‘Argiak’ Ken Zazpiren lan berria

By on 2008(e)ko urtarrilak 13 in musika

Ken zazpi1Aurreko batean, irratia entzuten ari nintzela, Ken Zazpi taldearen abesti berria entzuteko aukera izan nuen. Harritu egin ninduen abesti berriak, aurreko lanetatik zerbait ezberdina baitzen. Asko gustatu zitzaidan eta horregatik lan berriari buruz informazio gehiago bilatzeari ekin nion.

Ken zazpi 1996. urtean, Gernikan, sortu zen taldea da. Dena den, ez ziren serio hasi 2000. urtera arte. Urte horretan, maketa bat grabatu zuten eta hortik aurrera hasi zen Ken Zapiren ibilbidea. 2001. urteko maiatzean lehen lana argitaratu zuten, ‘Atzo da bihar’ izenekoa. Lehen diskoarekin izandako arrakastaren ondoren, 2003. urteko apirilean, ‘Bidean’ lana aurkeztu zuten eta honekin marka guztiak hautsi zituzten. Bi urte beranduago, disko akustiko bat argitaratu zuten ‘Gelditu denbora’ izenekoa. Hainbat kontzertu eman zituzten Euskal Herria eta Katalunian. Taldekideak Jon Mikel Arronategi, Eñaut Elorrieta (Ahotsa eta gitarra), Igor Artzanegi (baxua), Beñat Serna (gitarra), Iñaki Zabaleta (trikitia eta teklatua) eta Jon Fresko (bateria) dira.

Orain Argiak izeneko lan berri batekin datoz. Denbora luzea eman dute lan hau prestatzen eta ez dute edonolako disko bat prestatu nahi izan. Aurrekoekin alderatuz, heldutasun handiagoko abestiak dakarzkigute eta aurreko lan bakoitzetik zerbait hartu dutela aitortu dute. Izan ere, Gelditu denbora disko akustikoak, soinu ezberdinak nahasteko aukera eman zien eta gauza berriak egin zitzaketela konturatu ziren. ‘Argiak’ disko hau eboluzio bat izan da, soinu berriak sartu eta nahastu baitituzte. Lan berri honekin gauzak aldatu badituzte ere, %100 Ken zapi izaten jarraitzen dutela diote.

Ken zazpiren lan berri honetan, musika munduko jende askorekin lan egindako Rafa Sardina ekoizleak hartu du parte. Taldekideek diotenez, eragin handia izan du Rafak diskoan, beste ikuspuntu bat eman duelako eta bere esperientziak islatu dituelako bertan.

Ken Zazpikoek Rafa Sardinarekin

Disko hau grabatzeko Los Angelesera bidaiatu dute eta esperientzia izugarria izan dela esan dute taldekideek. Maila handiko musikariekin batera egotea izugarria dela aitortu dute eta estudio, areto eta kafe antzoki izugarriez gozatzeko aukera izan dute bertan igaro dituzten hamar egunetan. Bertan disko guztia osatu eta Sardinaren laguntzaz borobildu egin dute.

Azken finean, disko osatu eta landu batekin dator Ken zazpi taldea, doinu berri eta kantu sakonekin. Aurreko lanetako maila bikaina jarraitu eta hobetu dutela iruditzen zait eta egin duten lan guztiaren emaitza benetan ederra da. Pertsonalki gomendatzen dizuet benetan ongi egindako lan bat baita. Hementxe uzten dizuet lehenengo singlearen bideoklipa. Goza ezazue!

[kml_flashembed movie="http://www.youtube.com/v/PYoOh3E0PXo" width="425" height="350" wmode="transparent" /]

Hurrengo batean itzuliko naiz euskaljakintzara artikulu gehiagorekin. Ordura arte, izan untsa!

Comments { 3 }

EUSKAL HERRIA, EUSKARAREN HERRIA…

By on 2008(e)ko urtarrilak 10 in euskara

Basque_Country_location_map.pngDuela aste gutxi ospatu dugu Euskararen Eguna, abenduaren 3an, hain justu. Hau da ofizialki euskararen inguruko hausnarketarako eguna, gure hizkuntzaren bertuteak aldarrikatzeko aukera ematen digun eguna. Dena den, ez dugu ahaztu behar euskara momenturo dagoela gure artean eta, ondorioz, abenduaren 3a ez dela kinka larrian dagoen hizkuntza honen gogoetarako egun bakarra. Horregatik, urteko egun guztiek izan behar lukete euskararen eguna, euskaldunak garelako! Zoritxarrez, baina, halako egunen beharra badugu oraindik ere, euskararen egoeraz ohar gaitezen.

