Warning: Creating default object from empty value in /home/berria/berria.euskaljakintza.com/wp-content/themes/canvas/functions/admin-hooks.php on line 160

Archive | Aisia

RSS feed for this section

YouTube: lana ala entretenimendua?

Argazkia: Wikimedia Commons

Argazkia: Wikimedia Commons

Gaur egun lanbide asko daude. Lanbide gehienak berdinak izan dira urtez urte, baina gaur egungo teknologia aurreraketarekin, lanbide berriak sortu dira internet edo informatikaren arloan; YouTuben, adibidez, esparru bat aipatzearren. Lana kontsideratu al daiteke, baina, horrelako plataformetan jendeak egiten dituen bideoak? Nik, egia esan, baietz uste dut. Goazen bada atal hau puntuz puntu aztertzera.

Lehenik eta behin, denok ezagutzen dugu YouTube. Normalean erabiltzen dugu edo noizbait erabili izan dugu, lan baterako bideoren bat hautatzeko edota denbora pasatzeko. Esan dudan bezala, bideo mordo bat dago. Asko eta asko umorezkoak dira: erorketak, katuak, pertsona batek egiten dituen tontakeriak… Horrelako gauzez bakarrik beterik  dagoela uste dugu. Gune hau ez da, dena den, hori bakarrik. Horretaz aparte, beste bideo mota batzuk topa ditzakegu. Horien atzean jende askoren lana dago, bideo oso onak eta landuak. Pertsona hauek YouTuber izenaz ezagutzen dira.

Aintzat hartuta egiten dituzten bideoak, YouTuber mota ezberdinak daude: gamerrak, vlogeroak… Egiten dituzten bideoak oso landuta daude normalean: euren burua grabatzen dute bai kritikaren bat egiten, tontakeriaren bat, edota bideojoko batean jolasten ari diren bitartean. Hauen lana hori editatzea da eta, ondoren, euren YouTubeko kontura igotzea jendeak ikus dezan. Helburua entretenitzea da. Beste batzuen helburua, berriz, beraien bideoekin jendea pentsatzen jartzea da. Eta ez hori bakarrik. Askotan, bideoekin lortzen duten dirua dohaintzan ematen dute, Ice Bucket Challenge mugimenduaren bideoekin adibidez.

Bestalde, bideoak ikusten dituzten pertsonak normalean gazteak izaten dira. Eta askorentzat YouTuberrak beraien jainko txiki bihurtzen dira. Alde batetik, hori ondo dago, ona delako nerabe baten bizitzan gustuko duzun pertsona bat edukitzea eredu gisa. Halere, bestetik, gerta liteke gazte honek bideoetan ikusten duen pertsona horren ezaugarri txarren bat edo hartzea, eta berak egiten dituen tontakeria berdinak egiten saiatzea, Kanelaren Erronka bezalako probekin.

Aurreko guztia laburbilduz, zera esan dezaket: lan ona iruditzen zait, zuk nahi dituzun bideoak egiten dituzulako eta entretenigarria iruditzen zaidalako modu honetan irabaztea bizitza. Horrez gain, munduan zehar egiten diren jokoen aurkezpenetara edo biltzarretara joan zaitezke, eta bertan atera behar diren gauza berriak proba ditzakezu inork baino lehen. Ez dago gaizki!

Comments { 0 }

Oporrak erlaxatzeko edo leku ezberdinak bisitatzeko?

Pixabay, CC0 Public Domain

Pixabay, CC0 Public Domain

Denok atsegin ditugu oporrak eta beharrezkoak direla uste dugu. Betiko errutinatik ihes egiteko ondo etortzen zaizkigu, ezta? Aisialdia gure burua zaintzeko ere erabiltzen dugu, gure osasuna zaintzeko.  Hala ere, batzuek, oporretan lasai-lasai egon ordez, nahiago dute leku eta kultura berriak ezagutzera joan, hiriak, janaria… Eta zuek zer nahiago duzue, lasai-lasai (etxean naiz kanpoko hiri batean) egon ala leku berriak ezagutzera joan?

