Warning: Creating default object from empty value in /home/berria/berria.euskaljakintza.com/wp-content/themes/canvas/functions/admin-hooks.php on line 160
Tag Archives | euskaljakintza

Euskaraz jolasten

Maddalen, Uxue, Garazi, Irene eta Itxaso

Gaur egun, euskarazko programak oso mugaturik daude, nagusiki haurrenak. Telebistan begiratzen hasiz gero, gaztelaniaz dauden programa anitzekin alderatuz, marrazki bizidunak baino ez ditugula euskaraz jabetuko gara. Non geratu dira garai bateko Betizu, Egin Kantu eta Ordu Txikitan bezalako telebista saioak? Umeek gero eta gutxiago goza dezakete euskal kulturaz. haiek dira etorkizuna. Hortaz, gure haurrak euskararen erabilerara bultzatuz gero, herri euskaldunagoa lortuko dugu. Zalantzarik ez dago: gure hizkuntza esparru guztietara zabaltzea onuragarria izango da guztiontzat. Hori dela eta, euskal saio bat sortzearen beharra ikusi dugu gaztetxoenak gehiago ikasteaz gain, ondo pasa dezaten, hau da, saio ludiko-pedagogiko bat ekoiztu dugu. Nagusiki haurrentzat izan arren, entretenigarria izango da baita gazte eta helduentzat ere.

Guri dagokigunez, benetan onuragarria izan da proiektu honetan parte hartzea. Telebista munduan murgildu eta teknologia berriaren erabilpenari buruz gauza asko ikasi dugu. Eduki aldetik, lehen hezkuntzako ikasleei zuzendutako lehiaketa sortzean, hizkuntza maila egokitu behar izan dugu. Erraz egin daitekeen atala badirudi ere, ordu ugari eskaini dizkiogu; izan ere, edukiak moldatzeko, euren irakasleekin harremanetan ipini behar izan baitugu behin baino gehiagotan. Bide batez, eskerrak eman nahi dizkiegu Mariam irakasleari (bere gelan lehiaketa egiten uzteagatik, besteak beste) eta Marijori (laborategian egindako esperimentuekin laguntzeagatik).

Honez gain, telesail bakoitzaren atzean, Mihiluze edo Goenkale kasu, dagoen lan guztiaz jabetu gara. Gure egitasmoa haurrei zuzendua izanik, eduki aldetik ez dugu  aparteko zailtasunik topatu, esan bezala; hala ere, bost baserritarrek aurkeztutako saio honek atal ezberdinak dituenez -leihaketak, magia saioak, eskulanak eta laborategiko esperientziak…-,  ez da guk uste bezain erraza izan. Bai alor ezberdinak jorratzeak baita muntaia egiteak ere hainbat buruhauste ekarri dizkigu: laborategian patataren eta globoaren esperientziak egiteko orduan, hainbat arazo izan ditugu eta ez dira guk nahi bezain ondo atera. Hori dela eta, birritan grabatu behar izan ditugu.

Ondorioz eta hau guztia laburbilduz, euskara bultzatzeko pauso berri bat eman dugula esan daiteke. Pauso hau gustura eman dugun arren, ez da batere erraza izan; izan ere, eskola orduez gain, makina bat lan egin behar izan dugu ikastolako orduz kanpo. Bidea oraindik luzea da, helmuga oraindik urrun dago. Garbi dago, guretzat gure proiektua hasiera besterik ez dela, urrats ugari ditugu oraindik emateke. Euskara gehiago zabal daiteke eta eginkizun hau denon esku dago. Anima zaitezte!

Euskaraz jolasten 1

 

Euskaraz jolasten 1 from Maite Goñi on Vimeo.


 

EUSKARAZ JOLASTEN 2 from Maite Goñi on Vimeo.

Maddalen, Uxue, Garazi, Irene eta Itxaso

Comments { 7 }

Euskaljakintzakoon egitasmo berria: ‘Sarea euskaraz blai’

Sarea euskaraz blai. Izen horixe eman nahi izan diogu gure azken egitasmoari; izan ere, euskaljakintzakook sarea euskarazko edukiez betetzen jarraitu nahi baitugu (betiere gure eskuetan dagoen neurri txikian). Jarraitzen diot, duela zortzi urte jaiotako proiektu honek bizirik dirauelako, eta inoiz baino gogotsuago  gaudelako. Jomuga hori buruan, 1. hiruhilekoan egingai ezberdinetan egon gara lanean, taldeka.

Ikasturte hasieran, ikasleengana jo eta ondorengoa eskatu nien:

  • Proiektu bati heldu behar zioten, euskarazko edukiak sarean zabaltzeko aproposa izango zena.
  • Euskarazko sareko edukiei erreparatuta, euren lanak beraiek antzematen zuten hutsune bat betetzeko baliagarria izan behar zuen.
  • Euren euskara hobetzeko baliatu behar zuten (elkarrizketak, gidoiak, azalpenak, argudioak… aukeratutako testu motak seriotasunez landu behar zituzten).

Zehatz-mehatz esateko, galdera nagusia ondorengoa izan zen:

Zuen proiektuak euskarak sarean duen zein arazo, hutsune, behar edo gabeziari erantzungo dio?

Ikasleak berehala hasi ziren proiektuak definitzen: beharko zituzten baliabideak zerrendatzen, faseak bereizten, denboralizazioa zehazten, taldekideen ardurak eztabaidatzen… Eta hortxe ibili dira buru-belarri Lehendakaritzarako hautagaiak elkarrizketatzen, umorezko programak eta lehiaketak ekoizten, ume txikientzat ikas-materialak sortzen… Euskarari buruzko dokumentalen bat ere prestatu dute. Esker mila tarte bat eskaini diguzuen elkarrizketatu eta lagun/konplize guztiei.

