ohean etzanda aurkitu ostean, kamera itzaliko zuten.

Hori gutxi balitz, egun batzuk besterik ez dira pasa Craig Ewerten heriotzaz geroztik. Erresuma Batuko gizon honek, gaixotasun larri batek jota, gorputz osoa paralizaturik zeukan. Berak zioen bezala, bere bizitza tortura bat zen eta amaiera eman nahi zion ahal bezain laster. Bere buruaz beste egiteko gauza ez zenez, Suitzako erietxe batekin kontaktuan jarri zen eutanasia burutu ahal izateko. Nahiz eta eutanasia kasu baten aurrean gaudela iruditu, askok suizidioa zela baieztatu zuten, bere ahotik hori atera baitzen.

Aurreko hariari jarraiki, gogoratzen al duzue Ruslana Korshunova modeloa? 20 urteko gazte honek, Elle eta Vogue aldizkarietako azaleko argazkietan azaldutakoak, bere burua Estatu Batuetako Water Street apartamenduko bederatzigarren pisu batetik bota omen zuen. Hala eta guztiz ere, polizia oraindik ere azterketa burutzen ari da; izan ere, inork ere ez daki apartamenduan berarekin norbait zegoen, eta suizidio bat izan ordez, hilketa batez ari garen.

2008. urte honetako suizidio entzutetsuenak aipatuta, portaera suizidak baloratzea ez dela batere erraza esan dezakegu; dena den, jakina da lotura estua duen hainbat faktore badagoela. Arrisku hauei tripak hustu ondoren, ondorio batera irits gaitezke: pertsona suizida batek bere kezken jatorria ezagutu eta konponarazteko saiakera eginez gero, suizidioa saihesteko eskailera bat gehiago igoko luke.

Aipatu dugun legez, hainbat faktore dago pertsona suizidiora bultzatzen dutenak. Faktore hauetako bat depresioa dugu, pertsona askok eta askok bere bizitzako uneren batean eta gradu ezberdinetan jasaten duten gaixotasuna. Depresio arin batetik bizitzari mehatxu egiten dion arazo batera arte salto handia dago. Dena den, kontuan izan behar dugu senda daitekeen faktore batez hitz egiten ari garela. Gaixotasun hau pairatzen duten pertsonei bizitza erabat aldatzen zaie. Hauek eguneko zati handi batean triste daude, nekea dute eta, horrez gain, beste garai batean disfrutatzen zituzten gauzei garrantzia kentzeko ohitura dute. Adibide bati beha, badakigu depresioak edonoren pentsamendu, sentimendu, osasun fisiko eta portaerari eragiten dietela; hala ere, horrek ez du esan nahi errua depresioa jasaten ari den horrena denik, kontuan izan behar baitugu gaixotasun mental baten aurrean gaudela. Ikerketek diotenez, gainera, emakumezkoetan gizonezkoen bikoitza ematen omen da. Pertsona hauen autoestimua baxua da eta askok bizitzari garrantzia kentzen diote, baita beraien existentziari ere. Egoera hau tratatu ezean, suizidio-arriskua handia izan daiteke.

Eskizofreniaezin dugu aipatu gabe utzi, gizartean puri-purian dagoen gaia baita. Horrela, zenbait aspektu gainbegiratzean argitara eman diren ideien analisi bat egiteari komenigarri deritzot. Hasteko, jakina da buruko gaixotasuna duen pertsona batek, beste pertsonekin komunikatzeko orduan, zailtasunak dituela eta bere pentsamenduak nahasiak direla. Pertsona hauek errealitateaz at joateko ohitura dute, eta, sarri askotan, ahots bereziak entzun eta gauza arraroak ikusi ohi dituzte, nahiz eta bertan ez egon. Denbora luzez errealitatez at bizi den pertsona eskizofreniko bat nazkatu egiten da, eta suizidioaren ideia burutik pasatzea ohikoa izaten da.

Ruslana KorshunovaGaur egun, alkoholismoa eta drogomenpekotasuna suizidioaren kausa nagusi bilakatu dira. Biak gaixotasun kronikoak dira eta eragin zuzena dute osasunean, norberaren psikologian eta familiarekiko harremanetan, besteak beste. Mendekotasunean erori garela ohartu eta arazoari konponbiderik eman ezean, depresioan erortzeko arriskua dago. Hori dela eta, sintomei erreparatzea ezinbestekoa da: energia falta, antsietatea eta kontzentrazio eza, besteak beste.Gorputzak ere ematen digu arazo hauen berri: gibeleko gaitzak, botaka maiztasunez egiteko gogoa… Horregatik, konponbidea hasieratik bilatzen saiatu behar du egoera honetan dagoen pertsona orok, arazoa beste muturreraino joaterik nahiz ez badu, behintzat. Horregatik, ikastoletan hainbat programa egoten dira gaztetxoei alkoholak eta drogak dakartzaten ondorioez oharrarazteko. Hezkuntza eta familiaren laguntza elkartuz gero, arazoa saihestea lor daiteke.