Kontsumitzaileen europar zentroak eginiko galdeketa baten arabera, Espainiako helduen %29,94 etxean gelditzen da, %30,86k bidaiatzea erabakitzen du, eta gainontzeko %39,2 bigarren etxe batera joaten da (aitona edo amona lehen bizi zen herriko etxera, adibidez). Horrez gain, bidaiatzeko orduan, gehiengoak agentzia baten laguntza behar duela ere esaten du. Baina laguntza zertarako? Kalitate oneko hotel bat aurkitzeko ala bertako leku interesgarriak bisitatzeko aholkuak eta bisita gidatuei buruzko informazioa jasotzeko?

Pertsona askok, lanaren edo ikasketen ondorioz duten estresagatik, oporrak erlaxatzeko direla esaten dute. Bidaiatzen dutenean, nahiago dute leku lasai batera joan, gehienetan hondartzarekin; horrela, plaia edo igerilekuko etzaulkian etzanda lasai-lasai egon daitezke irakurtzen, eguzkia hartzen edo orain hain modan dagoen mugikorrarekin jolasten edo txateatzen. Baina horretarako kanpora joateak zentzurik ba al dauka? Nire ustez, ez. Hori egin nahi baduzu, hobe da herrian gelditzea! Modu horretan, erlaxatzen zaren bitartean,  dirua aurreztuko duzu, eta diru hori bainuetxeetara joateko edo liburuak erosteko erabili ahal izango duzu.

Beste batzuek, berriz, nahiago dute oporretan duten denbora librea leku berriak ezagutzen pasatu. Hauentzat oso ideia ona da autokarabana bat edukitzea; horrela, diru asko aurreztuko dute hotel eta apartamentuak ez dituztelako ordaintzen. Honen zailtasuna joandako hiri bakoitzean zer ikusi, non aparkatu eta bazkaltzeko leku aproposenak zein diren jakitea da. Hala ere, horrek konponbide erraza dauka interneteko erabiltzaileentzat: badaude hiri ezberdinetako bidaiariek idazten dituzten artikuluak argitaratzen dituzten webguneak, hauek oso ondo azaltzen dituzte hiriko abantaila eta desabantailak eta bertako ezaugarri asko. Hauek dira horietako batzuk: Los viajeros (diarios), Diario del viajero eta Viajeros callejeros.

Hala ere, nire ustez, opor perfektuak izateko, bi aukera horien oreka aurkitu behar da; izan ere, zertarako hiri famatu horietako batera joan, ez badituzu hiriko ezaugarri garrantzitsuenak bisitatzen? Horretarako, hobe etxean gelditzea! Era berean, oporretan erlaxatzea beharrezkoa dela uste dut, alegia, lekuak bisitatzen gaudenean garrantzitsua dela atseden bat hartzea eta hondartza edo igerilekuan botata egotea. Beraz, nire gomendioa  oporretan gauza ezberdinak egitea da, eta kanpoko hiri batera joatean, erlaxatzeaz gain, besterik ez bada, bertako kultura eta monumentu garrantzitsuak bisitatzea. Baina bakantzatan benetan garrantzitsuena dena ONDO PASATZEA da, eta, horretarako, ezinbestekoa da oporrak pertsona egokiarekin pasatzea.

Comments { 0 }

Gaztea eta bidaiatzeko irrikaz?

Udaberriko lehen eguzki izpi eta haize goxoak neguko hotzak eta haizeak astiro eramaten dituenean marrazten diogu irribarrea gure aurpegiari. Eta egia da, udak eguzkia lagun duelarik atea jo orduko, umoreak hoberantz egiten digu guztioi. Berehala joaten zaigu burua hegaka, eta oporrak noiz iritsiko diren galdezka hasten gara. Ni, baina, gazteen buruetan murgilduko naiz, batez ere, unibertsitatea itxaroten duten horien nahietan. Garai garrantzitsua dudarik gabe: erabaki ugari hartu beharreko garaia, gure etorkizuna defini dezaketen erabakiak hartu beharrekoa. Baina, dirudienez, presio honek behar baino lehen bultzatzen ditu gazteak oporren ateetan jotzera. Halere, ate-joka joan aurretik komeni da aukera ezberdinak aztertzea.
Hasteko, ingelesa edo beste edozein hizkuntza atzerrian ikastea litzateke irtenbide bat. Hizkuntzak ikasi eta munduko lurralderen bat ezagutzeko aukera bikaina da. Gustuko duzun lurraldea aukeratu eta bidaia antolatua eskaintzen duten agentzia baten bidez joan zaitezke. Gainera, bertan zauden bitartean, hango familia batekin bizitzeko aukera izan dezakezu. Agentzia hauen artean ezagunak diren hainbat ditugu: Eas-Vele, EF

