Archive | gizartea

RSS feed for this section

3D inprimagailua, XXI. mendeko arma ekoizle berria?

3D inprimagailua (Wikimedia Commons)

3D inprimagailua (Wikimedia Commons)

Orain dela zenbait egun, interneten nenbilela, albiste batek nire atentzioa erakarri zuen eta txarrerako gainera. Albistearen izenburua irakurtzea nahikoa izan zen ni asaldatzeko; izan ere, ikasle batek arma bat sortu zuen 3D inprimagailua erabiliz. Gertakariaren mamia irakurtzeak benetako buruhaustea sortu zidan eta nire alde kritikoa martxan jarri nuen denoi nire kezka zabaltzeko helburuarekin. Beharbada buruari birak emango dizkiozue nire kezka zertan oinarritzen den asmatu ahal izateko edo baliteke ez ulertzea zergatik aukeratu dudan gai hau artikulua idazteko, baina testu honen azkeneko lerroak irakurtzerako nire ezinegona ulertuko duzuelakoan nago.

Hasi baino lehen, gaiaren inguruan zenbait datu eskuratzeko asmoz, informazio iturri batzuk arakatu nituen eta nire larritasunak okerrera egin zuen; izan ere, hainbat gaztek ikasle honen pausoak jarraituz, iskilu berriak sortu baitzituzten. Hau guztia ikusita, badirudi XXI. mendeko gazteriaren artean denbora-pasa berria bihurtu dela; bestetik, ziur nago gaur egun eskaintzen diren aukera berriekin eta horiek eskuratzeko dauden erraztasunekin egoerak okerrera egingo duela. Lehengo hariari jarraituz, 3D inprimagailuen salneurria nabarmen jaitsi da eta horrek tresna honetan interesa dutenen kopurua handitzea ekar dezake; izan ere, Media Markt-en 500 eurotan topa dezakegu modelo arrunt bat eta online dendetan 1300 euroko eredu konplexuagoak aurki daitezke. Era berean, armak egiteko beharrezkoak diren materialak oso sinpleak dira eta prezio merkean aurki daitezke interneten ez ezik, informatikan espezializatuta dauden saltokietan ere.

Beste alde batetik, gaur egungo gerretan parte hartzen duten herrialdeek metodo hau erabil dezakete guduetarako beraien armamentua handitzeko. Honek sekulako abantailak ekar diezazkieke soldaduei; batetik, arma gehiago eduki ditzakete epe laburragoan eta, bestetik, armetan diru gutxiago gasta dezakete. Hala eta guztiz ere, egoera honek arriskuan jartzen gaitu, kontrolik gabeko armen produkzioari bidea ematen baitio. Horrez gain, armak plastikoz eginda daudenez, aireportuetan eta beste zenbait tokitan egiten diren segurtasun kontroletan ezin dira antzeman. Hortaz, nork ziurtatzen digu gure aldamenean eserita doanak ez daramala iskilurik? Eta armak egin dituenak haiek sortzeko planoak sarean jartzen baditu, gutako zenbatek jarraituko genituzke ikasle horren urratsak?

Egia da inprimagailu hauen erabilera egokiak onura ugari ekar diezazkiokeela gizarteari. Adibidez, tresna honi esker egindako protesiek gorputz adarren bat ez dutenei lehen egin ezin zituzten jarduerak egiteko ahalmena eman die eta, horrez gain, organoak hondatuta dituzten gaixoei bizi hobea eskaini die. Hori guztia ikusita, baliteke jendeak armak egiteko ideia hau alde batera uztea eta zuzen jokatzea; hala eta guztiz ere, gizakiok jaiotzez besteek egiten dutena imitatzeko joera dugu eta, adrenalinak bultzatuta, arriskutsuak eta legearekin bat ez datozen gauzak egiteko irrika pizten zaigu; beraz, armak egiten dituzten gazteen kasu gehiago ikusiko ditugu seguruenik.

Aurreko guztia laburbilduz, esan daiteke 3D inprimagailua tresna baliotsua eta oso erabilgarria izan daitekeela bide zuzena jarraituz erabiliz gero. Ondorioz, armen ekoizpenean zure harri-koskorra ekarri baino lehen, pentsa ezazu zure ekintzek gizartean izan dezaketen eraginean. Hitz gutxitan esanda: zentzutasunez jokatu, dibertsioaren benetako esanahia kontuan hartuz.

Gaiaren inguruan sakondu nahi izanez gero, ikusi bideo hau ingelesez [3D Printed Guns (Documentary)] edo ondorengo hau:

Comments { 0 }

Interneti esker, edozeinek alda dezake mundua klik bakar batekin!

Argazkia: Valentina Carta (FlickrCC)

Argazkia: Valentina Carta (FlickrCC)

Aurreko batean, Change.org izeneko webgune baten berri izan nuen. Gune hau, gobernuari kanpaina bidez eskakizunak egiteko da eta jadanik milaka pertsonek euren helburuak lortu dituzte. Adibidez, orain dela gutxi Madrid Arenan gertatutako ezbeharrean, ama batek bere alabaren bizia galdu ondoren kanpaina bat aurkeztea erabaki zuen, horrelakorik berriz gertatu ez zedin eta 428.739 firma lortu ondoren, bere helburua lortu zuen (hemen duzue informazio gehiago). Orain arte ez nuen webgune honen berririk, eta, oso erabilgarria izateaz gain, pertsona askorentzat benetan lagungarria izan daitekeela pentsatzen dut.

