Warning: Creating default object from empty value in /home/berria/berria.euskaljakintza.com/wp-content/themes/canvas/functions/admin-hooks.php on line 160
Tag Archives | gaixotasunak

Ondoan behar zaitut

Twitter, Facebook, Tuenti eta bestelako sare sozialak, gaur egun, ezagunak bezain erabiliak dira. Denok daukagu garbi hori, ezta? Aisialdirako, lagunekin hitz egiteko, argazkiak eta bideoak partekatzeko eta beste hainbat gauzatarako baliagarriak direla badakigu. Hain ospetsu eta ibiliak diren sare sozial hauek norberaren onurarako bakarrik erabili ordez, beste bati laguntzeko ere balia daitezke; benetan laguntza behar duten pertsonei laguntzeko, hain zuzen ere.

Ideia hau kontuan hartuta, gaixoek laguntza handia behar dutela konturatu ziren Osakidetzako berrikuntza taldekoak. Gaixo guztien artean gaixotasun kronikoak -luzerako edo betiko diren gaixotasunak- dituztenak dira benetan laguntza behar dutenak. Askok galdetu dezaketen galdera da: zeintzuk dira gaixotasun kroniko hauek? Bada, askotarikoak daude: diabetesa, bihotz-hodietako gaixotasuna, asma, epilepsia, parkinsona, ultzeradun kolitisa… Zure bizitza osoan jasan beharreko gaixotasunak.

Gaixo hauek laguntza berezi bat beharko zutela pentsatu zuten, medikuen laguntzaz gain. Izan ere, hauetako gaixotasunen bat izanez gero, ingurukoen laguntza medikuena bezain beharrezkoa izaten da askotan. Gainera, gero eta gehiago dira gaixo kronikoak egungo ospitaleetan, hala nola, %80 dira mediku kontsultetan, 2/3 larrialdietan eta %60 ospitaleratuak.

Pertsona hauei laguntza handiagoa eman ahal izateko -momenturo nola sentitzen diren, non daude, hobeto ezagutu eta tratatzeko eta gaixo aktibo bihur daitezen-, aplikazio bat sortu zuten orain dela urtebete 270 pertsonekin. Orain denentzat zabaldu dute Kronet webgunea. Bertan, bai gaixoek, familiartekoek, eta bai esperientzia hau gertutik bizi izan dutenek edo laguntzeko prest eta lagundu nahi duen pertsona guztiek har dezakete parte. Bizipen eta aholkuekin gaixoari hobeto sentiarazten lagunduko diote pertsona hauek.

Webgune hau atal ezberdinetan dago banatua: Lagundu, egokitu, ikasi eta eraiki. Lehena, Lagundu, zurekin nago delakoa da. Izenak dioen bezala, gaixoari sostengua eta babesa eman eta zalantzak argitzeko asmoa da. Ondoan norbait duzula eta norbait zurekin dagoen segurtasuna ematen ahalegintzen dira. Bigarrena, Egokitu, babes beharra daukat da. Gaixotasun kroniko berri honekin moldatzeko, zure bizitza egokitzeko hartara eta gaixotasuna hobeto ezagutzeko baliabideak ematen dizkizu. Hirugarrenak, Ikasi, erantzunen bila nabil, une txarretan bizipenak kontatu, zure barrua hustu, aholkuak jaso eta besteen bizipenak entzuteko aukera ematen dizu. Medikua izan beharrean, zure gauza berak sentitzen dituzten pertsonekin partekatzeko aukera ematen dizu. Eta azkena, Eraiki, aurrera noa, da. Nork bere gaixotasunarekiko dituen mugak ondo ezagututa, bizi kalitatea eta zaintza hobetzeko laguntza eskaintzen dizu.

