Iritsi da aurten ere Euskararen Nazioarteko Eguna eta guk, abenduaren hirua egiten duen honetarako, hainbat egitasmo prestatu dugu. Horietako bat gaur astebete hasi genuen hitz-katea izan da. Esan beharrean gaude ustekabekoa izan dela zuengandik jasotako erantzuna, ohore izugarria. 100 iruzkindik gora izan ditugu eta bihotzez eskertzen dizuegu gurekin bat egin izana!

Alabaina, ez genuke, inola ere, gure euskara abenduaren 3ra edo aurreko astera mugatzen dela pentsatzerik nahi. Euskara da gure hizkuntza, nortasuna; euskara da gure kulturaren oinarria. Ospatze egun honetan gure harri-koskorra jarri nahi izan badugu ere, gure benetako xedea urte osoan zehar, gure apaltasunetik, euskararen zabalkundea bultzatzen saiatzea da. Nork bere harri-koskorra ekarriz, denon artean hainbeste maite dugun hizkuntzaren alde gauza handiak egin ditzakegulako uste sendoa dugu, eta guk mezu hori zabaldu nahi genuke.

Gaurko sorpresatxo bat prestatu nahi izan dizuegu. Gogoz eta, batez ere, umorez aritu gara; asmo edo borondaterik onenarekin. Emaitza halakoxea izan bada ere, zuon gustukoa izatea espero dugu: ZABALDU EUSKARA!

Entzun a cappella bertsioa:

Aiba zeatik ez (x 7)
gurea da ta!

Bakarra da-da, altxorra da-ta
goazen babestera.
Maitatzekin-kin nahikoa ez ta
hobe hitz eitea.
Tabernetan-tan, kaleetan-tan
eta edozein lekutan.
Hitzeiteko-ko, ligatzeko-ko
ta ondo pasatzeko.

Ez badeu erabiltzen galdu egingo da,
kulturaren oinarria galdu egingo da,
euskaldunon nortasuna galdu egingo da,
ez badeu erabiltzen galdu egingo da.

Gaur zortzi ospatuko da Euskararen Nazioarteko Eguna. Aurtengoan ere, egun hau ahalik eta ederrena izateko, euskaljakintzakook gure harri-koskorra jartzen saiatuko gara. Horretarako, hainbat ekimen prestatu badugu ere, gaur bertan hasi eta abenduaren 3an amaituko dugun honetan zuon laguntza beharrezkoa izango zaigu. Hizkuntzarekin hitz-kate luze bat egitea da gure asmoa. Hitz-kateak guretzat sinbolizatzen du euskarak denon arteko harremana, lotura, behar duela; norbanakook egin ditzakegun ekarpen xumeekin gauza asko lor daitezkeela.

Erronka katea abenduaren 3ra arte mantentzea izango da. Guk jarriko dugu lehenengo hitza, eta amaitzen den silabaz hasten den hitz bat jarri beharko duzue zuek. Lan horretan, ordea, euskarak katea eteterainoko arazoak eman ditzake hainbat hitzekin. Hori saihesteko, eta kasu horietan baino ez, aurretik eman den hitzarekin lotura semantikoa duten hitzak onartuko dira. Adibidez,  euskara hitzaren jarraipena, amaieran -ra silaba duenez,  hasieran silaba horixe duen hitz bat izango litzateke. Hori ezinezkoa da, ez baitago euskaraz silaba horrekin hasiko den hitzik. Kasu horietan, esanahi aldetik aurrekoarekin lotura duen hitz bat onartuko genuke (hizkuntza, euskaldun…).

Izugarri eskertuko genuke zuon parte-hartzea. Ez dugu nahi ekimena ikastolara mugatzea, kanpokoek ere esku-hartzea gustatuko litzaiguke. Hitz bat pentsatu eta uzteko tartea besterik ez dugu eskatzen.

Euskara maite eta lau haizeetara zabaldu nahi dugunez, zabaldu hitza izango da kateari hasiera emango dion hitza. Ea zer lortzeko gai garen!