Euskarazko Produktuen Katalogo berria zabalduko da aste honetan Ordizian

By on 2010(e)ko abenduak 12 in ebpn

Ondorengo mezua jaso dugu Ordiziako Udalako komunikazio teknikaria den Ana Irastortzarengandik. Zuen interesekoa izango delakoan, hementxe uzten dugu. Ea urte osoan zehar gure ingurukoei euskarazko ekoizpenak oparitzen dizkiegun!

Hurrengo egunotan banatuko dira 200.000 ale inguru Euskal Herri osoan

Urteko garai honetan seme-alabei edo ingurukoei euskarazko liburuak, musika edota bideoak erosi eta oparitzeko aukera paregabea izaten dela kontuan hartuz, Euskarazko Produktuen Katalogoaren edizio berria osatu dute, beste urte batez —aur­ten­goa 13.  edizioa da—, Euskal Herriko 105 udal eta man­ko­mu­nitatetako Euskara Zerbitzuk. Euskal Herriko hainbat lurraldetako teknikariak elkarlanean aritzen dira kata­logoa prestatzeko, eta, alde horretatik, garrantzi berezia dauka egitasmoak.

Merkatuan euskaraz dauden produktuen eskaintza ezagutzera eman nahi dugu; baliabideak eskaini nahi dizkiegu 16 urte bitarteko haur eta gazteei eta horien gurasoei; eta euskarazko produktu-eskaera ugaldu nahi dugu, merkatua dinamizatuz eta indartuz. Hala, aurten 1.000 katalogo inguru banatuko ditugu Ordizian, eskolaren bitartez.

Merkatuan dauden produktuen artean hautaketa egin da, berritasuna, egoki­tasuna eta kalitatea kontuan hartuta; eta zortzi ataletan sailkatuta jaso dira: musika, liburuak, aldizkariak, filmak, jos­tai­lu eta jokoak, DVD eta informatika pro­duktuak, komikiak eta gurasoentzako produktuak. Gainera, produktu bakoitza­ren gutxi gorabeherako prezioa ematen da, eta zenbait ataletan adinaren araberako banaketa egiten da.

Horretaz gain, www.katalogoa.org webgu­nean, paperean jasotako produktuez gain, merkatuan aurki daitezkeen beste asko agertzen dira. Aukera dago, gainera, argitaletxearen denda birtualera iristeko produktuaren gainean klik eginez eta, nahi izatera, begiz jotako produktuaren erosketa etxetik egiteko. Urte osoan zehar bizirik eta eguneratua dagoen gunea da, argitaletxeek berek aukera baitute produktu berriak sartzeko merkaturatu ahala eta deskatalogatuak gelditu direnak kentzeko. Hartara, Euskarazko Produktuen Katalogoaren webgunea urte osoan kontsulta daiteke, eta irakurleek, beren iruzkinak eta komentarioak egin ahal izango dituzte bertan, irakurri, ikusi, entzun edota jostatzeko hautatu duten produktuaren inguruan.

Paperezko edizioari dagokionez, aurten 200.000 ale inguru banatuko dira Euskal Herri osoan.

Comments { 1 }

Instrumentu bat jotzeak onurarik ba al dakar?

By on 2010(e)ko abenduak 10 in gizartea, musika

Gaur egun, haurrek hainbat jarduera egiteko aukera izaten dute: kirolak (futbola, saskibaloia…), lagunekin jolastu eta beste asko. Hautetako jarduerarik garrantzitsuenetakoa izan daitekeenetako bat, baina, musika-tresna bat jotzearena da.

Egun, musika-tresnak jotzen erakusteko lekuak daude, hau da, musika eskolak. Bertan hainbat musika-tresna jotzen erakutsi ahal digute: saxofoia, tropeta, biolina… Aktibitate honek hainbat onura ekar ditzake, Consumer Eroski aldizkariak esaten duenez. Musika instrumentu bat jotzeak eskuak eta begiak trebatzen omen ditu. Horretaz gain, memoria eta sormena ere lantzen dituen aktibitatea ei da.

Instrumentu bat jotzeak bere abantailak ditu. Musika tresnak desberdinak dira, baina gehienek nolabaiteko lasaitasuna eragiten dute. Instrumentu batetik zeure kabuz musika sortzen ari zarela ikustea zoragarria da, eta doinu oso politak jo daitezke musika sentituz. Halere, desabantailak ere baditu, batez ere denbora eta diru aldetik. Denbora asko galtzea eragin dezake, bai klaseetakoa eta baita etxean egin beharreko entseguak direla eta ere. Hortaz gain, instrumentu batek diru asko balio du, eta baita hau ikasteko beharrezkoak diren saioak ordaintzeak ere.