Azkenean Kronetekin lortu nahi dutena da gaixoa ez sentitzea bakarrik eta laguntzarik gabe; izan ere, gaixoak gehien sufritzen duena bakardadea baita, gaixotasunari zuk bakarrik aurre egin behar diozula inongo laguntzarik gabe. Honi aurre egiteko, familiaren eta lagunen laguntzaz gain, zure bizipen berdinak bizi dituen jendearen laguntza ezinbestekoa izan daiteke, eta webgune honek horretan laguntzen dio gaixoari. Batzuetan medikuaren aholkuak baino gehiago lagun dezakete horrelakoek. Proiektuaren inguruan lanean ibili direnek diotenez, gaixoak gehienbat bere buru egoera dela eta sartuko dira sarean. Eta nolabait, hitz eginez, bakoitzaren animoak gora egin dezake, bideo honetan Sheila Urbiñak dioen bezala: “Sar naiteke goizeko hiruretan webgunera, insomnio momentu izugarri batekin, eta seguruenik norbait egongo da bertan kaixo sinple bat esango didana. Goizeko hiruretan, kaixo sinple batek, sinetsi, laguntzen dizu.”

Beraz, esan beharrik ere ez dago, horrelako sareek izugarri lagun dezaketela jendeak bere eguneroko bizian aurrera pausoak errazago eman ditzan. Bide batez, aprobetxatu nahi dut artikulua zuek animatzeko sarean parte hartzera, horrelako bizipenen bat gertuko baduzue. Eman izena kronet.net-en. Besteei lagunduz, ziur nago zuek ere zuen buruarekin hobe sentituko zaretela.

Informazio gehiago nahi baduzu: http://cronicidad.blog.euskadi.net/eu/

Comments { 0 }

Hara, burusoil bat!

Ume bat bere lagunari :
– Badakizu…
– Zer?
– Nire aita duela 10 urte ilea moztu gabe bizi dela…
– Arranopola!! Zer da ba…. artista bat?
– Ez, da…
(Orduan umearen aita kotxean agertzen da bere bila.)
– Hara, burusoil bat!

Oso dibertigarria egiten zaigu burusoil bat ikustea, ni bezalako umemokooi behintzat. Bestalde, ez gara konturatzen, hain normala egiten zaigun jokabide petral horrekin, agian,  autoestimu baxua duen pertsona bat mintzen ari garela. Kontzienteki edo inkontzienteki, baina gerta liteke min egitea. Antza denez, gizarteak, modak… eginiko kaltea da. Edertasun kanonak burusoilak alde batera utzi ditu, antza denez. Badirudi, burusoila izateak ez zaituela arrakastara eramango. Hori horrela dela ikusteko, pentsa dezagun: zenbat burusoil ezagutzen ditugu famatuak edo arrakasta lortu dutenak? Oso gutxi!!

Ezer baino lehen, aipatu beharra daukagu hainbeste beldur sortzen duen gaitz hau erabat arrunta dela zahartzaroan. Gizonezkoen %50ek baino gehiagok izaten ditu ile erortze arazoak. %50ek baino gehiagok! Sekulako ehunekoa da hori. Gizonezkook, gainera, nahiko onartua dugu hau gertatuko zaigula.

Edozein modutan ere, ez dira urte asko pasatu gure autoestimua gutxitzen duen arazo fisiko honek sekulako lotsa sorrarazten zigunetik. Gaur egun, ordea, egoera erabat aldatu da, zorionez. Ohikoago bilakatu da burusoilak kaleetan ikustea, beraien soilgune distiratsuekin. Eta ez hori bakarrik, burusoilak modan daudela esatera ausartuko nintzateke, itxura fisikoa erakargarriagoa egiten ei du.

Egun, burusoilak emakume askoren iritziz sexyagoak dira! Egia ote? Hala bada, ez dut segundorik galduko eta nire ileapaindegira deituko dut berehala txanda hartzeko! Bestetik, nire buruari galdetzen diot ea zer gertatu den aldaketa sakon hau emateko. Agian, gure bizitza zuzentzen duen modak berak eragindakoa da, edo guk eragindakoa. Ez dago oso garbi. Hala eta guztiz ere, eskertzekoa da aldaketa hau gertatu izana, gero eta gehiago direlako burusoil izateaz harro daudenak.

