2009 ANTZERKI GARAIA

Txalo konpainiaren Ate-joka antzerki lanak emango dio hasiera gaur ostirala, hilak 9,  Ordiziako Herri Antzokian, Beasain eta Ordizia Udaleko Kultura Sailek antolatutako “Antzerki Garaia” egitarauari. Euskadiko Antzoki Sarean kokatzen den ekimenak Foru Aldundiko eta Eusko Jaurlaritzako Kultura sailen laguntza jasotzen du. Urtarriletik apirilera bitartean ikusi ahal izango diren zortzi lanek osatuko dute aurtengo edizioa, hamabosgarrena:

• Urtarrilaren 9an, Ordiziako Herri Antzokian (euskaraz): ATE JOKA, Txalo Teatroa.
• Urtarrilaren 16an, Beasaingo Usurbe Antzokian (gaztelaniaz): EL APAGON, Kanpingags S.L.
• Otsailaren 6an, Ordiziako Herri Antzokian (gaztelaniaz): SEXO GRATIS, Kunka Taldea.
• Otsailaren 13an, Beasaingo Usurbe Antzokia (euskaraz): LOLA IKUSTEN BADUZU ESAN ABERATSA DELA, Ados Teatroa.
• Otsailaren 27an, Ordiziako Herri Antzokian (euskaraz): OHEAN, Maskarada Taldea.
• Martxoaren 13an, Beasaingo Usurbe Antzokian (gaztelaniaz): MALDITO PARNÉ, Glu-glu produkzioak.
• Martxoaren 27an, Ordiziako Herri Antzokian (gaztelaniaz): LOS ANGELES NO TIENE HÉLICES, Dani Perez artista.
• Apirilaren 3an, Beasaingo Usurbe Antzokian (euskaraz): AHUNTZA…NOR DEN SILVYA?, Txalo teatroa.

Taldeak eta obrak hautatzeko irizpidea kalitatea izan da eta kontuan hartu dira muntaia, lengoaiari emandako trataera, hizkuntza, konpainiaren eskarmentua nahiz profesionaltasuna eta obren arrakasta.

Sarrera 10 eurokoa izango da emanaldi bakoitzeko, eta 60 euroren truke ziklo osorako abonoa ere lortu ahal izango da Beasaingo nahiz Ordiziako kultura sailetan, antzokietako leihatiletan edo Ordiziako Barrena jauregian. Taldean joan nahi izanez gero, dagokion udaletxeko kultura sailean aldez aurretik jakinarazi beharko da. Emanaldi guztiak gaueko 22:15ean izango dira.

ATE-JOKA, TXALO

Esan bezala, egitaraua gaur bertan hasiko da Ordizian Txalo konpainiak taularatuko duen “Ate Joka” lanarekin. Neil Simonen La extraña pareja komedia ospetsuan oinarrituta dagoen antzezlan honek bi lagunen elkarbizitza kontatzen digu. Joxemai, dibortziatua, orain arte bakarrik bizi izandakoa eta bizitzako bizio guztien zalea. Eta Andrex, betiko laguna, ezkondua eta dibortziotzekotan; maniatikoa, garbizalea, obsesiboa… Elkarbizitza honek egoera komiko eta barregarriak, tristeak eta mingarriak azalduko dizkigu.