Archive | zorionak

RSS feed for this section

Sari mordoxka Jakintza Ikastolako ikasleentzat XXI. Beasain Idazlehiaketan

By on 2011(e)ko otsailak 14 in idazlehiaketak, literatura, zorionak

Urduritasuna, kezka, hitzak trabatzea… duda izpirik gabe, edonork izan ditzakeen sentsazio eta bizi ditzakeen sentimenduak ditugu. Halere, badirudi arestian aipaturiko emozio horiek guztiak pertsona bakar batean eta une berean uztartzerik badagoela. Eta, hain zuzen ere, horixe da pasa den larunbatean, otsailak 12, goizeko 12:00ak heltzeko azken segundoak kontatzen ari ginen bitartean gehienoi sentitzea tokatu zitzaiguna. Lipar batez baino ez zen izan, atoan urduritasunari ilusioa eta poza gailendu baitzitzaizkion.

Izan ere, beste behin, dagoeneko bere XXI. ediziora heldu den Beasaingo idazlehiaketa burutu zen eguerdiko 12:00etan Beasaingo Udalaren eskutik. Hain juxtu, aipatzekoa da sariketa honek ia bi dozena urte badaramatzala literaturzale gazteen egarria asetzeko lanetan; eta, aurtengoan ere, Jakintza ikastolako ikasle garenok, Goierri eskualdeko idazle gaztetxo eta ez horren gaztetxoekin batera, gogotsu zapaldu dugu Beasaingo Usurbe Antzokiko zorua.

Horren entzutetsua den lehiaketa honetarako ibilbidea iazko urrian hasi zen. Jakintza ikastolako ikasleok, patxadaz eta beharrezko denbora hartuz, lanak idatzi eta geure irakasleei eman genizkien, hauek zuzenketa eta hautaketa prozesuari hel ziezaioten. Hala, bakoitza zegokion kategoriara aurkeztu zuten abendu hasiera aldera. Bada, urtarrilaren amaierarako hortxe genituen horrenbeste lan egin eta gero lortutako emaitzak. Ez dira gutxi izan, aurten ere, Jakintzakook maila ezberdinetan eskuratutako sariak.

Horrela, larunbatean, sari-banaketako ekitaldirako ateak zabaldu zizkiguten, eta guztiok Usurbe Antzoki barrura sartu ginen ezjakintasuna eta urduritasuna begietan. Dantzari, txistu eta danbolinak eman zioten hasiera bizi eta koloretsua ekitaldiari, eta, Irati Goikoetxea aritu zen aurkezle lanetan, beste mutiko batekin batera jardunean. Jarraian, Ekaitz Goikoetxea epaikideak hartu zuen lekukoa, eta, honen hitzaldi eta azalpenen ondoren, sariak banatzeari ekin zioten.

Edizio honetan ere, Jakintza Ikastolari sari ugari egokitu zaizkio. Ikasle sarituon artean, batzuek lehenengo aldiz arnastu dugu sari-banaketako oholtza. Beste batzuen kasuan, aldiz, esperientzia daukagu euskal literaturaren ibai luzetik baldekada bat ur hartu eta honi hurrupa egiten. Halere, historialak gorabehera, sariak oso gustura heldu dira gure eskuetara, irribarrea lagun.

Gure lanak zuekin partekatu nahi ditugula eta, hementxe uzten dizkizuegu:

Gure idazlan sarituak:

Hitz lauz, A mailan

Olerkian, A mailan



Comments { 8 }

Buber saria euskaljakintzarentzat!

By on 2010(e)ko abenduak 3 in euskaljakintza, zorionak

Berandu da, nekatuta nago eta oso urrutitik idazten dut (esker mila Mondragon Unibertsitateari Online Educa Berlin kongresuan egoteko aukera emateagatik), baina ezin nuen aukera hau pasatzen utzi Buber saria jasotzeagatik zorionak eman dizkiguzuen guztioi  eskerrak eman gabe. Eskerrak Buber sariagatik, eskerrak egunak joan eta egunak etorri (eta badira sei urte)  gurekin egoteagatik eta eskerrak gure lagunak izateagatik. Denok dakizue, ez daukat esan beharrik, gure ekimena txikia bezain gogotsua dela: ez daukagu ez helburu handiegirik, ez lehentasun estrategikorik, ez aurrekonturik, ez ezer. Hori denok dakizue. Hori bezain ondo dakizue euskara sarean sustatzeko eta hedatzeko gogoa eta kemena ez zaigula falta. Horregatik, gaur, euskararen eguna ospatzen den honetan, saria jasotzeak bereziki poztu gaitu. Hori ere badakizue, ez daukat esan beharrik.

Zerbait berezia pentsatuta genuen euskararen eguna ospatzeko.  Une edo egun bakar bateko kanpainei ihes egin nahian, azkenaldian euskara lantzeko sortu ditugun ariketak denon eskura ipintzea pentsatuta genuen gure eguna ospatzeko, baina hori beste egun baterako utziko dugu; izan ere, gaur ibilbide honetan gurekin egon zaretenokin ospatu nahi baitugu. Aitortu beharrean nago, baina, pena bakarra geratu zaidala: hemendik ahalegin guztiak eginda ere,  ikasleak ezin izan dute  sari-banaketara joan, eta horrek goibel samar utzi nau. Dena den, badakit oso pozik daudela eta nahikoa da. Bide batez, saria gure izenean jaso duten Adaki Komunikazioak enpresako lagunei eskerrik beroenak emateko aprobetxatu nahi dut. Mila esker, Andoni, bihotzez!

Euskaljakintzaren sei urte hauetan, sari eta errekonozimendu ezberdinak jaso ditugu; halere, Buber sari hau bereziki pozgarria da guretzat euskararen sustapen eta zabalkundearen aldeko errekonozimendua delako. Euskara sarean zabaltzea eta sustatzea, jarraitzen diguzuenok ondo dakizuen bezala, izan da hasieratik gure helburuetako bat. Eta horrela jarraitu nahi dugu, edukiak sortu eta partekatzen. Ez dugu saririk behar horretarako; bestalde, aitortu beharra daukagu laztanak edo musuak gustura hartzen ditugula denok! Beraz, mila esker, bihotzez, nire eta nire ikasleen izenean.

Comments { 8 }

Hau ospatzekoa izango da, ezta?

By on 2010(e)ko apirilak 12 in euskaljakintza, zorionak

Mila bidalketa euskaljakintzan

Denbora taigabe doa aurrera, ez da gelditzen, ez du atseden hartzen. Segundoa segundoari jarraitzen zaio, minutua minutuari, eta egunak eguna dakar, urteak urtea bezala. Mugikortasun errepikakor horretan, oraina da, bere horretan, gure hasierako proiektuaren jarraipen eta garapenaren erantzule. Lanean irmotasunez aritzeak saria izan du, eta konstantzia horri eta zuengandik jaso dugun atxikimenduari zor diegu mila bidalketara iritsi izana.

Denbora ez dugu, ez, egonean emango hemendik aurrera ere. Gure xedea bidea egiten jarraitzea da, eta zergatik ez, beste mila idaztea. Ea lortzen dugun!

Comments { 2 }
-->