Archive | 2006

Arauak 8: aurrealde eta hau guztia.

By on 2006(e)ko abenduak 21 in arauak lantzen

Jakintza Gaurko saioan bi arau ezberdin azalduko dizkizuet: aurrealde eta hau guztia.

Nork ez du inoiz erabili honelakoren bat?

  • Taberna guzti haietan izan ginen edo lagun guzti haiekin joan ginen festaz festa.

Bada, inguru hauetan, behinik behin, oso sartua dago erabilera hau. Edo beste hau:

  • Aurrekaldean izan genituen liburu guztiak.

Erabilera okerrak dira guztiak, ordea! 🙂 Hauxe da horien inguruan Euskaltzaindiak erabakitakoa:

AURREALDE

Bi era desberdin hauetan idatz daitezke forma hauek:

  • Aurrealde edo aurreko alde,
  • Atzealde edo atzeko alde,
  • Goialde edo goiko alde,
  • Barnealde edo barneko alde, e.a.

Ez idatzi, ordea, aurrekalde, atzekalde, goikalde, barnekalde, e.a.

Honek ez du esan nahi horretarako tradizio mintzatua dagoenean aurrekoalde, atzeko alde formak aurrekalde eta atzekalde ebakitzea gaitzesten denik. Hots, hitz egiterakoan, aurrekalde edo atzekalde erabil daitezke.

Araua osorik.

HAU GUZ(T)IA

  • Hauek dira hobesten diren formak:
Hauek guztiak eta gauza hauek guztiak,

Hauetan guztietan, eta taberna hauetan guztietan, e.a.

  • Ontzat ematen dira hau guz(t)iau eta hori guz(t)iori bezalakoak ere.
  • Ez dira batasunerako egoki ikusten forma hauek: guzti hauek edo etxe guzti hauek, gizonau, e.a.

Araua osorik.

Comments { 3 }

JavaScript Kontsola

By on 2006(e)ko abenduak 20 in orokorra

Badira hilabeteak Internet Explorer eta Mozilla Firefox nabigatzaileak lehian dabiltzala. Mozillak askatutako nabigatzaile berriak arrakasta nabarmena izan du, batzuek motelagoa den esaten duten arren, konpainia informatikoek erabaki eta ezarritako CSS arauak betetzen baititu. Microsoftek, berriz, bere arau propioak erabiltzen jarraitu du.

Explorer VS FirefoxOndorio gisa, Explorerrentzat diseinatutako web orrialdeak akatsak izan ditzake Firefoxekin eta alderantziz. Hala ere, web orrialde eta blogak sortzeko erabilitako diseinu kode gehienak arau globalen arabera eginda daude. Hori dela eta, gero eta gehiago dira Internet Explorerrek gaizki interpretatzen dituen orrialdeak eta Mozilla Firefoxek arazorik gabe irakurtzen dituenak.

Bada, Mozilla Firefoxen alde JavaScript Kontsola aurkitu dut. Ez dakit Internet Explorerrek baduen edo ez baina nik ez nuen aurkitu (egia esan, ez nintzen bila eta bila ibili). “Tresnak” tresna-barran aurki daiteke, eta orrialdeek dituzten akatsak zuzentzeko balio du. CSS orrialdeetan dauden akatsak identifikatu, akats mota azaldu eta akatsa dagoen lerroa esaten dizu.

Ergelkeria irudi dezakeen arren, akats hauek zuzentzeak orrialdea kargatzean denbora aurrezteko baliagarria izateaz gain, egon daitezkeen akats bisualak aurkitzeko era oso erraza da. Eta akatsak nahigabe egitea oso komuna izan ohi da, besteak beste, nire blogean bi akats aurkitu nituen, euskaljakintzan sei eta Jakinsteinen hamabost. Baliteke akats hauek Explorerrek zuzentzat jotzea eta hari zuzenduta egotea; baina, hala ez bada, zuzentzeko aukera ematen digu.

Besterik gabe, euskal mundua sarera hedatzen ari zaretenoi eskerrak eman nahi dizkizuet eta, asko ez bada ere, era egokienean lortzeko lagun badezaket, hemen idatziko dut gomendioren bat.

Comments { 4 }

Aipamena Sustaturen 5. urteurrenean

By on 2006(e)ko abenduak 18 in jakintzako berriak

ospakizuneanJakin badakigu eskola batean denetik gertatu ohi dela. Batzuetan erabat goibelduta ibiltzen gara (egitasmoren bat aurrera ezin atera, emaitzak aurreikusitakora gerturatzen ez…); eta, besteetan, aldiz, pozez gainezka beste hainbat arrazoirengatik. Honelaxe gabiltza azken aldi honetan Jakintza Ikastolan, kontent egoteko arrazoiak ez baitzaizkigu falta. Azken biak dira jolausek aurtengo Euskaliteko Praktika Onetan lortutako saria (IKTeroetan horren berri zabala) eta Xabier Arañak Sustaturen 5. urteurrenean erdietsitako aipamena. Baina has gaitezen hasieratik.