Nire ustez, oso ariketa ona izango litzateke umeak musika eskoletan sartzea, baina, hori bai, inolako presiorik gabe; bestela, umea ez litzateke gustura joango klasera eta, beraz, ez luke etekinik aterako. Iritzi guztiak errespetagarriak dira; halere, nire uste apalean, futbolean aritzeak ez dio pertsonari ekarpen handiegirik egiten; jarduera honek, berriz, hainbat balio txertatu eta ekarkin asko izan ditzake. Onartu behar da, dena den, futbolak ere ekar ditzakeela onura batzuk (fisikoki ongi mantentzea, lagun berriak egitea, erreflexuak hobetzea…), baina ez musikak adina.

Laburtuz, nire ustez, egokiena umeak txikitatik musika eskolara eramatea izango litzateke, hainbat abantaila eskaintzen dizkiolako haurrari.

Comments { 1 }

Gai ote gara plastikozko poltsak gure artetik desagerrarazteko?

By on 2010(e)ko abenduak 8 in arazoak, gizartea

Nori ez zaio gustatzen, goizean goiz altxatu berri zarenean, kafetxoarekin batera irratian eguneko berriak entzutea? Lehengo batean, erdi lo nengoela, bat-batean agertu zen albiste batek nire arreta piztu zuen: Estatu espainola omen da Europako plastiko-ekoizle nagusiena. Baina nork ez du entzun bere inguruan poltsa hauek desagertzear zeudela supermerkatuetatik?

Tamalgarria iruditzen zait, gaur egun Ingurugiroko Progamek egin dituzten ikerketa guztien ondoren, gure jarrera poltsak eta poltsak botatzearena izatea. Lehenik eta behin, ezer esan aurretik, datu harrigarri bat eman nahi nuke: biztanle bakoitzak urtero erabiltzen dituen plastikozko poltsen kopurua 97.000 tonakoa da guztira. Ez zaizue gehiegi iruditzen? Gainera kopuru honetatik %10 baino ez da birziklatzen.

Egun, kaleetan barrena zoazela, edozein txokotan aurkitzen dira kolore ezberdinak dituzten kontenedoreak. Denok dakigun bezala, hauetako bakoitzak erabilera ezberdina du. Zaila egiten zait ulertzea nola poltsa askok kaleetan zehar bukatzen duten euren ibilbidea. Izan ere, zenbat aldiz bota dugu txikle edo pipa zorrotxo bat lurrera? Halere, hau ez da gertatzen beste irtenbiderik ez dagoelako, poltsa hauek kutsa dezaketen guztiaz jabetzen ez garelako baizik. Gainera, herritarren artean egindako inkestek azaltzen dutenaren arabera, %74k baiezkoa eman dio merkatal zentruetan dauden dohaineko poltsak kentzeari. Beraz, zer gertatzen ari da? Egia da erabaki honek 10.000 lanpostu kolokan jarriko lituzkeela, baina helburua ez da poltsa hauek guztiz desagertzearena, hauen erabilera egokia izatea baizik. Bestalde, talde ekologistek ondorengo aholkuak askotan helarazi dizkigute: poltsak berrerabili, erosketetarako paperezko edo oihalezko poltsak eraman, erosketa-karroak etxeraino eramateko aukera… Ezjakintasuna ez da etorriko behin baino gehiagotan entzun ez ditugulako aholku hauek!

Azkenaldi honetan erabiltzen ari den metodo bakarra lehen dohain ziren poltsa hauek ordaintzearena da. Hiru zentimo kobratzen dute poltsa bakoitzeko, baina hau ote da irtenbiderik egokiena? Erosketak egitera joaten naizen bakoitzeko, jendea plastikozko poltsa hauek eskuratzeko ordaintzen ikusten dut, eta honek horrela izaten jarraitu behar duela uste dut. Baina ba al dakigu gure ingurugiroa kutsatzeaz gain, itsasoko zenbait espezie arriskuan daudela, itsas-dordoka eta baleak esate baterako? Gehienetan zabor hauek guztiak itsasoan bukatzen dute, inguruko fauna eta floran eragin handia izanik.

Nire ustez, arduragabetasun honetaz jabetzea litzateke lehendabiziko pausoa. Plastikozko poltsa hauek erabili eta botatzeagatik isunak jarri beharko liratekeela pentsatzen dut eta planteamendu honekin natorkizue. Zer iruditzen zaizue? Agian, modu honetara, plastikozko poltsen gai honek ez luke kezka handirik sortuko etorkizunari begira.

Comments { 2 }
-->