Faktore bakar batzuetan baino ez dugu sakondu; halere, aipatu ez ditugun familia-arazoak, gurasoengandik jasotako tratu txarrak, bakardadea eta ikasketa arazoek ere eragin handia izan dezakete pertsona batek bere buruaz beste egiteko duen gogoan. Egoera honetara iritsita, suizidioari STOP esan beharko genioke; horretarako, baina, arrisku-faktore hauen guztien ikerketa behar-beharrezkoa da. Amaitzear dagoen urte honetan, jende askok suizidioa aurrera eramatea pentsatu du, eta beste horrenbestek bere buruaz beste egin du. Hauetako askok medikuarenera joateko arazorik ez zuten,baina ez ziren joan. Medikuak suizidio-arriskua baloratu ezean, jai dugu.

Amaitzeko, datorren 2009. urtean suizidio kasuei amaiera eman nahi badiegu, profesionalei arreta jartzea eskatu beharko genieke eta faktore ezberdinen aurrean dagoen pazienteari beharrezko asistentzia eskaini. Horregatik, artikulu hau arazo ezberdinen mendean dauden guztiei zuzenduta doa: ez zaitezte zuen arazoetan ito eta eskatu laguntza. Pentsa ezazue gaur irtenbidea topa dezakezuela; bihar, agian, berandu izango da.

Jarraian, suizidioa saihestearen aldeko informazioa ematen duen bideoa:

Comments { 0 }

Mikel Elizegi, ganberroa telebistan eta bertatik at

By on 2008(e)ko abenduak 8 in solasean

Larunbat gau hartan, telebista piztu eta horrenbeste gustatzen zaidan saioa jarri nuen EITBn: Ordu Txikitan. Mikel Elizegi haurren paperean nola jartzen zen ikusi, eta haur haiek nagusi nola sentiarazten zituen konturatzeak zirrara eragin zidan. Programa hartan egotea gustuko izango nuen, baina gauza batzuetarako haur izateari utzi nionez aspaldi, nahi nituen beste batzuetarako ezin haur sentitu… Gauzak horrela, ahal izanez gero, Mikel Elizegiri elkarrizketa egingo niola otu zitzaidan. Handik eta hemendik berarekin harremanetan nola jarri saiatu nintzen aste oso batez, eta, azkenerako, elkarrizketa Ordu Txikitan programa grabatzen den platoan egiteko aukera eman zidaten.

Ezin sinetsi ibili nintzen ostiral hura iritsi zen arte. Miramonera autoan gerturatu ninduten, bidaia osoan zehar segundo erdi batean ere isilik egon gabe: kazetari bainintzan galderak behin eta berriz errepikatu nituen. EITBko grabazioak egiten diren tokira iritsi orduko, bertako langile batek elkarrizketa egin aurretik Goenkaleren grabazioak non egiten diren, beste saioetako platoak nolakoak diren… ezagutu ote nahi nituen galdetu zidan. Bitartean, Mikel nire elkarrizketarako makilatzen ari zen. 20 minutuz telebistako izar sentitu ostean, Ordu Txikitan grabatzen den platora eraman ninduen hango langile hark, haurrak esertzen diren tokian jesarri eta hantxe itxaron nion Mikeli. Maite? galdetu eta galderekin azkar hasteko eskatu zidan, bilera baitzuen segituan. Ikusle bezala geratzeko aukera ere eman zidan. Oso jator eta bere ganberro puntu horrekin erantzun zizkidan galdera guztiak.

Hainbat programatako aurkezlea izan zara eta telebista mundu honi euskaljakintzak tripak hustu nahi dizkio; horretarako, hautagai zara eta lehen galderari ekingo diogu. Sorginen Laratzean ezagutu zintugun eta orain Ordu Txikitan saioan zaitugu, nolatan telebista mundurako grina hori? Nik ez nekien telebistan, kamera aurrean, lan egin ala ez, kameren atzean lan egiten ikasi bainuen. Dena den, frogatxo bat egin zidaten, asko gustatzen baitzitzaidan farandula hau, eta hementxe nago. Garrantzitsuena zuk egiten duzunarekin disfrutatzea da, eta nik disfrutatu egiten dut.

