Archive | denetarik

Azken urte hauetan, Espainian (baita Euskal Herrian ere), atzerritarren kopurua nabarmen igo da, inmigrazioa deritzon mugimendua dela eta. Izan ere, asko dira, bizitza edota lan hobea bilatu nahian, iberiar penintsulara etortzen direnak.

Datuek diotenez, gaur egun, estatu osoan bizi garen 43,7 milioi biztanleetatik, 3 milioi, hau da, populazioaren % 8, kanpotarra da. Baina asko dira ere legez kanpo dauden pertsonak, aurreko ehunekoan azaltzen ez direnak, alegia.

Etorkin hauen artean, Afrikatik patera edo cayuco delakoetan etortzen direnak daude. Lehen aipatu bezala, pertsona hauentzat Espainiara etortzea paradisura joatea bezala da. Izan ere, Afrikan hemengo errealitatea beste bat dela uste duten arren, hona iristea lortzen duten gutxi horiek (asko eta asko itsasoan hiltzen dira), berehala konturatzen dira errealitate gordina erabat bestelakoa dela, guztiz desberdina gainera.

Iristen direnen artean, gehienak beraien herrialdeetara itzultzen dituzte beraien situazio ilegala dela eta. Horietaz gain, badaude beste batzuk, gazteak edota ume txikiekin etortzen diren emakumeak, esaterako, babes etxeetan zenbait denborarako geratzen direnak; baina gehienek euren ametsa guztiz apurtua ikusten dute hemengo egoeraz jabetzen direnean.

[kml_flashembed movie=”http://www.youtube.com/watch/v/LLIpTn2WWx4″ height=”450″ width=”450″/]

Bestalde, guztiz finkatuta eta lege barruan daudenak ditugu. Hauen artean, ugarienak dominikarrak, errumaniarrak eta ekuadortarrak dira. Etorkin hauek familia osoa ekartzen dute, eta behin beraien egoera legala konpontzen dutenean, hau da, paperak egiten dituztenean, lanean hasi eta euren herrialdeetatik ezberdina den egoera eta ingurugirora moldatzen dira, hemengo kulturara egokituz. Gutxi batzuk izan ezik, gehienek denbora gutxi behar izaten dute integratzeko.
Era berean, eskoletara joaten diren ume atzerritarren bertakotzea daukagu. Adibidez, Euskal Herriko ikastetxeetan gure hizkuntza beraiei irakastea desafio interesgarri bilakatu da.

Amaitzeko, adituek diotenez, azken hamarkadetan egon den etorkinen igoera honek onura ekarri dio iberiar penintsulari hainbat arlotatik begiratzen badugu. Ekonomia arloa izan daiteke horren adibiderik garbiena. Dudarik gabe, etorkin hauen eskulan merkeak, besteak beste, ekonomian egon den gorakada nabarmen hau gertatzea ahalbidetu du. Beste hainbat sektore ere indartu egin omen da fenomeno hau dela eta, igeltserotza, esaterako. Hitz gutxitan, beraiek, guk egiten ez ditugun lan horiek egin eta indartzen dituzte.

Euskaljakintzakook ere, Kilometroak 07ko antolakuntzarekin bat egin nahirik, gure txoko honetatik bihar Bergaran ospatuko den jaira hurbil zaitezten animatu nahi zaituztegu. Ondo pasatzeko aukera ziurtatuta dago (badirudi, gainera, euria ez dagoela gonbidatuen artean); beraz, zalantzarik ez izan eta, ahal dela garraio publikoa erabiliz, gerturatu Aranzadi ikastolak antolatutako festara!

Aurtengo edizioaren inguruko informazio guztia eskuratzeko, egin klik irudiaren gainean:

Ondo (eta txintxo) ibili! 🙂

Argi dago sexua tabu izan dela gure inguruan oraino. Hori dela eta, gaur egungo gizarteak tradizional samarra izaten jarraitzen du gai honen inguruan. Badago honi buruz lasai eta inolako aurreiritzirik gabe hitz egiten duenik, baita sexu heziketa egokia jaso duenik ere. Baina, hala eta guztiz ere, lotsa eta beldur denak ez dira galdu.

