Warning: Creating default object from empty value in /home/berria/berria.euskaljakintza.com/wp-content/themes/canvas/functions/admin-hooks.php on line 160
Tag Archives | osasuna

Noraino iritsiko zinateke dirua irabazteko?

FlickrCC, by trustypics

FlickrCC, by trustypics

Krisi ekonomikoa alde guztietara zabalduta dago azken urteetan. Ondorioak ez dira langabezian bakarrik ikusten, baita osasunean ere. Ez naiz estresaz ari. Dirua lortzeko jendeak proba zientifikoetan parte hartzen du, askotan beraien osasuna arriskuan jarriz. Baina honen kasurik larriena etengabe hazten doan organoen trafikoa da.

Hasteko, arrazoi batzuk aipatuko ditut jendeak organo trafikoan sartzeko. Organoen komertzioa organoen salerosketa da. Egoera hau pertsona aberats eta pertsona behartsu baten artean eman daiteke. Alde batetik, aberatsak bizitzen jarraitzeko irtenbide bakarra du, organoaren transplantea; eta bestetik, behartsuak dirua behar duenez gero, edozer gauza egiteko prest ikusten du bere burua diru pixka baten truke, kasu honetan bere organoak saltzera iritsiz. Komertzio hau jende aberatsa eta oso behartsuak elkarrekin bizi diren herrialdeetan ematen da normalean. Denok dakigu giltzurrun batekin ondo bizi gaitezkeela. Horregatik, bestea saltzen badugu muturreko egoera batean, dirua irabaz dezakegu. Gehiegi pentsatu gabe baiezkoa ematea, diruaren beharrak eraginda, hainbat tokitan nahiko zabaldua dago:. Kasu horretan, kontuan izan behar da maiz ebakuntzen baldintza higienikoak txarrak izaten direla eta gaixotasunak har ditzakezula.

Nolanahi ere, saleroste honetaz gain, bada beste praktika bat areagotzen ari dena: organo lapurreta. Organo trafikanteak drogaren menpean uzten zaitu, organoa kentzen dizute eta hurrengo egunean ez zara ezertaz gogoratzen. Trikimailuak ere erabiltzen dituzte pertsonen organoak lortzeko eta, ondoren, merkatu beltzean prezio altu batean saltzeko. Aipatu behar da, normalean, organo batek 10.000 eurotik gorako prezioa duela (organoaren baitan, noski). Egun, transplante mordoa egiten da: giltzurrunekoa, bihotzekoa, biriketakoa, pankreasekoa

Laburbilduz, zera esan dezakegu: kontuz ibili beharra dago horrelako gauzekin. Organoen komertzioa ekidin daiteke bizitzeko baldintzak  hobetuz eta aberats eta pobreen arteko aldea murriztuz, gehienbat osasunari dagokionez. Horretaz gain, neurri prebentiboak ezarri beharko lirateke, eta arazoari buruzko informazio gehiago eman, gaur egungoa eskasa baita. Ondo pentsatu behar dugu diruagatik gure osasuna arriskuan jartzea merezi duen ala ez, arriskua beti hor dago eta.

Amaitzeko, “Run Of Her LIfe” filma gomendatu nahi dizuet. Bertan garbi ikusten da organoen trafikoa.

Comments { 0 }

Bi hitz baino ez: “Déjà vu ”

Déjà vu (FlickrCC,  illuminaut)

Déjà vu (FlickrCC, illuminaut)

Erabat ziur nago, noizbait bizi izan duzula egoera edo esperientzia bat, non egoera hura lehenago bizi izan duzun irudipen bitxi bat eragin dizun. Bi hitz baino ez: DÉJÀ VU. Momentu batean nahasita gelditzen zara, gertatu behar denari itxaroten bezala, zer gertatuko ote den asmatu edo gogoratu nahian sarritan.

Aspaldidanik nire buruan jirabiraka zebilen gaia da Déjà Vu delakoarena. Egia esan, ez nekien asko fenomeno honi buruz, baina aurrekoan izandako esperientzia nahasi batek gaiari buruz jakin-mina piztu zidan.

Lagunekin parrandan nenbilen, eta petril batean eseri ginen une batez. Bat-batean edaten ari zen lagun batek hura zer zen galdetu zion beste bati. Orduan erabat aztoratuta geratu nintzen, eta Déjà Vu bat bizitzen ari nintzela ohartu nintzen.

