Tag Archives | euskaljakintza

Zer dakigu gure kulturaz?

Kurtso hasierako euskarako klase batean, Maitek lehenengo hiruhilekoan, taldeetan banatuta, proiektu bat egin behar genuela adierazi zigun. Gure taldea bildu bezain laster heldu zen lehenengo buruhaustea: zeri buruz egin lana? Maitek baldintza gutxi batzuk betetzeko besterik ez zigun eskatu, gaia librea zen. Baldintza horiek ziren, labur esanda: proiektuak sarean euskara zabaltzen lagundu behar zuen, eta guri euskararen inguruko zerbait berria erakutsi behar zigun. Bueltak ematen hasi eta, proiektua euskara bultzatzeko zenez, euskara eta euskal kulturari buruzko lan bat egitea bururatu zitzaigun .

Gure lanketa hiru zatitan banatu genuen. Lehenengo zatian, Ordiziako kaleetara atera ginen, bertako herritarrek gure kulturari buruz zenbat dakiten jakiteko asmoz. Horretarako, Badaki, ez daki programaren formatua erabili genuen, lana joko baten antzera hartuz. Arratsalde luze eta dibertigarri bat igarotzeaz gain, zenbait ordiziarrek gure kulturaren atal batzuk ez dituztela oso ongi menperatzen antzeman genuen. Hala ere, ohikoa den bezala, hiritar askok euskal kultura ongi ezagutzen dutela ohartu ginen.

Ezpairik gabe, euskara da euskal kulturaren ondasunik garrantzitsuena. Hortaz, gure laneko bigarren zatia euskarari eskainiko geniola erabaki genuen. Zati honetan euskaren zabalkundean lan ikaragarria egiten duten erakundeetako bat bisitatu genuen: Lazkaoko Maizpide euskaltegi-barnetegia.

Bertako zuzendaria den Jon Urdangarin elkarrizketatu genuen, euskaltegien eta euskararen egoerari buruzko zenbait berri eskuratzeko. Azkenik, bertan ikasten ari diren hainbat ikasleri ere galdera batzuk egin genizkien euskara eta euskaltegiaren inguruan.

Gure lana, berriz, ez da hor amaitu. Hirugarren zati bat ere badu, euskal kultura orokorrari lotua. Galdera sorta bat prestatu dugu zenbat dakizuen neur ezazuen. Galdera  batzuk besteak baino zailagoak izango dira, baina ziur gaude gehienak asmatuko dituzuela. Ea ba zenbat asmatzeko gai zareten!

Burututako proiektu honekin, gauza ugari egiten ikasi eta beste batzuk hobetu ditugu. Hasteko, talde lanak modu eraginkorrean egiten ikasi dugu, hau da, egin beharrekoa banatuz, denen artean erabakiak hartuz… Baina ez hori bakarrik, prestatukako elkarrizketak eta bat-batekoak nola egin ditzakegun  ikasi dugu eta  bideo muntaiak egiten hobetzeko ere balio izan digu.

Amaitzeko, ahaztu barik, eskerrak eman nahi genizkioke proiektu hau burutzea posible egin duten guztie: kalean lagundu zigutenei, Maizpideko zuzendari, irakasle eta ikasleei eta Jakintza ikastolari. Eskerrik asko denei! Proiektua zuen gustukoa izatea espero dugu. Ikus ezazue denbora galdu barik!

Josu Agirre, Aritz Insausti, Iker Nieto, Jokin Auzmendi, Ander Rivera eta Mikel Lekuona.

Comments { 4 }

#U21, gazteon ikuspegia

Julen, Asier, Javier, Alexander eta Eñaut

Egungo egoera politikoaren gorabeherak direla eta, hauteskundeak gertu zeudela ikusirik, ardura politikoz beteriko ikaskide talde batek egitasmo honi ekin genion duela zenbait aste. Ezagunak genituen jada alderdi guztien hauteskunde-programak eta asmoak; nolanahi ere, gazteoi eragiten diguten gaien inguruan informazio gehiago lortu nahian, helburu zail bezain zirraragarria jarri genion geure buruari: lehendakaritzarako hautagaiak elkarrizketatu eta hautagaiekin aurrez aurre mintzatu euren gazteon inguruko politika zein den jakiteko, hau da, gazteenganako duten pentsaera eta egitasmoak ezagutzeko.

Erronka hau helburu, prestakuntzari ekin genion eta alderdi guztiekin harremanetan ipintzen saiatu ginen. Batzuen erantzunik jaso ez arren; galdera konkretu, zuzen eta aproposenak eratu genituen eta beharrezko material guztia eskuratu. Azkenean, gorabehera batzuk tarteko, zenbait alderdirekin adostu genituen elkarrizketak, eta horietara joateko prestatu ginen. Honela, hurrengo hautagaiak elkarrizketatu genituen hurrenez hurren: Laura Mintegi (EH Bildu), Mikel Arana (Ezker Anitza), Iñigo Urkullu (EAJ), eta Antonio Basagoiti (PP). Ezker Batua Berdeak-eko Raquel Modubar-en idatzizko erantzunak ere jaso genituen, beste alderdiekin, berriz, ezin izan genuen elkarrizketarik hitzartu.