Antzinate zaharrenetik hasita, hizkuntzaren historialariek “Euskal Herria” bezala aipatu ohi den honetan euskaldunen herria eta hizkuntza elkarrekin ikusi izan dituzte. Etniaren hizkuntza propiotzat hartu izan da euskara, gu batzen gaituzten gauza guztien gainetik, euskaldunon oinarri.
Hizkuntza minorizatua da eta horretan eragin zuzena du bere inguruak. Euskal Herria nazio oso txikia dugu, bi estatu indartsuren artean kokatua. Frantzia eta Espainia, frantsesa eta espainola, elementu hauek dira euskara eta Euskal Herria zapaltzen, indargabetzen, ahultzen dutenak. Euskal Herri osoan hizkuntzak nazionala, ofiziala eta lehentasunezkoa izan behar du, Espainiako eta Frantziako estatuen jazarpenik jasan beharrik gabe. Euskal Herria euskalduntzeko, ezinbestekoa da euskarak eskubide berdintasunean “lehiatu” ahal izatea, beste estatuek gaztelaniarentzat eta frantsesarentzat eskatzen dituzten bermeak ukatzen baitizkiote euskarari bere lurraldean. Hizkuntzen erabilera soziala hizkuntza politikaren ondorioa da, hizkuntza politikaren oinarria ofizialtasuna da, eta ofizialtasunaren euskarria legea.

Mundua hizkuntza askoren bizitokia izan da mendeetan zehar, nahiz eta gaur egun horietako asko desagertuta egon. Baina hizkuntzak hiltzea ez da halabeharrak nahitaez dakarren gertaera bat; aitzitik, galbidean jartzen duten arrazoiak aldakorrak dira. Jose Antonio Artzeren hitzek dioten modura, “Hizkuntza bat ez da galtzen ez dakitenek ikasten ez dutelako, dakitenek hitz egiten ez dutelako baizik”. Askotan euskaldunok geure buruari leporatu izan diogu guk ez dugula gure hizkuntza nahikoa erabiltzen, litekeena dela gure utzikeriak euskara dagoen lekura eramatea. Hori izan da erabilpena lehentasunezko ardatz gisa hartzera bultzatu gaituena, beste esparruei behar adina garrantzi eman barik, baina esaterako… zein aukera du pertsona batek euskaraz lan egiteko lanbide horren prestaketa osoa erdaraz egitera behartu badute? Nola mintzatuko da herritar bat euskaraz administrazioko funtzionario batekin, sendagilearekin, postariarekin… hauek ez dakitenean? Bistakoa da anitz garrantzitsua dela euskaraz dakiten horien erabilpena, baina ezinbestekoa da ez dakiten horiek ere ikastea. Tamalgarriena ikasteko beharrik ez sentitzea da, herri honetako jatorrizko hizkuntzaren jabe izateko gogorik ez izatea.

Euskal herritarrok eskubidea dugu euskara Euskal Herriko hizkuntza ofizial bakarra izan dadin, Europako estatuen hogei hizkuntza ofizialek duten pareko ofizialtasunarekin. Hizkuntz politika berriak aintzat hartu behar ditu tokian tokiko baldintza soziolinguistikoak eta beharrezko progresioa bermatu. Asmo hau betetzen bada, Euskal Herria euskal giroan biziko da eta batzuei iruditzen ez bazaie ere, mesedegarria izango da, bai gure herriarentzat, baita gure inguruarentzat ere.

Euskararen egoera hobetu nahi dugunok badugu amets bat, ametsa baino harantzago iristea nahiko genukeena, fikzio izatetik etorkizuneko errealitate izatera iristeko desioa. Edozer egiteko prest gaude hala izan dadin, zenbait egitasmo, erakunde… sortuz, euskararen erabilera sustatzeko. Hezkuntzari dagokionez, Ikastolen Elkartearen festa (Gipuzkoako kasuan kilometroak) eta euskal eskola publikoen jaia. Bestetik, AEK euskaltegiak antolatzen duen Korrikaren festa, Bai Euskarari izenez ezagutzen dugun hizkuntza kontseilua… eta baita hain garrantzitsua den norbanakoaren lana ere, euskaljakintza webgune hau gertueneko adibidea dugula. Ezin esan genezake, beraz, besoak gurutzatuta geratzen garenik gure herriaren hizkuntza den honen galtzeko arriskuaren aurrean.