Entziklopedia eta informazio iturri ohikoetara bisitatxo bat egin dut ea zer edo zer zioten gaiaren inguruan, baina ezer gutxi topatu dut…  Gehiengoak arrazoi zientifikoetan oinarritzen dira, gure pertzepzioa nahasten duen garunaren alterazio bat dela esanez. Beste batzuk, ordea, ez datoz ikerketa zientifikoekin bat eta “ametsen memoria” dela diote. Argi dagoena da gertakari paranormal honen misterioa ez dela kontu berria; izan ere, antzinako Greziar Filosofoek jada fenomeno honen inguruan idazten hasiak baitziren.

Dena dela, gaur egun indar gehien duen teoria zientziak eman digu. Adituek diote fenomenoa gertatzerakoan garunak lapsus moduko bat izaten duela, pertzibitutako
informazioa zati inkontzienteak soilik bereganatuz; horrela, segundo frakzio bateko lapsus horren ondoren, zati kontzienteak informazioa bereganatzen du, baina informazio hori jada garunean inkontzienteki gordeta dagoenez, lehenago bizi izan
dugun esperientzia bat bizitzen ari garela iruditzen zaigu.

Ulertzen zaila den fenomeno hau hobeto ezagut dezazuen, hemen uzten dizuet bideo hau:

Hala ere, nire bizipen pertsonaletan oinarrituta, ziur nago fenomeno esanguratsu honek  bestelako misterioren bat gordetzen duela eta, aurrerantzean, Déjà Vu bat izaten dudanean, misterio hori argitzen ahaleginduko naiz.

Comments { 0 }

Gaur zugatik eta bihar nigatik

odola (FlickrCC, Abhishek Jacob)

Odola zain eta arterietatik barrena doan eta gizabanakoaren organismoan behar-beharrezkoa den likido gorria da, eginkizun garrantzitsuak betetzen dituena hainbat arlotan. Elikagaiak edota oxigenoa garraiatzen ditu gure organismoan zehar beste eginkizun askoren artean eta beharrezkoa dugu bizi ahal izateko. Hori horrela izanik, edozein egunetan, zoritxarrez, gure inguruko edonori gerta lekioke odolaren beharra izatea, edota geuk izatea behar hori. Gogoz hartuko genukeela, iruditzen zait, edonorena bi aldiz pentsatu gabe, premia izango bagenu. Baina zer gertatuko litzateke odol hori eskuratzeko aukera izango ez bagenu, odol-emaile gutxi daudelako? Eta zer, gure bizia arriskuan egongo balitz? Egoera honetan jartzen dut sarritan neure burua, eta ohartzen naiz oso garrantzitsua dela odol-emaile izatea. Gaur zugatik, bihar nigatik.

Ildo beretik, noizean behin odola emanez jende asko lagundu dezakezula jakitea harro egoteko modukoa dela iruditzen zait. Hori oso garrantzitsua izan daiteke norbanakoarentzat. Hamar minutu besterik ez dira, eta, ahalegin hori eginez, bizi bat salba daitekeela jakite hutsak ulertarazten dit zein garrantzitsua den emaile izatea.

Sarean informazio bila nenbilela jakin dut abesti bat egin dutela Argentinan, odol-emaile izatearen arrazoi esanguratsuenak adieraziz. Interesgarria iruditu zait abestiarekin helarazi nahi duten mezua, jendea odol-emaile izatera bultzatzen baitute:

“Donar es dar la vida, es dar amor, es la salida, es un comienzo para que estemos mejor”.

Kontua da honetan lanean ari direnek aspaldi iragarri dutela jende gehiagoren beharra dagoela, hau da, jende gehiagoren borondatea edo nahimena behar dutela odola emateko garaian. Jende berriaren premia dute; izan ere, adin batetik aurrera odola eman ezinik geratzen dira asko eta asko gaixotasun ezberdinengatik, horrela emaile kopurua jaitsiz.

Egin zaitez odol-emaile (FlickrCC, _Matt_T_)

Zoritxarrez, asko daude emaile izan nahi luketenak eta arrazoi ezberdinengatik, gaixotasunen bat dela medio, ezin dutenak.

Jende askoren aitzakia da izua; halere, nire ustez, ezinak ez du legerik. Ez horixe! Beldurrak gainditu behar ditugu, laguntza handia eman dezakegulako eta oso garrantzitsua izan daitekeelako askorentzat. Egia esan, ni horrelako gauzetarako ez naiz batere ausarta; nolanahi ere, nire beldurrak gaindituz, egunen batean hurrengoa esan ahal izateko egoeran egongo naizen ustean nago:

“Odol-emaile naiz, zu zergatik ez?”

Comments { 5 }
-->