Warning: Creating default object from empty value in /home/berria/berria.euskaljakintza.com/wp-content/themes/canvas/functions/admin-hooks.php on line 160

Software Askea Jakintza Ikastolan

Ikasturte hau berezia izaten ari da Jakintza ikastola osatzen dugun komunitateko kide guztiontzat. Dakizuenez, gure ikastolak software askea erabiltzeko erabakiaren azken urratsa emanez, ikasturte honen hasieratik, ikastolako ordenagailu guztiek software librea baino ez dute.

Horrek, pentsa dezakezuenez, bere eragozpenak eta zailtasunak eragin ditu. Hori bai, guztion borondate onarekin aurrera ateratzen ari gara. Nolanahi ere, askotan, borondate ona ez da nahikoa eta ezinbestekoa dugu adituen laguntza eta eskarmentua. Hor kokatu behar dugu gure IKT dinamizatzailea den Jokin Lacallek prestatu eta gaur argitaratu duen gune berria.

Izugarria iruditu zaigu Jokinek prestatu digun txokoa. Hiru atal nagusitan banatuta dago:

Dokumentazioaren atalean, Software libreari buruz ikuspegi ezberdinak jorratzen dituzten testuak eta azalpenak topatuko ditugu. Laguntzaren atalean, Ubuntu, OpenOffice eta Mozilla Firefoxi buruzko bideo tutorialak, gidak eta fitxa teknikoak eta deskargak topatuko ditugu. Eztabaidagunean berriz, foro irekia dugu gai hauen inguruko zalantzak, ekarpenak, kritikak… luzatzeko.

Gunea eraikitzeko egundoko lana egin duen arren, gunea ez dago itxita eta guztion partaidetza bilatzen du poliki-poliki osatzen joateko. Beraz, hemendik ere dei bat luzatu nahi dugu jendearen partaidetza sustatzeko eta Jokinek dioen bezala: “Ea oraingoan etekin gehiago ateratzen diogun egindako “montaje” honi. Benetan pozgarria izango litzateke eta gunea osatzen jarraitzeko behar diren animoak eskuratzeko baliagarria.”

Horra hor gunearen aurkezpenean irakur daitekeen mezua:

2009-2010 ikasturtea berezia izan da gure ikastolan. Urte biren bueltan, ikastolan erabiltzen dugun software ia guztia librea izatea pasa gara.

Eman dugun urratsa ez da nolanahikoa izan, ikasle eta irakasleok bizi dugun egunerokotasunean eragin handia izan duen erabaki bat izan da. Aurretik egin den informazio eta kontzientziazio lana garrantzitsua izan bada ere, ezinezkoa da egoera berri honek ekarriko dituen gorabehera guztiak aintzat hartu eta aurretik lotuta izatea.

Gidatzen kotxea hartuta ikasten den bezala, software berria erabiltzen eta praktikatzen ikasten da. Eta orduantxe sortzen zaizkigu galdera, kezka eta laguntza behar nagusienak. Tira ba, txoko berri honek horiei guztiei erantzuna ematea du helburu, hasi berri dugun ibilbide honetan topatuko ditugun oztopoak gainditzen laguntzeko.

Ez da hori, baina, helburu bakarra. Badago beste bat, hain nabarmena ez dena agian, baina aurrekoa bezain garrantzitsua dena. Software askearen komunitatea eredugarria zerbaitetan baldin bada, hori erabiltzaileen artean dagoen lankidetza eta elkarlanarengatik da. Izpiritu hori ere gurera ekartzea nahiko genuke.

XXI. mendeak bere lehen hamarkada bete berri duen garai honetan, ikaskuntza norabide bakarrean gertatzen dela azaltzen duten teoriak atzean geratu dira. Gaur egun ikaskuntza zerbait soziala bezala ulertzen da, dialogikoa, denok denongandik ikasten dugu. Parekoen arteko eztabaidak, argudioen kontrastea, galde/erantzunak… ezagutza taldean eraikitzen laguntzen dute. Ikaskuntza eredu berri hau oraindik gehiago nabarmendu da teknologia berrien garapena eta interneten gertatu den iraultzarekin, batez ere.