Goizuetakoa zaitugu eta bertan ikasiko zenuen, euskaraz ala gaztelaniaz? Esaguzu gaztetan maisuekin izandako anekdotaren bat, Mikel. Bai, Goizuetakoa naiz dudarik gabe, peto-petoa, Maite. Han ikasi nuenean, Franco garaia zen (oso gaztea naiz, 38 urte) eta eskolan beti gaztelaniaz egiten genuen, batez ere, irakasleak euskaraz ez zekielako, baina gure artean beti euskaraz aritzen ginen. Maisuekin anekdotaren bat… Tira, esan dizudan bezala, irakasleek gaztelaniaz irakasten ziguten. Bazen Iruñeko irakasle bat, berarekin astean hiru egunetan izaten genuen klase. Bertara sartzen zen momentuan, parean genuen Juan Carlos erregearen argazkiari begirarazi eta “¡Viva España! Alzad los brazos, hijos del pueblo español, que vuelve a resurgir” abesarazten zigun. Bai, Espainiako ereserkia abesten genuen, horrela zen.

mikel_elizegiHonetan guztian, hau da, zure karreran zehar jaso al duzu familiaren laguntzarik edota kritikak jaso dituzu gehiago? Familiari ezin diot eskatu kritikarik, kritika ona eman didate oraino. Gainera, egiten duzun guztia ondo dago beraientzat, gutxitan hitz egin didate telebistaren munduaz eta horrela behar du izan. Ohituta daudela iruditzen zait eta hori da garrantzitsuena.

Bueno konta iezadazu hitz gutxitan zer-nolakoa zen zure papera Sorginen Laratzean. Sorginen Laratzean nire papera edo helburua etxean, pantailaz bestalde, zegoen ikusle orok ”gaur Mikelek zer egingo ote du?” galdetzea zen; hots, telebista piztu eta aurkezle ganberro hark astero egiten zuena imajinatzea esango nuke, saioa ikusteko halako gogo bat piztearren, betiere.

Sorginen Laratza amaitu zenean, Oscar Terolek TVErako saio batean lan egiteko eskatu zizun. Zertan oinarritzen zen programa hura? Saio hura egungo politika, gizarte eta ekonomia munduko hainbat pertsonaia garrantzitsu elkarrizketatzean zetzan, noski, beti umore puntu horrekin. Ordu Txikitan programak dituen ezaugarriak antzekoak dira Made In China saio harekin alderatuta; halere, TVE zenez, beste nibel bat zegoen, altuagoa, noski.

Gaur egun, berriz, Ordu Txikitan saioan ikusi ahal zaitugu larunbat gauetan, baina okindegian ere lan egiten duzu. Grabazioren bat egitea tokatuz gero, okindegia itxi egiten al duzu? Ez, ez, ez. Nik goizeko seietatik eguerdiko ordu bietara egiten dut lan okindegian eta badakite ezin dudala goizez grabaziorik egin. Hori dela eta, ordu bietan atera eta segituan naiz hemen, Miramonen. Hori zeharo errespetatzen dute nire kideek. Lana, lana baita…

Gaur, ostirala, Miramonen gaude eta, nire elkarrizketaren ostean, Ordu Txikitan grabatzekoa zara. Azal iezaguzu zein den programaren xedea. Programaren xedea, nik esaten dudan bezala, programara etortzen zaizkigun zazpi gazte alubita hauek nagusi sentiaraztea da. Zenbaitetan, pertsonaia ospetsu bat izaten dugunean, galderak botatzen dizkiote edota alderantziz. Eurei galderak egiten zaizkienean zein-nolako erantzunak diren entzutea merezi du, askotan barruan duten beste pertsona hori ateratzen baitute.

Haurrekin aritzen zara, beraz. Gustuko al dituzu haurrak, Mikel? Seme-alabarik ba al duzu? Betidanik atsegin izan ditut haurrak, asko irakasten didatela iruditzen zait. Gehiago da, programa honetako kastinga egiteko aukera eman zidaten unean bertan eman nuen baiezkoa. Pazientzia handia behar da eta nik badut, bai etxean Enekorekin -nire semea-, eta baita saio honetan ere.

