Tag Archives | ebpn

Askoren ilusioa, askoren ahalegina

Ordiziako Udalak 2010eko Euskara Biziberritzeko Plana herritarrei ezagutzera emateko komunikazio kanpaina jarri du abian, “Askoren ilusioa, askoren ahalegina” [pdf] izenburua daraman katalogoa herriko etxeetan utzita.

Katalogoan, EBPNren barruan bideratuko diren hainbat proiekturen gaineko informazioa eskaintzen da.

Komunikazio kanpainarekin lortu nahi diren helburuak honakoak dira:

  • EBPNHizkuntza normalkuntzan esparru desberdinetan lanean dihardutenek EBPN jende askoren ahalegin bateratu gisa sentitzea.
  • Herritarrei modu erraz eta dibulgatiboan ezagutaraztea herrian hizkuntza normalkuntzaren arloan zer ekimen eta aukera dagoen eta eurak protagonista izan daitezen animatzea.

Katalogoa, azaroaren 30ean utzi da herriko gutunontzietan, baina komunikazio kanpainak abenduaren amaierara arte iraungo du. Bitarte horretan, 2010eko EBPNri zuzenketak eta ekarpenak egin ahal izango dizkiote herritarrek, EBPNri buruzko ideia-lehiaketan parte hartuta.

Abenduan zehar eta urte berriaren hasieran, bestetik, EBPNak jasoko dituen hainbat proiektu berri aurkeztuko ditu Udaleko Euskara Zerbitzuak:

  • Zorionak! Ama izango zara, haurdunentzako DVDa eta liburua.
  • Erregistro Zibilean umeak euskaraz erregistratzeko ekimena.
  • Guraso, hezitzaile eta begiraleei eskainitako urteko ikastaroen eskaintza.
  • Auto gidari karneta euskaraz.
  • Kontsumitzaile euskaldunak erosketa-poltsekin eta karroekin saritzeko kanpaina. Dendaz denda, euskara.
  • Kutxazainarekin euskaraz.
  • Ordiziako leku-izenak liburua eta weba.

Zehatz-mehatz, Ordizian euskaraz bizi ahal izateko aukera bermatu nahi zaio hala egin nahi duenari, eta horretarako behar adina neurri sustatu nahi da; baita koordinazio eta lankidetza ekimenak landu ere, Ordiziako gizarte eragileen eta erakundeen artean, normalizaziorantz aurrera egiteko.

Euskara zinegotziak gogorarazi duenez, 2006ko datuen arabera, Ordiziako biztanleen %79 dago euskararekin harremanetan: %58 euskaldun elebiduna da eta %21 ia euskalduna; hau da, hizketarako etorririk izan ez, baina ongi ulertzen du euskara. “6.980 herritarrez ari gara. Oso garrantzitsua da botere publikoek espazioak edo guneak betetzea eta irabaztea euskararentzat, 6.980 pertsona horiek euskara erabiltzeko eskubidea baliatzeko. Eta, hain zuzen ere, horixe bermatu nahi du plan honek”.

2010eko Euskararen Planak esku hartzeko zortzi eremu jaso ditu: familia transmisioa; irakaskuntza (gazteak); helduen euskalduntzea; udal-administrazioa, teknologia berriak eta komunikabideak; lana eta merkataritza; kirol-, aisialdi- eta kultur jarduerak; eta euskararen kalitatea. Eremuotan esku hartzeko Udalak dirutan aurreikusitakoa, guztira, 170.000 euro inguru da; hain zuzen ere, Udalaren aurrekontu osoaren %2a.

Comments { 1 }

EBPNri buruzko IDEIA-LEHIAKETA Ordizian

EBPNri buruzko IDEIA-LEHIAKETA
Abenduak 31, Planari ekarpenak egiteko azken eguna

Ordiziako Udalak, herritarren parte-hartzea eta berrikuntza bultzatzeko apustuari jarraituz, 2010eko EBPNri buruzko ideia-lehiaketa antolatu du abenduaren 1etik 31ra. Helburua ordiziarrek euskararen inguruan Udal mailan egiten den lana hobetzeko ideia sortzaileak ekartzea da.

Ekimen horren bitartez, Udalak euskararen inguruan egiten duen lanaren herritarren pertzepzioa zein den ere ezagutu nahi du Euskara Zerbitzuak, hobetzeko alderdiak identifikatzearekin batera. “Konponbideak planteatzeko eta ekarpenak egiteko gonbidapena egin nahi diegu herritarrei, gutxien baloratzen dituzten gaietan irtenbideak bilatzeko”, adierazi du Udaleko Euskara zinegotzi Belen Maizak.

Ideiak abenduaren 31a bitartera proposatu ahal izango dira ebpn@ordizia.org helbidera idatzita, eta 2010eko urtarrilean zehar jasotako ideien berri emango zaie herritarrei.

2010eko euskara planari buruzko IDEIA-LEHIAKETA ORDIZIAN

Zer egin: Ordiziako euskararen egoera hobetzeko ideia bidali.

Nora idatzi: ebpn@ordizia.org

Ideiak bidaltzeko epea: Abenduaren 31

Lehiaketaren emaitza: Urtarrilak 15

Sariak

    1. saria: 2 gau Euskal Herriko nekazalturismo batean bi lagunentzat
    2. saria: iPod-a
    3. saria: euskarazko liburu sorta
Comments { 4 }

“Sukalde kontuak” filmarako sarreren zozketa

ebpnsukalde_kontuakDatorren asteburuan (ekainaren 5, 6, 7 eta 8an), Aizpea Goenagaren Sukalde kontuak euskarazko filma botako dute Ordiziako Herri Antzokian, eta Udaleko euskara zerbitzuak lau sarrera bikoitz zozketatuko ditu herritarren artean.

Zozketan parte hartzeko Euskara Zerbitzura deitu edo idatzi behar da (943 80 56 22 / ebpn@ordizia.org), ostiraleko 13:30ak baino lehen. Izena ematen duten guztien artean zozketa egingo da. Saridunek aukeratuko dute zein egun eta ordutan joango diren Herri Antzokira, filma ikustera.

Comments { 0 }
-->