Tag Archives | teknologia

Teknologia berrien aurrean, kontzientziarik bai?

By on 2013(e)ko urtarrilak 15 in arazoak, gizartea, teknologia
FlickrCC, karindalziel

FlickrCC, karindalziel

Zer sentiarazi dizu izenburuko estekako bideoak? Eta hurrengo datuak: “Osasunaren Erakunde Mundialak kalkulatzen duenez, munduko biztanleriaren lautik batek teknologiaren gehiegizko erabilerarekin arazoak dauzka”. Ez al zaizu hotzikara ikaragarri handi bat barruraino sartzen? Teknologiarekiko menpekotasuna da bere izena, gure gizartearen izurritea.

Lehenik eta behin, azpimarratu beharra dago aurrerapen hauek guztiak aurrera pauso handia izan direla egungo gizartean. Internetek, beste elementu askoren artean, adibide modura, gauza ugari eskaintzen dizkigu: informazio iturri bikainak, mota guztietako hiztegiak, etxetik atera ezinik dagoen jendearentzat baliabideak, urruti dagoen norbaitekin kontaktuan jartzeko aukera, eta abar. Nolanahi ere, arlo honetan, denbora izanen da testigu. Baliabideak behar ez bezala erabiliz gero, denborarekin arazo larriak sortzen direla argi ikus dezakegu, hala nola, norbanakoaren kontrola galtzea, abstinentzia sindromea, bakoitzaren eginbeharrak alde batera uztea… beste askoren artean.

Arazo hau, nerabeen munduan ematen da batik bat. Gazteek lanak egiteko, lagunekin harremanetan jartzeko, musika entzuteko, sentimenduak adierazteko, argazkiak partekatzeko eta milaka gauza burutzeko erabiltzen dute ordenagailua, sakelako telefonoa, internet… Jokabide hauek, berez, ez dira kaltegarriak, pertsona guztiek behin eta berriz errepikatzen baitituzte; halere, hauetako baten esklabo bihurtzen zarenean, mendekotasun sozialaren besoetan erortzen ari zara. Zoritxarrez, Espainian egindako hainbat ikerketatan desestali den informazioaren arabera, patologia hau sendatzen dituzten zentroetan gero eta jende gehiago dago laguntza eske, internetaren eskupean daudela eta. Adibide modura, Bartzelonako Hospital Clinic eta Hospital San Joan de Déu-ko datuak dauzkagu. Bi ospitale hauetako argibideek diotenez, 2005etik online jokoen mende dagoen jendearen kontsultak asko igo dira. Gainera, 12 eta 25 urte bitartean kokatzen den Madrilgo biztanleriaren %15ek teknologia berriekin aferak dauzkala argitzen digute aipatutako ikerketa horiek.

FlickrCC, Visit Greenwich

FlickrCC, Visit Greenwich

Beraz, zera esan dezakegu: teknologia berriek, ondo erabiliz gero, era aberasgarri batean bete dezakete gure bizitza; gaizki erabiliz gero, ordea, menpekotasun psikologiko baten menpe erortzeko arriskuan egon gaitezke; gizartearentzat aurrerapausoa dena, gure munduarentzat atzerapauso bihurtuz.

Amaitzeko, hausnarketa modura, har ezazu zure teknologiarekiko harremana ebaluatzeko tarte bat. Jar ezazu abesti hau, egin ezazu teknologiarekiko menpekotasunaren testa eta, azkenik, ikus ezazu ondorengo bideoa. Saia gaitezen, bada, pixkanaka-pixkanaka teknologia berriak erreminta bezala era zuzenean erabiltzen, eta teknologiak dakarzkigun gaixotasun sozial, larri hauengandik aldentzen. Zoriontsuago izan eta bizitza guztiz gozatu nahi?

Comments { 0 }

Sortu zure jokoak Gaurko Hitza plataforman

By on 2012(e)ko abenduak 19 in euskara, hitz-jokoak, teknologia, tutorialak
Gaurko hitza plataforma

Gaurko hitza plataforma

Plataforma berri bat dago denon eskura, atzotik aurrera, joko itxurako aukera anitzeko galdeketak sortzeko. Tresna hau bereziki irakasle eta ikasleentzat pentsatutakoa bada ere, edonork egin dezake kontua bertan eta jokoak sortu. Egitasmoa abian ipintzeko orduan, ondorengoak izan dira helburu nagusiak:

  • Irakasleek ikasleentzat ariketa moduko jokoak sortzea, gai bat errepasatzeko edo.
  • Adin bateko ikasleek ere gauza bera egitea, ikasleak sortzaile eta, aldi berean, irakasle bihurtuz. Gainera, sortzen dituzten jokoak Tuenti, Twitter edo nahiago duten sareetan parteka ditzakete. Horrela, euren lagun, guraso, irakasle edo nornahiri jokatzeko aukera eman diezaiekete.
  • Interneteko euskarazko edukiak areagotzea.