Minutu pare bat irakurtzen igaro eta gero, hainbat motatako kanpainak ikusi nituen; hala ere, harrigarriena ama batek bere alabaren bizia arriskuan jarri zuten web orrialde batzuen salaketa izan zen. Emakume honek webgune horiek debekatzeko edota blokeatzeko eskatzen zuen. Kanpaina horretan, ama honek orain ospitale batean isolaturik dagoen alabaren kasua kontatzen du, eta ezin duela berarekin hitz egin ezta ikusi ere. Amak hitz hauekin azaltzen du bere erreakzioa webgune hauetako edukia lehen aldiz irakurri zuenean, bere alabak horietako bat bisitatzen zuela aitortu ondoren: “Nik ez nekien existitzen zirenik ere, nire alabak horietako bat bisitatu zuela aitortu zidan arte. Ziurtatzen dizuet lehenengo ilarak irakurtzen hasi bezain laster negar malkoak isuri zitzaizkidala eta ilea inoiz ez bezala tentetu zitzaidala. Inoiz irakurri dudan gauzarik izugarriena bezala gogoratzen dut.”

Internet, bulimia eta anorexia aldeko  web orrialde hauez beteta dago, pro-ANA eta pro-MIA izenekoak. Hauetan, pisua galtzeko aholkuak ematen dituzte, baina hauek gazteen osasuna arriskuan jartzen dute: oka errazago egin gurasoak ohartu gabe, zer egin gosea ekiditeko…

Niri ama honek Change.org-ren bidez laguntza eskatzeko izan duen ideia hau oso egokia iruditu zait, eskakizun hauek Justizia Ministeriora doazelako zuzenean eta webgune honen bidez laguntza eskatzea ez delako alferriakoa. Jadanik 170.958 sinadura lortu ditu, baina oraindik 29.042 falta dira helburua lortzeko. Nik neure sinadura bidali dut. Espero dut gehiago lortzea eta ama honen helburua bete ahal izatea. Gogoratu: klik bat eginez, pertsona askoren bizitza alda dezakezu. Hemen uzten dut esteka, sinadura bidali nahi izanez gero, bertan sartzeko.

Comments { 0 }

Busti al zara AEAren alde?

Wikimedia Commons

Wikimedia Commons

Nork ez du uda honetan norbait balde bete ur izoztu kolkotik behera botatzen ikusi? Nondik dator ekintza? Nork sortu du? Zergatik? Baliteke zuk ere hau galdetzea zure buruari. Ice Bucket Challenge delako ekimen hau Alboko Esklerosi Amiotrofiko edo AEA gaixotasuna ezagutzera emateko eta dirua biltzeko sortu da. Hementxe daude hainbat datu, ekintza honi buruz gehiago jakiteko.

Nire iritziz, ideia bikaina da denok batera gaixotasun baten aurka egitea, gehien behar dutenen izenean. Modu ezberdinak erabil ditzakegu laguntzeko, baita laguntza mota ezberdinak eskaini ere. Adibidez, diru laguntza bat eskainiz edota laguntza morala igorriz. Kasu honetan, bi laguntza motak helaraztea da helburu. Benetan ikusteko gogorra da, baita behatu eta honetaz hitz egiteko ere eta jarduera honen ondorioz denon ahotan dago gaixotasun hau.

Milaka eta milaka pertsonek nahi izan dute parte hartu ekintza solidario honetan, ni barne, elkartasuna adierazteko. Lehenik eta behin, ur izoztua botatzearekin batera, gaixotasun hau bizitzen duten pertsonen sintometako bat trasmititu nahi da, gaixoengan arreta puntu bat jarri eta sufritzen duten guztiaz jabetzeko.

Laguntza moralaz gain, diru-laguntza bat ere ematen da, eta hau da helburu nagusiena. AEA gaixotasuna ez da oso ezaguna, baina sortu den izendapen eta izendatu kate honen ondorioz, izugarrizko dirutza lortu da, sendagairik gabeko gaixotasun honen ikerketan aurrera egiteko. Gainera, dirua lortzeaz gain, gaixotasun honetaz hitz egitea lortu da, jendea enpatizatzen hastea, gaixotasun honen eta beste hainbat gaixotasunen aurka borroka egiteko gogoa piztea, eta, azkenik, elkarte honek behar duen laguntzaz ohartzea.

Hala eta guztiz ere, gai honi buruzko guztia ez da positiboa. Pertsona ugarik hartu dute parte erronka honetan. Beraz, ur kantitate izugarriak galdu dira alferrik, nahiz eta pertsona hauek guztiek gogoan eduki munduan dagoen ur eskasia. Arrazoi honek eragin du polemika handiena, batzuei laguntzeko, munduko izaki bizidun guztiak kaltetzen ari baitira. Benetan beharrezkoa ote da ur kantitate hauek inongo probetxurik gabe bertan behera botatzea? Ez al da hobe diru laguntza bat bakarrik egitea? Egia esan, modu honetan ikusita, burugabekeria dirudi. Baina nahiz eta jende asko eta asko ibili ura burutik behera botatzen, xede onez egiten dute, enpatizatuz, eta era berean jende gehiagok izan dezan gaixotasun honen berri.

Aurreko guztia laburbilduz, ondorio batera irits gaitezke: ice bucket challenge delakoaren erronka aurrera eraman den bezala, diru-laguntza kantitateak ere gora egitea komeni da. Hori guztia dela eta, aproposa izango litzateke denok laguntza txiki bat eskaintzea beharrean dauden guztiei, bizkarra eman beharrean. Gogoan eduki, nik ekarri dudan bezala, zuek ere zeuen harri-koskorra ekarri!

Comments { 0 }
-->