Tag Archives | udala

VI. Irakurri eta oparitu euskaraz

By on 2009(e)ko abenduak 8 in ebpn, euskara

Euskarazko 100 liburu gomendagarri biltzen dituen Irakurri eta Oparitu gida [pdf] osatu dugu Ordiziako Udaleko Euskara Zerbitzukoek, Eguberrien atarian, seigarren urtez, Olentzerotan eta Errege Egunean liburuak oparitzea erabakitzen duten herritarrei laguntzeko.

Liburuen gidarekin batera, Euskarazko Produktuen Katalogoa [pdf] ere banatu dugu eskola umeen artean.

Irakurri eta oparitu, seigarrengoz

Irakurri eta Oparitu gida osatzeko, Mondragon Unibertsitateko Humanitate eta Hezkuntza Zientzien Fakultateko (HUHEZI) Haur Liburu Mintegiaren eta Euskal Herriko editoreen laguntza izan dugu.

Liburu gomendagarrien gida argitaratu eta herritarren artean banatzearekin batera, IRAKURRI ETA OPARITU ekimena bultzatuko du Ordiziako Udalak 2010eko urtarrilaren 4ra bitartean.

• Irakurri eta Oparitu Euskaraz 2009 gidan zerrendatuta azaltzen diren euskarazko liburuak Barrena kultur etxeko sarreran aurkituko ditu herritarrak, paneletan zintzilikatuta.

• Gidan gomendatzen den libururen bat oparitarako erosi nahi duenari, %25eko deskontu-txartela emango diogu Udaleko Euskara Zerbitzuan. %50ekoa deskontu-txartela eskuratuko dute mintzalagunek edota euskara ikasleek.

Irakurri eta Oparitu ekimenarekin, ordiziarren artean irakurzaletasuna sustatu eta euskarazko liburu produkzioari bultzada eman nahi diogu.

VI. Irakurri eta oparitu euskaraz

Aurreko edizioetan, bataz beste, 100 bat liburu eskatu dituzte ordiziarrek Irakurri eta Oparitu ekimenaren baitan.

Euskarazko produktuen 900 katalogoa

Euskarazko produktuen katalogoaMerkatuan euskaraz dauden produktuen eskaintza ezagutzera eman nahi dugu; baliabideak eskaini nahi dizkiegu 16 urte bitarteko herriko haur eta gazteei eta horien gurasoei. Hala, aurten, 900 katalogo banatu ditugu Ordizian, ikastetxeen bitartez. Euskarazko Produktuen Katalogoa eskuratu nahi duen herritarrak Euskara Zerbitzura hurbil daiteke, edota www.katalogoa.org gunera jo, katalogoaren pdf dokumentua jaisteko.

Zortzi ataletan sailkatuta, nagusiki aurten kaleratu diren produktu berriak jaso dira katalogoaren 12. edizio honetan: musika, liburuak, aldizkariak, filmak, jostailu eta jokoak, DVD eta informatika produktuak, komikiak eta gurasoentzako produktuak.

Comments { 0 }

Askoren ilusioa, askoren ahalegina

By on 2009(e)ko abenduak 7 in ebpn, euskara

Ordiziako Udalak 2010eko Euskara Biziberritzeko Plana herritarrei ezagutzera emateko komunikazio kanpaina jarri du abian, “Askoren ilusioa, askoren ahalegina” [pdf] izenburua daraman katalogoa herriko etxeetan utzita.

Katalogoan, EBPNren barruan bideratuko diren hainbat proiekturen gaineko informazioa eskaintzen da.

Komunikazio kanpainarekin lortu nahi diren helburuak honakoak dira:

  • EBPNHizkuntza normalkuntzan esparru desberdinetan lanean dihardutenek EBPN jende askoren ahalegin bateratu gisa sentitzea.
  • Herritarrei modu erraz eta dibulgatiboan ezagutaraztea herrian hizkuntza normalkuntzaren arloan zer ekimen eta aukera dagoen eta eurak protagonista izan daitezen animatzea.

Katalogoa, azaroaren 30ean utzi da herriko gutunontzietan, baina komunikazio kanpainak abenduaren amaierara arte iraungo du. Bitarte horretan, 2010eko EBPNri zuzenketak eta ekarpenak egin ahal izango dizkiote herritarrek, EBPNri buruzko ideia-lehiaketan parte hartuta.

Abenduan zehar eta urte berriaren hasieran, bestetik, EBPNak jasoko dituen hainbat proiektu berri aurkeztuko ditu Udaleko Euskara Zerbitzuak:

  • Zorionak! Ama izango zara, haurdunentzako DVDa eta liburua.
  • Erregistro Zibilean umeak euskaraz erregistratzeko ekimena.
  • Guraso, hezitzaile eta begiraleei eskainitako urteko ikastaroen eskaintza.
  • Auto gidari karneta euskaraz.
  • Kontsumitzaile euskaldunak erosketa-poltsekin eta karroekin saritzeko kanpaina. Dendaz denda, euskara.
  • Kutxazainarekin euskaraz.
  • Ordiziako leku-izenak liburua eta weba.

Zehatz-mehatz, Ordizian euskaraz bizi ahal izateko aukera bermatu nahi zaio hala egin nahi duenari, eta horretarako behar adina neurri sustatu nahi da; baita koordinazio eta lankidetza ekimenak landu ere, Ordiziako gizarte eragileen eta erakundeen artean, normalizaziorantz aurrera egiteko.

Euskara zinegotziak gogorarazi duenez, 2006ko datuen arabera, Ordiziako biztanleen %79 dago euskararekin harremanetan: %58 euskaldun elebiduna da eta %21 ia euskalduna; hau da, hizketarako etorririk izan ez, baina ongi ulertzen du euskara. “6.980 herritarrez ari gara. Oso garrantzitsua da botere publikoek espazioak edo guneak betetzea eta irabaztea euskararentzat, 6.980 pertsona horiek euskara erabiltzeko eskubidea baliatzeko. Eta, hain zuzen ere, horixe bermatu nahi du plan honek”.

2010eko Euskararen Planak esku hartzeko zortzi eremu jaso ditu: familia transmisioa; irakaskuntza (gazteak); helduen euskalduntzea; udal-administrazioa, teknologia berriak eta komunikabideak; lana eta merkataritza; kirol-, aisialdi- eta kultur jarduerak; eta euskararen kalitatea. Eremuotan esku hartzeko Udalak dirutan aurreikusitakoa, guztira, 170.000 euro inguru da; hain zuzen ere, Udalaren aurrekontu osoaren %2a.

Comments { 1 }
-->