Azken hamarkadetako menpeko politikaren ezinetik hizkuntza politika berrira jo beharra daukagu, Euskal Herria Estatu euskaldun bilakatu, euskararen garrantzia eta beharra aldarrikatu, pausoak eman, aldarrikapenetik beharrera igaro. Eleaniztasuna bultzatu, inguruko hizkuntzak errespetatu, baina geurea den hori beharrezko bilakatu, behar hori gune orotara zabaldu. Hizkuntza bat hil ez dadin, beharrezko ditu hiztunak eta horretarako ez da aski dakitenek hitz egitea, ez dakitenek ere ikasi beharra dute, hiztun kopuruak gora egin dezan, Euskal Herria euskal hiztunez bete dadin, erabilpenera bultzatuz, era horretan Euskal Herria euskaldun bilakatuz. Guztion borroka da, guztion esku dago, guztiok erein beharreko hazia da, etorkizunean euskal fruiturik jaso nahi badugu, etorkizunean Euskal Herri euskaldun bat nahi badugu.

Jon Maiari duela hilabete batzuk egin nion elkarrizketa probestuz, hona hemen euskararen inguruan botatako bertsoa:

Comments { 1 }

Zu ere EGA prestatzen?

By on 2008(e)ko urtarrilak 8 in EGA

EGA azterketakAskotan etortzen zaizkit ikasle ohiak esanez, bere garaian atera ez eta berriz ere EGA gainditu nahian edo beharrean dabiltzala. Gehienetan, agiria lanari begira atera nahi dute eta duela gutxi ikastolatik irtendako ikasleak izan ohi dira. Opor hauetan, dena den, nire lehenengo promozioetako ikasle batekin topo egiteak izugarri poztu ninduen. Besteak beste, esan zidan berak ez duela agiria behar baina penatan dagoela ez zuelako atera. Beste saiakera bat egiteko prest zegoela kontatu eta ea nondik has zitekeen galdetu zidan.

Lehen, horrelako kasuetan, fotokopia mordo bat ematen nizkien. Gaur egun, helbide pare bat eta listo! Zorionez, teknologia berri hauekin gauzak erabat aldatu dira. Baita EGA kontuetan ere! Sarean, klik batera, azterketak (berehalako zuzenketa eta guzti) eta gune interesgarri mordo bat topa ditzakegu zalantzak argitu nahiz zailtasunei aurre egiteko. Hori bai, komeni da beti irakasle bat ez oso urruti izatea sortzen diren kezkei buruz hitz egiteko, arazoak identifikatzeko… eta nire ikasle ohiek badakite ni hemen nagoela. 🙂

Baina gatozen harira. Nonbaitetik hasi behar denez, ondorengo urratsak jarrai ditzazun aholkatzen dizut:

  1. Ezer baino lehen, azken urte hauetako azterketak egin. Proba ezberdinetan lortutako emaitzak aztertu ondoren, bereziki landu beharko dituzunak identifikatu.
  2. Arazotsuak gerta dakizkizukeen proba horiek sakontasunez jorratu. Horretarako hona jo besterik ez duzu. Bertan, EGA atalez atal lantzeko material mordoa topatuko duzu. Horretaz gain, azterketari buruzko jakingarriak, baliabide orokor mordoa eta esteka interesgarriak aurkituko dituzu. Ez daukazu hor dagoen guztia egin beharrik, noski. Praktikoa izan: eskaini denbora benetan merezi duenari.
  3. Horiek guztiak egiten dituzun bitartean, Euskaltzaindiaren arauak ezagutzeko/errepasatzeko ikastaro hau egin (orokorrean, 5 minutu inguru baino ez dira behar arau bakoitza ezagutzeko). Urrats hau ezinbestekoa izango da, zu bezala, urte batzuk euskara landu gabe egondako edonorentzat; izan ere, arauak ondo menperatzea EGA gainditzeko pauso garrantzitsuenetako bat izan baitaiteke.

Hurrengo deialdia noiz eta non izango den eta horri buruzko informazio guztia jasotzeko, egin klik hemen. Eta, ez zaitudanez gehiegi nahastu nahi, oraingoz hauxe da guztia. Zure aurrerapenen berri emango didazu, ezta? 😉

Amaitzeko, badakit zuetako askok egun hauetan gogor ekingo diozuela EGA prestatzeari; beraz, zuentzat ere badoaz aurreko aholkuak eta, horietaz gain, zaku bete animo.

Comments { 11 }
-->