Hitzapasa: telebistako Pasapalabra euskaraz online

Betidanik gustatu izan zaizkit hitzak, eta horiek bezainbeste, ia-ia, hitzekin zerikusia duten lehiaketak, jokoak… Etxean nagoenean, adibidez, askotan pizten dut telebista Pasapalabra programaren azken txanpa ikusteko, non alfabetoko hitzez osatutako erroskoa azaltzen den. Eta beti inbiditan! Euskaraz horrelako zerbait egongo balitz, etekin polita aterako nioke…

Geroago, Gaurko Hitza blogarekin hasi nintzenean, egunez egun ipintzen nituen hitz horiek praktikatzeko hitz-jokoak sortzeari ekin nion. Orduan ere, ditxosozko erroskoa buruan nuela, han eta hemen galdezka hasi nintzen, ea norbaitek ezagutzen ote zuen Pasapalabra sortzeko aplikaziorik edo. Adibide batzuk bidali zizkidaten PowerPoint eta JClic programak erabiliz egindakoak (esker mila, Anibal De La Torre) eta beste bakarren bat ere topatu nuen (Pasapalabra navideño), baina nahiko urrun zeuden nik buruan nuen hartatik. Duela hilabete batzuk, ordea, sarean bi adibide hauek topatu nituen: Pasapalabra eta Pasaconjuro. Horietatik tira eginez, sortzaileekin harremanetan jarri eta jatorrizko artxiboak lortu nituen Esker mila, bihotzez, Chuan Garces eta Segio Armiséni euren lana (jatorrizko artxibo guztiak) inolako oztoporik gabe helarazi eta laguntza eskaintzeagatik. Hainbeste denbora atzetik ibili ondoren, gainera, biak egun berean. A ze gauzak!

Kontua da biak ala biak .fla artxiboak zirela. Flasha menperatzen ez nuenez, Twitter bidez laguntza eskatzea otu zitzaidan. Horrela, La Personnalitéko Goiok laguntza eskaini eta hitza hartu nion (bide batez, Diario Vasco.com-eko Kortabitarteri ere eskerrak eman nahi dizkiot, bera ere laguntzeko prest agertu baitzen). Gauzak horrela, Goiori zein aldaketa nahi nituen esan eta abian ipini zen. Bileraren bat, ordu batzuk eta hainbat buruhauste eta gero, azkenean, Larramendik esango lukeen legez: “Ezina ekinez egina”. Goio, hitzak motz geratzen zaizkit eskerrak emateko.

Hitzapasa: Pasapalabra jokoa euskaraz online

Hasierako helburua Gaurko Hitzan azaltzen joan diren hitzak praktikatzea bazen ere, horiek oso zailak zirela ohartuta, maila edo urrats ezberdinetako ariketak sortzea pentsatu nuen, maila guztietako erabiltzaileek euren hiztegia hobetzeko aukera izan zezaten. Oraingoz, 3 urrats ezberdinetan banatutako 6 ale baino ez daude, baina pixkanaka-pixkanaka gehiago sortzen joango naiz.

Jokatzen hasi aurretik, komenigarria litzateke ondorengo oharrak kontuan izatea:

  • Definizioa irakurri eta idatzi hari dagokion hitza laukitxoan. Adi! Erantzuna -a artikulurik gabe eman behar da, mugagabean).
  • Erantzuna idatzi ondoren, erantzun (edo enter) botoia sakatu.
  • Badaezpada ere, erantzun botoia sakatu aurretik bi aldiz begiratu, idatzi duzuna idatzi nahi zenuena dela ziurtatzeko.
  • Erantzunen batean zalantza baduzu, erabili PASO EGIN botoia eta aurrera jarraitu (geroago erantzuteko aukera izango duzu).
  • Kontuz denbora mugarekin!
  • Amaieran, puntuazioa eskuratzeaz gain, erantzunak ikusteko aukera izango duzu (asmatutakoak zein oker erantzundakoen zuzenketa).

Hitzapasa gehiago sortu ahala, Gaurko Hitza eta euskaljakintza blogen eskuineko zutabeetan eskuratu ahal izango dira. Hasteko, baina, hementxe uzten dizuet 1. urratseko adibide bat (egin klik irudiaren gainean jokoari ekiteko). Ea gai zareten hitz guztiak asmatzeko! Zorte on!

Guztiak ikusteko:

, , ,

8 Responses to Hitzapasa: telebistako Pasapalabra euskaraz online

  1. Itziar 2010(e)ko martxoak 16 at 10:38 pm #

    Oso pozik nago pasapalabra euskaraz ikusi eta gero, niri ere asko gustatzen zaizkit hitzak, pasapalabra-zalea naiz, zoratzen nau saioak, eta orain posiblea da jolastea euskaraz!!!!! Euskera ikasten ari naiz eta hiztegia aberasteko oso ona da jolastea.ESKERRIK ASKO =D>

  2. Maite 2010(e)ko martxoak 16 at 11:30 pm #

    Mila esker, Itziar! Oraintxe ari nintzen beste bat egiten. Ea pixkanaka-pixkanaka osatzen noan.. 😉

  3. Nerea Beitia 2010(e)ko martxoak 17 at 10:37 pm #

    Epa, Maite:
    Aspaldiko! (zure ikaskidea izandakoa naiz, akordatuko zara, ez?)Zenbat lan egiten duzun, neska!!!! Segi horrela, besteok ederki aprobetxatzen dugu eta zuk egindako lana. Gaur bertan aritu naiz ikasleekin hitzak asmatzen eta primeran pasatu dugu!
    Ondo izan

  4. Maite 2010(e)ko martxoak 17 at 11:36 pm #

    Aupa, aspaldiko!! Nola ez naiz, ba, akordatuko???

    Beti da pozgarria batek egiten duena besteei lagungarria edo gustukoa gertatzea, baina ikasle ohi batek hori esatea askoz ere gehiago!!! Hementxe nabil ahal dudan tarte guztietan Hitzapasak sortu eta sortu…

    Ondo segi, Nerea, eta laster arte! 😉 😉

  5. amujika 2010(e)ko martxoak 18 at 6:05 pm #

    Ederra Maite!!

    Zenbatek pentsatu ote dugu “euskeraz balego…”, eta zuk pentsatu eta egin!

    Aritu naiz jolasean eta oso ondo dago!! zorionak eta ondo segi!!

  6. Maite 2010(e)ko martxoak 18 at 11:05 pm #

    Aupa, Ainhoa!
    Eta asko asmatu dituzu??? Zein urrats?? jajajaja
    Pozten naiz gustatu izanaz. Mila esker iruzkinagatik eta badakizu beti nagoela zure bertso edo idatziren baten zain; beraz, nahi duzunean… 😉 😉

  7. joxemose 2010(e)ko martxoak 19 at 10:13 am #

    Ezin hobeto pasatu genuen ikasleak eta neu ostegun-ostiraleko azken aurreko orduan. ESKERRIK ASKO!! Gu geu ere Gallarta honetatik bide berean ahaleginduko gara. Laster arte Bonaparte!

Trackbacks/Pingbacks

  1. uberVU - social comments - 2010(e)ko martxoak 15

    Social comments and analytics for this post…

    This post was mentioned on Twitter by euskaljakintza: [euskaljakintza] Hitzapasa: telebistako Pasapalabra euskaraz online http://tinyurl.com/yjqodyv

Utzi erantzuna

-->