Txoko honek denon eskura ipintzen ditu oinarrizko azpiegitura, komunikaziorako ingurunea, eztabaida eta argudioen hartu-emanetarako lekua baina badago zerbait zure esku bakarrik dagoena. Talde bezala ikasten joateko eta beharrezko heldutasun eta alfabetizazio digitala lortzeko, zure partaidetza behar-beharrezkoa da. Zure lankidetza eta partaidetza taldearen mesederako izango dela sinistuz bakarrik beteko du gune honek bere helburua. Zure esku dago, beraz, txoko honek ibilbide luzea izatea edota gauerdiko ahuntzaren eztularen parekoan izatea.

Jakintza.net-en argitaratua

, ,

5 Responses to Software Askea Jakintza Ikastolan

  1. Josu O. 2010(e)ko urtarrilak 19 at 10:12 pm #

    Hitz bitan: ikara garria 😉

  2. jolaus 2010(e)ko urtarrilak 20 at 6:10 am #

    Aurretik bidalitako iruzkinak esteka asko zituen nonbait eta spam bezala hartu duela iruditzen zait. Hemen aurreko iruzkina estekarik gabe:

    Aupa Maite

    Eskerrik asko ekarpen hau eguneratzeagatik ;-). Atzo irakurri nuenean jabetu nintzen egile bezala zu agertzen zinela eta ez zegoela jatorrizko iturriaren aipamenik inon. Hori ikastolako webguneak duen lizentziak zehazten dituen baldintzen kontra doa. Baina, egia esan, horrek baino gehiago kezkatzen ninduen nola hartuko zuen Mikelek berak egindako lanaren erreferentziarik ez egotea inon, izan ere, astelehenean berandu arte egin zitzaion Jakintza.net-eko artikulua idazten (ordubietan argitaratu zuen) eta bost ordu beranduago hemen bere artikulua beste egile baten izenean aurkitzea ez dut uste grazia handia egingo zionik (kontutan hartuta gainera beste batzuetan ere gertatu dela)

    Kontutan izanik Euskaljakintzako hainbat jarraitzaileek ez dutela gertutik jarraituko gure ikastolako webgunea, nik uste dut gaizki ulertuak saihesteko merezi duela detailetxo horiek zaintzea, batez ere, alderantziz gertatu izan denean atal horri garrantzia berezia eman zaionean. Horra hor, adibide gisa, Mikelek aurrekoan zure lan baten inguruan egin zuen erreferentzia ikastolako gunean edo Sustatukoek IKTeroen albisteak eurera eraman dutenean.

    By the way, eskerrik asko atari berriaren aipamena egiteagatik 😉

  3. Maite 2010(e)ko urtarrilak 20 at 8:59 am #

    Aupa, Jokin!
    Nire ustez, jakintza erabiltzailearekin argitaratu nuen, baina, tira, agian oker nago. Mila esker adierazteagatik eta zorionak egindako lan bikainagatik! 😉

Trackbacks/Pingbacks

  1. Tweets that mention euskaljakintza» Blog Archive » Software Askea Jakintza Ikastolan -- Topsy.com - 2010(e)ko urtarrilak 19

    […] This post was mentioned on Twitter by Maite Goñi, Euskal blogosfera. Euskal blogosfera said: Software Askea Jakintza Ikastolan: Ikasturte hau berezia izaten ari da Jakintza ikastola osatzen dugun komunitatek… http://bit.ly/6sPvVY […]

  2. uberVU - social comments - 2010(e)ko urtarrilak 19

    Social comments and analytics for this post…

    This post was mentioned on Twitter by euskaljakintza: [euskaljakintza] Software Askea Jakintza Ikastolan http://bit.ly/5coqvV

Utzi erantzuna

-->