Era berean, burusoiltasun edo alopeziaz hitz egitean, guztioi etortzen zaigu irudi bera: ilea erortzen zaiolako larriturik dagoen adineko gizonezkoa. Baina, nahiz eta arazo honen funtsa oinordetzan egon eta gizonezkoetan ematen den gehienbat, emakumeek ere izan dezakete. Horrez gain, zenbait gaixotasunen ondorioa izan daiteke, hala nola, kantzerraren ondorioa. Edonola ere, gizonezko hauek sarritan erortzen dira dirua besterik egin nahi ez duten iruzurgileen eskuetan. Asko dira besteen zoritxarraz baliatzen direnak sos batzuk eskuratzeko, agintzen dutena ezinezkoa bada ere.

Egia da, hain aurreratua dugun teknologiari esker, aurkitu direla modu edo prozesu anitz arazo hau tratatzeko. Denok dakigu, ordea, gezur hutsa direla! Esanak esan, zergatik jarraitzen dugu horrelako produktu kaltegarriak erosten? Etsitasun egoerak eramanda seguruenik. Itsutu egiten gara irtenbide azkar eta eraginkor bat bilatu nahian. Ez gara konturatzen, eta ero moduan aritzen gara arazoa are gehiago handitzen. Ez itsutu, burusoiltasunak ez du sendagairik! Eta beste hainbat egoeraren antzera, onartzeak bakarrik kenduko digu etsipena.

Gauzak horrela, zu burusoila bazara, badakizu, ez kezkatu eta onartu zarena, naturak hala egin zaituelako. Ez erori iruzurretan eta izan zaren bezalakoa, burusoilak sexyagoak dira eta! Ondorioz, munduko burusoilek bi irtenbide dituzue : onartzea zuen burusoiltasuna eta harro sentitzea edo txano erakargarri bat erostea!

Comments { 0 }

Gaixotasunen sendagaia, dirua?

Egungo gizartean gaixotasun arraroekin ematen den egoerak haserretzen nau. Justiziaren eta ongiaren bila gabiltza; halere, horietara iristeko oztopo den faktore batekin topo egiten dugu: dirua. Argi dago diruak ez duela zoriontasuna ematen, baina esan behar da asko laguntzen duela. Dena den, ezin dugu ahaztu dirua sortu aurretik gizakia sorturik zegoela. Nola da posible, bada, pertsona batzuek proiektu bat nahiago izatea, pertsona baten bizitza baino?
Betidanik egon dira gaixotasunak eta, hauen ondorioz, generazio asko hil dira. Nahiz eta gaur egun teknologia oso aurreratuta egon, gaitz askori ezin izan zaie irtenbiderik bilatu oraingoz. Baina, beste hainbatetan, nahiz eta sendabidea izan, jende kopuru gutxiengan ematen denean, bertan behera uzten dira saiakera guztiak diru gastuak direla medio. Honen ondorioz, familia ugarik jasan dute kide baten heriotza eta kalte hori, garbi dago, ez da diruaren bidez konpontzen. Gaixotasun horietako batzuk HIESa, hainbat minbizi mota edo Lupusa dira.

Aipatu behar da gaixotasun hauek ez dutela beti heriotzara eramaten gaixoa. Zeinbatetan gaixotasun kroniko bihurtzen dira eta kutsaturik dagoen pertsonak izugarrizko aldaketa fisiko eta psikikoak jasaten ditu. Ondorioz, hianbat kasutan, ez dira gai izaten bere kabuz beste guztion moduan bizitzeko, eta horrek familiartekoei sekulako arazoak ekartzen dizkie.

Hori gutxi balitz, ez da ahaztu behar 3. munduan gertatzen dena. Afrikan, esaterako, biztanleriaren gehiengoa gaixotasun arruntez hil ohi da. hau oraindik okerragoa da; izan ere, pertsona hauek normalean gripe edo beherako sinpleak jota hiltzen baitira.
Beraz, gaixotasun hauek sortzen duten kaltea konpon daiteke; halere, arrazoi ekonomikoak tarteko, ez zaie behin betiko amaiera ematen. Zergatik? Diru falta edo gogo faltagatik? Gai hau interesgarria iruditu bazaizu, jarraitu irakurtzen ondorengo gunean: gaixotasun arraroak.

Comments { 2 }
-->