Programa behin edo beste ikusi dut. Utzi al duzu noizbait norbait hunkituta edo alde egin al du norbaitek haserre galdera konprometitu bat egin diozulako? Ez, haserre ez du inork alde egin; halere, konturatu izan naiz noizbait gonbidaturen bat, bere aurpegiarengatik, galdera baten aurrean ez dela eroso sentitu eta ”zer-nolako marroian sartu nauzun” bezalako zerbait pentsatu duela. Nire iritziz, gonbidatu ditugunetatik asko itzuliko ziren, seguru-seguru, berriro ere programara. Gu gonbidatuaren gaztetako momentuetara bidaiatzen saiatzen gara eta haurrek egiten dizkieten galderek asko laguntzen dute horretan, ia gehiengoa hunkiaraziz. Gaurkoan, Carlos Sastre izango dugu eta seguru-seguru esaten dizut emozionatu egingo dela, benetan esaten dizut.

Zein izan da programatik pasa diren pertsonetatik gustukoen izan duzuna? Asko izan dira, baina behin Abel Barriola etorri zen eta familia giroko elkarrizketa izan zen. Gidoitik atera nintzen eta dena beste kutsu batekoa geratu zen. Lasaitasun handiagoz solastu ginen. Hala eta guztiz ere, gonbidatu guztiak izan dira onak eta eurei esker ni ere oso ongi moldatu naiz nire lanean.

ordu_txikitanOrokorrean, jendeak programara joateko arazorik izaten al du, bestela esanda, ezezkorik jaso al duzu? Bai, ezezkoak jaso ditugu. Kontuan hartu behar da programan, gonbidatuei bere gaztaroaz galdetzen zaienean, galderak pertsonalak izaten direla eta zenbaitek ez du nahi izaten hori jendeari jakinaraztea. Baiezkoak ere asko jaso ditugu. Adibide bezala, nik zuri baiezkoa polita zarelako eman dizut (barreak). Dena den, ez dakit: batzuek gustuko izaten dute; beste batzuek, aldiz, ez. Nik, hala ere, ez dut gaizki hartzen gonbidatuek saiora etorri edo ez erabakitzen dutenean.

Amaitzen ari gara eta azken galdera hauek zintzotasun osoz erantzun behar dizkiguzu. Zure ustez, beste programaren batzuk kopiatu al dituzue? Baiezko bada erantzuna, zeinekin alderatuko zenituzke aurkezle izan zaren saioak? Ordu Txikitan kopia bat ez, baina programa honek Kataluniako eta Galiziako beste programa batzuen proiektuen oinarriak hartzen ditu.

Zein da zure telebistako saiorik gustukoena? Aurrera begira, gustukoen duzun programaren antzeko batean parte hartuko al zenuke? Gran Wyoming da dudarik gabe gehien gustatzen zaidan aurkezlea; ganberroa, bata eta bestearekin sartzen da, dibertigarria… Berak egun egiten duen El Intermedio kutsuko programaren bat egitea gustatuko litzaidake, inprobisazioa erabiliz irteten den horrelako bat…

Hemendik hamar urtera non ikusten duzu zure burua, Mikel? Hemendik hamar urtera nire burua jubilatuta ikusten dut. Baina ez dakit. Nik firmatuko nuke hementxe zurekin berriro egotearren, hori seinale ona izango da: zu kazetari eta ni aurkezle.

Azkenik, famatua zarenez, jendeak kalean gelditzea gustuko al duzu? Lehendabiziko gauza, ni ez naiz famatua, ezaguna baino ez naiz telebistan agertzen naizelako. Famatuak beste batzuk dira. Gauzak horrela, asko gustatzen zait jendeak kaletik geratzea, ez dizut gezurrik esango. Ganberro papera egiten nuenean, oihuka etortzen zitzaizkidan eta orain, berriz, haurrekin aritzen naizen momentutik, beste era bateko tratua dago eta polita da.

Elkarrizketarekin amaitu baino lehen, euskaljakintzari agur bat eskaintzeko eskatu nion eta, ondoren, argazki pare bat atera nituen berarekin. Bertan geratu nintzen, berak eskatu bezala, haurrak iritsi aurretiko grabazioak nola egiten dituzten ikusten eta gero, etxera beultatu behar nuela ohartuta, agur esan eta beste batean egongo ginela zin egin zidan. Etxera iritsi eta grabazioa ikusteari ekin nion. Horrenbeste desiratzen nuen hura lortzeaz gain, Mikel Elizegi kameraz bestalde zein gizon alaia eta ganberroa zen ikusi ahal izan nuen. Esperientzia guztiz desberdina!

Comments { 5 }
-->