Sexuari buruzko informazioa lortzeko edo besterik gabe berriketan jarduteko, lau informazio-iturri multzo aipa ditzakegu:

Batetik, ikastetxea daukagu. Bertan, DBH amaiera baino lehen ez da ia ezer ere aipatzen, ez bada, ugalketa eta gorputzaren garapenari buruzko heziketa (6. maila inguruan). Gainera, gero eta heziera hobea jasotzen dugula esan ohi da; hau esanik, ordea, zenbait lekutan egin beharrekoak ahaztu egiten direla ematen du. Urteak aurrera egin ahala, DBH 3-4an aurkitzen gara. Gure kasuan, sexologian lizentziaturiko bat etorri zen aste pare batean klaseak ematera eta ezin esan esperientzia txarra izan zenik. Gurera etorritako sexologoa aparta izan arren (parte hartzeko jokoak eginez), gehienetan ez da lortzen horrelako konfiantza aditu batekiko. Beraz, entzun beharrekoak entzun, zer edo zer ikasi eta kito.

Bestetik, komunikabideak ditugu eta hauetariko bat telebista. Uka ezin daitekeena da, gaur egungo programazioa, gure guraso edo aiton-amonen garaikoarekin alderatuz, ez dagoela horrenbesteko kontrol eta zentsurapean. Horrez gain, homosexualitate, transexualitate eta beste zenbait kontzeptu pil-pilean daude, debate ugari egiten baitira hauei buruz. Denek ez dituzte onartzen baina hainbat kasutan berri eta arraroak iruditzen zaizkie sexu-identitateak edo termino hauek, gizarte atzerakoi eta itxi baten aurrean gauden seinale. Esate baterako, orain dela lau hilabete Polonian gertatutakoa daukagu. Gobernuko umeen eskubideen aldeko bozeramaile den Ewa Sowinskak Teletubbies telesailak, BBCk haurrentzat sorturikoa, homosexualitatea bultza dezakeela adierazi zuen eta ikertu egingo zutela. Nahaste hau guztia, bertako pertsonaia batek, familiako aita den Tinky-Winkyk, poltsa bat daramalako. A zer burugabekeria! Sortutako eztabaida ikusita, egun batzuen ostean, errektifikatu eta ez zela ikerketarik egongo baieztatu zuen.

Hurrengo multzoa osatzen dutenak, familia edo etxekoak kontsidera ditzakegu. Bi egoera ezberdin eta guztiz kontrajarriak egon daitezke familia arteko harremanetan: batzuek gertutasun handiz jardungo dute, beste guraso nahiz seme-alaba batzuek, ordea, ez dute jakingo nola aurrera egin sexuaz sekula aritu ez badira. Bigarren kasuan, nori ez zaio gertatu gazteagotan pelikula bat ikusten aritu, sexu eszena bat agertu eta lotsatzea? Edo gurasoek euren ustez barregarriak diren ateraldi xelebreak izatea eta zuk babuak direla pentsatzea? Anai-arreba zaharragoak izatea lagungarri izan daiteke, nire paradan daudenak ezin baliatu aukera honetaz.

Eta azkenik, lagun taldea geratzen zaigu. Adiskideen loturaren araberakoa izango da sexuaz hitz egiteko erraztasuna, hala ere, honi buruz gehien hitz egiten den esparrua da. Izan ere, bakoitzaren esperientzia, beldur eta dudak azaltzeko orduan, gazte gehienek koadrilako edo gertuko lagunengana jotzen baitute.

Ea, bada, lotsa hauek guztiak uxatzen ditugun eta gizarte aurrerakoiagoa bultzatzen dugun!

[kml_flashembed movie=”http://www.youtube.com/watch/v/NuiynIn-g9s” height=”450″ width=”375″ /]