Beste aukera bat norberak bere bidaia antolatzea da: lagun taldearekin leku desberdinak ezagutu, ekintza berriak egin… Gazte askorentzat lurralde berri eta exotikoak bisitatzea izan daiteke nobedadea. Baina zein da arazoa? Dirua, ditxosozko dirua! Eragozpen handiak jartzen dituen elementua, dudarik gabe. Halere, ez badugu nahi metal preziatuak gure planak izorra ditzan, irtenbide merkeagoak bilatu beharko ditugu.Egun, hegazkin konpainia askok bost sosengatik saltzen dituzte bidaiatzeko txartelak. Azken hamarkadan, kostu baxuko edo low cost konpainiek protagonismo handia hartu dute. Easyjet konpainiak eman zuen lehen pausoa eta, harrezkero, eskaintzak hobetuz joan dira. Beraz, dirua jada ez da hegan egiteko oztopo, besteak beste, ondorengo konpainiei esker: Easyjet, Spanair, Aireuropa, Ryanair, Airberlin

Zure oporraldietan leku bat baino gehiago bisitatu nahi duzula? Abenturak bizitzeko gogoa, lagun berriak egiteko nahia eta beharrezkoa baino ez daraman motxila da zure irtenbidea, eta Interrail-a da zure aukera. Gazte askok hautatzen duen irtenbidea da: 2. mailako tiketak eskuan dituzula, trenez Europako 28 herrialdetan zehar mugarik gabe mugi zaitezke. Norberak hautatzen du bere ibilbidea eta ezagutu nahi dituen lekuak; beraz, aukera paregabea da Europa diru gutxiren truk ezagutzeko. Animatzen bazarete, ondorengo helbidean duzue informazio guztia. Eta ez ahaztu motxila elementu garrantzitsua dela. Hementxe dituzue hura ondo hornitzeko aholkuak: Nola prestatu dezakegu motxila?

Mundua ezagutzeaz gain, 18 urte badituzu eta betidanik zure oporrak zerbait probetxuzkoa egiten igaro nahi izan badituzu, udako egunak GKE (ONG) batean lan egiten edota borondatezko lan batean igarotzea izan daiteke aukera polit bat. Lan hauetan, trukean ezer jaso gabe proiektu sozialetan parte hartzen dute gazteek hiruzpalau astez. Mota askotariko lanak izan daitezke: ondare kultural naiz arkitektonikoak zaharberritu, ekologia edo ingurumena zaindu…
Eta zure nahia laguntza behar duen jendeari denbora eskaintzea bada, behin prestakuntza saioak jasota benetan aurrera jarraitzeko prest bazaude, gazte boluntario bihurtzen lagundu diezazuketen hainbat helbide erabilgarri dituzu hemen. Anima zaitez!

Primeran! Beraz, dagoeneko badaukagu bidaiaren helmuga eta bertara iristeko behar ditugun baliabideak. Zer egin behar dugu orain? Premiazkoena lo egiteko lekua gordetzea izango litzateke. Honetan ere diruak mugatzen bazaitu, Aterpekide txartelari esker, Europako ostatuetan beherapenak eta eskaintza bereziak eskura ditzakezu. Gazteoi bidaiatzeko aukera eta eskaintza ugari aurkezten zaizkigu; beraz, mundua ezagutzera atera aurretik informazioa lortu eta interesgarri izan daitezkeen aukera ugari dituzula ohartuko zara.

Mundua ezagutu, lagunak egin eta esperientzia berriak bizi nahi badituzu, oraintxe duzu aukera. Eman ezazu pausoa mundurantz!

Informazio gehiago:

Comments { 0 }
-->