Esan behar da plataforma Forma 3.0 enpresak -duela gutxi arte Ihardun- garatutakoa dela eta HPSk diruz lagundua. Adibide honetan ikus dezakezuen bezala, test moduko joko edo ariketak sortzeko aukera ematen du, eta sortutakoa sare sozial ezberdinetan partekatzeaz gain (Tuenti, Twitter, Facebook eta Google+), korreoz ere bidali ahal izango da. Azken aukera, irakasle edota ikasleentzat interesgarria izan daitekeena, ‘enbotatu’ edo nork bere web orrian, gelako zein ikastetxeko blogean txertatzearena da.

Joko bat egin nahi duenak plataforman alta eman eta 15 galdera sortu beharko ditu. Nahi adina joko sortzeko aukera izango du erabiltzaile orok eta sortutako guztiak bere profilean gordeta geratuko zaizkio. Erabiltzaile ezberdinei jarraitzeko aukera ere egongo da. Eman beharreko urrats guztiak ondorengo bideotutorialean ikus ditzakezue (hementxe jarraibideak idatzita).

Gonbidatuta zaudete zuen jokoak bertan sortzera!

Comments { 0 }

“Roomba”, XXI. mendeko mirabea

By on 2011(e)ko maiatzak 30 in arazoak, gizartea, teknologia

Nori ez zaio inoiz gertatu larunbat goizean jaiki eta etxea nahaspila batean edukitzea? Astean zehar pilatutako zikinkeria jaso beharrak nekatzen gaitu, eta are gehiago aste osoa lanean eman badugu etxetik kanpo. Egia esan, nire etxean maiz gertatzen zaigu, eta horregatik konponbide baten bila abiatu gara. Topatu ere bai! Hementxe dago: Roomba.

Hasteko, esan beharra dago, etxea garbi mantentzeko, egunero zaindu behar dela eta garbi mantendu; azken finean, bertan bizi gara eta ez litzateke batere atsegina izango garbitzen ez den etxe batean bizitzea. Baina zer gertatzen zaie etxetik kanpo lan egiten duten guztiei? Etxea egunero garbitzeko astirik ez dute! Zein konponbidetara jo behar dute? Gaur egun, neskameak edukitzea ez da ohikoa, eta, balitz, edukitzeak dirua izatea eskatuko liguke hari ordaintzeko. Alferreko gastua izango zen.

Gure erantzuna teknologian dugu. Teknologiaren bilakaera azkarrak era guztietako abantailak ekarri dizkugu etxera, baita garbitzeko laguntzari dagokionez ere. Eta horra hor Roomba robota, XXI. mendeko zerbitzaria. Teknologiak eskaintzen dizkigun aurrerapenekin gure etxeko egongela ordu batzuetan garbirik izandezakegu hatz bat altxatu gabe.

Asko dira robot txiki honek eskaintzen dizkigun abantailak: denbora aurreztu, gure denbora libreaz gozatzko aukera eman, etxeko garbiketarengatik ahaztu… Horiek guztiek gure bizitza hobetzen laguntzen digute! Eta hona iritsi nahi nuen. Gure bizitza hain azkar aldatzen ari da, non egunero jasaten ditugun aldaketa ugari. Egun, abiadura bizian aldatzen dira gauzak eta aldaketa horietako askok gure bizitza kalitatea areagotzeko balio dute. Adibide garbia Roomba robot hau litzateke.

Muturreraino iristen ari gara; izan ere, gure zama izan beharreko guztia beste baliabideen bidez ukatzen dugu, eta guk sortutako baliabide horien menpe bizitzera ohitzen ari gara. Menpekotasuna gero eta handiagoa da, ezin gara bizi aurrerapen teknologikorik gabe. Zoritxarrez, historian ikusi denez, menpekotasunak galera dakar.

Egia da Roomba bezalako aurrerapen teknologikoak onartzen ditugula eta haietaz baliatzen garela gure bizitza errazagoa egitearren. Alde horretatik, sekulako abantaila suposatzen du. Nik ere gustuko dut arazoei konponbidea ematen lehenengoak garen idea. Gure jakinduria arazoak konpontzeko erabiltzea oso ondo dago; halere, arazoak konpontzeko dugun erraztasun berberarekin jakin beharko genuke gure burua neurtzen.

Bestalde, ez dago dudarik ageriko aurrerapen hauek ingurumenean eragozpen handia sortzen dutela. Sortzen duten kutsaduraz gain, denborak aurrera egin ahala, baliorik gabeko “traste” bilakatzen baitira.

Hortaz, esanak esan, ez dago dudarik Roomba robot garbitzaile bezalako aurrerapenak etxea garbitzearen arazoa konpontzeko baliabide azkar eta eraginkorrak direla. Dena den, pixka bat pentsatuz gero, ohartuko gara konponbide bakarra gu geu garela; beraz, etxea larunbatero garbitu behar badugu, soluzio onena animaturik garbitzea da.

Comments { 0 }
-->