Elkarrizketak burutu eta handik oso gutxira hauteskundeak iritsi zirenez, ezin izan genuen lana bere osotasunean plazaratu, baina bai aurrerapen txiki bat.  Horren ostean, azken aste hauetan, lana osorik  zintzilikatzeko prestatzen egon gara: bideoa, bloga, gure joan-etorrien storifya…  Elkarrizketetatik eskuratutako informazioa antolatu eta gure ondorioak atera ditugu. Hementxe duzue bideoa ikusgai:

#U21, gazteon ikuspegia.

Pixka bat atzera eginez, onartu behar dugu hasieran norabide jakinik gabe ibili ginela, gaia nondik heldu ziurtasunez jakin gabe; halere, argi geneukan gauza bat: zer interesatzen zitzaigun. Hutsune bat ikusten genuen. Hutsune horren ertz batean, gazteok geunden; bestean, aldiz, gizartea eta politika. Gauzak horrela, hautagaiek gazteekiko izango duten politika gertutik ezagutaraztea izan da gure helburua, gai horren inguruan sarean eta euskaraz gazteok dugun informazio urria aintzat hartuta.

Amaitzeko, eskerrik beroenak eman nahi dizkiegu gurekin egon diren lehendakarigai guztiei eta haiekin harremana erraztu diguten taldekideei. Hemen aurkezten dizuegun blog hau ibilaldi horren guztiaren fruitu izan da. Espero dugu gu bezalako gazteek gure esperientziatik zerbait ikastea. Guri dagokigunez, saiakuntza honetatik eskuratu dugun eskarmentua hurrengo batean aplikatu ahal izatea da gure nahia. Besterik gabe, hementxe uzten dizuegu gure lanaren emaitza: #U21, gazteon ikuspegia.

Taldekideak: Julen Harto, Asier Egia, Javier Valdivielso, Alexander De La Cuesta eta Eñaut Muerza.

Egin klik irudiaren gainean, bloga ikusteko: #u21, gazteon ikuspegia

Comments { 5 }

Nondik gatoz, eta nora goaz?

Euskararen egoera urte askotan zehar guztiok izan dugun kezka da. Txikitatik aritu gara honen inguruan lanean: hasieran Argitxorekin; ondoren, Euskaraz Bizi egunean ekintza ezberdinak antolatzen.. .Ikastolan gure azken urtea dela ikusita, eta euskarako lana aprobetxatuz, euskararen inguruan ikertzen saiatu gara.

Maitek egin beharrekoa azaldu zigunean, erreportaje bat egitea erabaki genuen hasieratik; gure zalantza, ordea, aurkezteko modua izan zen. Hainbat aukera kontuan izan eta gero, egokiena dokumentala bideoz grabatzea izango zela adostu genuen. Bideoa -entzumena, ikusmena eta hainbat sentimendu pizteko aproposa- mezua helarazteko biderik zuzenena iruditu zaigu.

Hiru zati nagusitan banatu dugu gure proiektua. Batetik, ikastola hartu dugu abiapuntutzat, euskararengan egin duen lana eta ahalegina dela eta. Jakintza ikastolaren erroetan murgildu gara, eta guretzat berriak diren istorio batzuk azaleratu ditugu. Bestetik, azken urteetako euskararen egoeraz galdetu dugu. Horretarako, Euskal Herrrian Euskaraz ekimeneko kide batekin bildu gara, gure ezagutza aberasten lagundu diguna. Bukatzeko, kulturaren atalean gustuko dugun alorrera jo dugu, musikara, euskal raparen inguruan arreta berezia jarriz.

Lan honek bere fruituak izatea espero dugu, helburu nagusia euskararen erabilera sustatzea eta jendea euskararen etorkizuna guregan dagoela jabetzea da. Gure helburuak betez gero, onura guztiontzat izango da, bereziki, ondorengo belaunaldientzat.

Hainbat buruhauste izan ditugun arren, bideo eta teknologiari buruz ikasteko balio izan digu lanak. Barkatu, halere, gure ezjakintasuna alor teknikoan, hainbat pasartetan agerian gera litekeena. Dena den, esperientzia honetatik aipagarriena euskararen inguruan eskuratu dugun ezagutza eta informazio guztia da. Beraz, eskerrak eman nahi dizkiegu gure erreportajean parte hartu duten pertsona guztiei, haiek gabe nekez erdietsiko genuke eta gure hasiera helburua.

Besterik gabe, hemen duzue gure lanaren emaitza. Eman zuk ere pauso bat euskararen alde!

Jone Agirre, Maider Alcayaga, Ainhoa Barandiaran, Nadia Perez eta Paula Sesma.

Comments { 3 }
-->