Esan beharra daukat prozesu osoa jakin-minez bizi izan dudala. Jakin-minez, prozesu osoan zehar ni gauza batean eta bestean laguntzeko eta egitasmoa bideratzeko egon banaiz ere, taldeena izan delako proiektuak aurrera ateratzeko ardura nagusia. Jakin-minez, beraz, azken eguna iritsita, ikusteko zer-nolako emaitzak lortzeko gai izan diren eta zenbat emateko prest egon diren. Dena den, hasiera-hasieratik esan nien emaitza bezainbeste izango nuela kontuan prozesua. Gauzak horrela, ibilbide osoa dokumenta zezaten eskatu nien: saioz saio eskolako ordu guztietan egindakoa, eskolaz kanpo lanean eman dituzten orduak, landutako idatziak, taldearen lana osotasunean, partaide bakoitzaren parte-hartzea… Bihar hasiko dira gelakideen aurreko aurkezpenak eta talde bakoitzak egin duenaren defentsa.

Edonola ere, horrelakoetan sartzen zarenean, badakizu dena bertan behera uzteko gogoa izango duzula uneren batean edo bestean, testuliburuetara eta eserlekuan denak zuri begira eta isilik egoten ziren momentu haietara bueltatzeko irrikaz egongo zaren une horiek etorriko zaizkizula: grabazioetan korridorean zarata eta besteen kexak, tripodea ez dago libre, pieza txiki bat galtzen da, kamera denok batera behar dugu, beste irakasgaiaren batean orduren bat galdu elkarrizketaren bat egitera joateko… Ez da erraza batzuetan hori guztia kudeatzea. Beste irakasleen kolaboraziorik gabe, adibidez, ezinezkoa litzateke hau guztia; beraz, eskerrak eman nahi dizkiet lankideei erakutsitako pazientziagatik eta eskainitako laguntzagatik.

Egongo da denbora balorazio sakonagoetan murgiltzeko. Oraingoz, gure asmoa da, gaurtik hasita, proiektu guztiak argitaratzen joatea pixkanaka-pixkanaka eta abenduaren 3rako amaitzea. Horixe litzateke, besteak beste, gure aurtengo ekarria Euskararen Nazioarteko Egunari begira.

Amaitzeko, zorionak eman nahi dizkiet ikasleei egin dituzten ekarpenengatik. Emaitzak kaskarrak, onak, hobeak edo apartak izanda ere , badago, nire ustean, hori baino garrantzitsuago den zerbait: euskararen aldeko jarrera aktiboa. Eta horretan, zalantzarik ez izan, bikain ibili dira denak.

 

Comments { 20 }

Euskaljakintza berritua abian da

Iazko ikasturtean euskaljakintzan ibili zinetenok dakizuen bezala, arazo ugari izan genituen urtean zehar: birusak, zerbitzariarekin gorabeherak… Gauza bat eta bestea zela, askotan ezin zen bertako edukia kontsultatu, eta geu ere nahiko larri ibili ginen  gure artikuluak, elkarrizketak eta ariketak, besteak beste, argitaratzeko.

Horrela gauzak, gure eduki guztiak beste blog batera migratzea eta zerotik hastea erabaki genuen. Horretan ibili gara uda osoan eta, antza denez, berriz ere abian ipintzeko moduan gaude. Aldaketa aprobetxatu eta WordPressek eskaintzen dizkigun aukera berriei etekina atera nahian, gure eduki guztiak berrantolatu ditugu. Horrela, orain arte blog eta gune ezberdin bilakatuta zeuden txoko guztiak -EGA, aditzak, Euskaltzaindiaren arauak… lantzeko blog eta guneak- euskaljakintzan integratuko ditugu pixkanaka-pixkanaka hemendik aurrera. EGArekin hasi gara; izan ere, aurtengo 2. deialdia berehala izango baita. Atal batzuk osatzeke badaude ere (EGA azterketa eredu berriak digitalizatzeko baimenaren zain gaude), nagusienak jada kontsultagai dituzue.

Irudian ikus dezakezuen legez, menu nagusian topatuko dituzue guztiak.

 

Ilusio eta gogo handiz ekingo diogu, beraz, ikasturteari. Esan behar dugu ia dena prest daukagula euskaljakintza 8koek (azkar esaten da, baina aurtengoa euskaljakintzaren 8. taldea izango da) aurrekoen lekukoa har dezaten. Dena den, horren aurretik iazkoen lanei lekua egingo diegu, arestian aipatu dugun bezala, ekoizpen ugari argitaratu gabe geratu baitziren arazoak zirela eta.

Bestalde, dena aldatu behar izan dugunez, gerta liteke esteka batzuk ez ibiltzea edo bestelakorik topatzea. Horregatik, asko eskertuke genizueke horrelakoen berri ematea.

Amaitzeko, eskerrak ematea baino ez. Alde batetik, zuei, iaz izan zenuten pazientziagatik. Bestetik, migrazio eta beste lanetan buru-belarri ibili den Talaios enpresa jaio berriari (analisia eta estrategia, prestakuntza eta ahalduntzea, tresnak eta garapenak egiten dituen aholkularitza teknologiko kooperatiba). Eta esker bereziak bertako Gorka Julio eta Unai Gorrotxategiri, emandako laguntza eta  egindako lan bikainagatik.

Euskaljakintza berrituaren ibilbidea hementxe hasten da. Ongi etorri gure txoko berrira! 🙂

 

Comments { 25 }
-->