Batzuek jakingo duzuen legez, lehengo asteazkenean, Sustaturen 5. urteurrena ospatu genuen Arrasaten. Hantxe izan ginen IKTerook (Jokin, Mikel eta ni) eta ederki pasa genuen! Ekitaldiaren gorabehera guztiak hemen, hemen , hemen eta hemen topa ditzakezue.

Kontua da, egun batzuk lehenago jakin genuela, urteurrena ospatzeko, blog mezuen lehiaketa egongo zela, besteak beste. Sarira azken egunetan euskaraz idatzitako mezuak aurkez zitezkeen. LuistxoHasieran, euskaljakintzatik ezer presentatzeko asmorik ez banuen ere, azken momentuan, jendea animatuz joan ahala, ni ere adoretu eta zuen mezuetatik hiru aukeratu nituen lehiaketan parte hartzeko: Eneritzen Hipokresiaren gizartea, Asierren Zoritxarraren zorionean eta Xabierren Perspektiba berri bat. Ez nituen hauek ausaz aukeratu, jakina. Denok dakizuen bezala, nik garrantzi handia ematen diot mezuetan gaiaren planteamentu eta garapenari. Beste nonbaiten irakurritakoaz idaztea ondo dago, baina, betiere, zuen ekarria hortxe utziz. Izugarri gustatzen zait, badakizue, zuek esateko daukazuena modu landu batean plazaratzen duzuenean, eta, horregatik, batik bat, hautatu nituen Asierren eta Eneritzen mezuak. Ea bigarren hiruhileko honetan horrelako asko ditugun argitaratzeko! 🙂

Xabierri dagokiolarik, ez daukat hitzik bere partaidetza eskertzeko. Jakina da idazteko duen gaitasuna baina ikastolatik kanpo, unibertsitatean erabat lanpetuta dagoela, gutaz gogoratzea eta bere burua beti laguntzeko prest azaltzea! Bada, atera kontuak…

Eta, egia esan, ez neukan ideiarik ere aipamenik egongo zenik eta, egonda ere, ez nuen uste zerrenda luze bezain interesgarri honetatik gure mezuren bat hautatua izango zenik. Hori da ezustekoa, saria banatzen hasi eta gure bloga hantxe pantailan agertu zenean, aurkezleak ondorengo hitzak esaten zituen bitartean:

Ordiziako Jakintza Ikastolako IKTeroek (ikateroek) blog bat baino gehiago, faktoria bat daukate. Eurak dira blogari eta ikasleak bihurtu dituzte blogari. Baita ikastola utzi ondoren ere. Horretako bat, unibertsitatean dabil orain arkitektura ikasten, eta blog mezu ederra idatzi die oraindik Jakintzan daudenei, beren datorren urteko ibilbidea aukeratzen lagunduko diena.

Zorionak, Xabi eta jarraitu zure txoko honetan idazten. Gonbidapena ikasle ohi guztiei zuzenduta dago, noski! Ea animatzen zareten zuen esperientzia berriak kontatzera, guk ere horietatik zertxobait ikas dezagun… Zorionak, berriz ere, Sustaturi eta mila esker gonbidapenagatik. Eta, nola ez! Zorionak Mikel Alvarez beasaindarrari, berak eraman baitzuen merezitako saria, 80 gigako iPoda, The Indezents blogean idatzitako mezu bategatik. Gomendarria zalantzarik gabe bere umorea. Zorionak, Mikel!

The Indezents blogean argitaratutako mezu barregarri batek irabazi du Sustatuk antolatutako blog mezuen lehiaketa. Epaimahaiak zenbait finalista izan ditu kontuan, eta azkenean hori nabarmendu. Egileak iPod bideo bat eraman du, 80 gigakoa. Beste bi blogarik, zozketan, iPod Nanoak eroan dituzte.

Hainbat hitzaldi interesgarriren ostean, ospakizunari amaiera emateko, pintxo goxo-goxoak jan genituen eta, handik irtendakoan, giro ezin hobean, beste blogari batzuekin ospakizunarekin jarraitu genuen Arrasaten zehar.

Amaitzeko, hementxe klikatuz, asteazkenean zuzenean ikusi genuen bideoa topatuko duzue. Bertan, Sustatukoek azken 5 urteetan izandako ibilbidearen berri ematen dute.

Comments { 2 }
-->