Archive | orokorra

Donostiako Egia auzoko Ametsenea gaztetxea hustu egin zuen pasa den astean, urriak 26, Ertzaintzak goizeko 06:50ean. Une horretan eraikinaren barruan bi gazte aurkitzen ziren eta ertzainak ikustean, gazteek eraikina husteko agindua non zeukaten galdetu zieten, ertzainek horren beharrik ez zeukatela erantzunez.

Jende ugari bildu zen gaztetxearen inguruan, eta manifestazioa ere egin zuten. Une horretantxe hasi ziren eraikina botatzen eta ekintza horren aurrean tentsio uneak izan ziren, ertzainek gazteei erasotuz bukatu zutelarik. Eguerdian, gaztetxea bota izana salatzeko, Donostiako udaletxera joan ziren gazteak, bertan udaltzainek kolpeka kanporatu zituztelarik.

Haizea Fernandez Egiako Polloe Bizirik Asanbladako kideak ekintzaren erantzuleak kritikatu zituen:

Batetik, EAJ, euren Polizia bidali duten moduan bidaltzeagatik; bestetik, eraikinaren jabe ziren mojak, euren jarreragatik, eta gurekin harremanetan jartzeari uko egiteagatik.

Era berean, zera gehitu zuen:

Honen atzean dagoen eraikuntza enpresa ere kritikatzen dugu, gazteok autogestiorako okupatutako etxea esku pribatuak aberasteko erabiltzeagatik; azkenik, Udala ere bai, bera delako erantzule nagusia, hemen anbulatorioa egiteko egitasmoa egin eta guri ateak itxi dizkigulako.

19:00etan manifestazioa egin zuten, eta hasiera batean ertzainek bi gazte identifikarazi arren, gero lasai utzi zieten protesta aurrera eramaten.

Arazo hau, dena den, ez da joan den astekoa ondoren ikus dezakezuen bezala.

2005-08-07

2005-08-24

Eta zuek zer deritzozue?

Lehengo batean lagunekin kalean nengoela eztabaida txiki bat izan genuen: hondartza ala mendia? Egia da, betidanik kostaldeko herri edo hiriak askoz ere turista gehiago izan dituztela; baina, hala ere, hau guztia aldatzen ari da, azkenaldian, nekazal turismoa geroz eta gehiago garatzen ari baita.

Euskal Herrira datozen turistek gure kultura, ohitura, gatronomia… ezagutzeko eskaintza handia dute. Euskadi, atsegin handiz web orriak dioenez:

Euskadi kontrastez beteriko lurralde bat da: industria asko eta populazio kopuru handia, baina baita oso berdea eta birjinala ere. Bi parajeak kilometro eskasotara daude kokaturik, eta beraz natura guneak eta ekosistemak aurkitu daitezke bere jatorrizko egoeran hiri handietatik oso hurbil. Parke eta erreserba hauen garrantziak eta edertasunak aukera asko sortzen dituzte txangolarientzat, kirol ezberdinak praktikatzeko eta atseden bat hartzeko.

Gainera, era guztietako erakundeak aurki ditzakegu: kultura aldetik hainbat museo ( Artium Gasteizen, Guggenheim Bilbon, Txillida Leku Hernanin, etab.); gastronomiari dagokionez, ostalaritza eskola ugari ( hain ezagun den Karlos Argiñanoren Zarautzen kokaturiko Aiala sukaldaritza eskola, esate baterako); hezkuntzari dagokionez, beste hainbat erakunde eta unibertsitate ( Ikastolen Elkartea , EHU, Deustuko Unibertsitatea , Mondragon Unibertsitatea …), aisialdiari begira hipodromoak, kasinoak ( Kurtsaaleko Kasinoa Donostian eta Nerbioi Kasino Handia Bilbon), parke ekologikoak eta, etxeko gaztetxoenentzat (eta ez hain gaztetxoentzat ere), jolas-parkeak.

Monumentuak ere ugariak dira. Nahikoa da edozein herritara joatea eta bertako udaletxe nahiz eliza edota kale zahar estuak beneratzea, gure buruko kezka guzti-guztiak uxatzeko. Eta ez hori bakarrik, aipatu beharra dago Santiagoko bideak Euskal Herria ekialdetik mendebalderantz igarotzen duela, beraz, aterpetxe eta ospitale dexente ere badaudela.

Baina hasierako harira bueltatuz, kostaldeko turismoak Bizkaia eta Gipuzkoako hondartzez gozatzeko aukera aparta ematen digu. Eta ez hori bakarrik, surfa, urpekaritza eta hainbat eta hainbat ur-kirol burutzeko aukera ere badugu. Nork deritzo hondartzari aspergarria?

Hala eta guztiz ere, lasaitasunaren bila bazoaz, argi eta garbi dago nekazal turismoa aukera aproposena duzula: turista dentsitate baxua, etxe edo baserri galduak, erabateko isiltasuna, ipuinetako baso eta errekak… Asteburu ahaztezin bat igarotzeko prest bazaude bisita itzazu Euskaraz.com orriak eskaintzen dituen informazio eta estekak.

Azkenik, hirietako turismoa daukagu, kanpotar gehienak erakartzen dituena. Hain ezagunak diren Bilboko (Marijaia), Donostiako eta Gasteizko (Zeledon) Aste Nagusiak eta, nola ez, Iruñeko San Ferminak turista ugari ekartzen dituzte Euskal Herrira.

Honek guztiak argi eta garbi uzten du Euskal Herrian giro aparta dagoela. Gainera, hirietan- ostalaritza arloari dagokionez- beste tokietan baino askoz ere eskaintza handiagoa dago, beraz, orokorrean beste kasuetan baino errazagoa izaten da azken orduko erreserba bat egitea.

Badakizu, lasaitasunaren bila bazoaz lagun, nekazal turismoa duzu aukerarik onena. Eguzki izpi batzuk nahiago badituzu, jo ezazu kostaldeko turismora. Baina, nire kasuan bezala, festa giro on baten bila bazabiltza, euskal hiriek aukera bikaina eskaintzen dute! Eta zuk zer deritzozu? Ezagutzen al duzu txoko erakargarririk? Hala bada, hementxe duzu horren berri emateko gunea…

Informazio guztiz interesgarria nahi izanez gero, joan EUSKADI, atsegin handiz web orrira, ez zara damutuko!

Azkeneko asteotan denon ahotan dabilen eta hegazti haztegietan sekulako arazoak sortarazten ari den hegazti gripearen ondorioz, Europako Batasunak azoka, feria eta antzekoetan hegaztien erakusketak debekatu ditu.

Altsasuko udalak bereak eta bi pasatu behar izan zituen joan den asteburuko azoka ospatu ahal izateko. Merkatu hau tradizio handikoa da herri honetan, eta urtero bezalaxe, ikusgai nagusia zaldiak izan dira. Urtean-urtean ardien erakusketa ere egiten da, baina, tamalez, atzokoan ezin izan ziren aurkeztu “galaxia� izeneko gaitzaren erruz. Arrazoi horrexegatik ideia ezin hobea iruditu zitzaien antolatzaileei ardien huts hori betetzeko oiloak eta oilarrak ezartzea, baina, ondoren, Europako Batasunetik debeku berri hori iritsi zitzaien.

Badirudi abendura bitarte beto honek berdin jarraituko duela. Halere, hilabete honetan ospatzen diren feria tradizionalak, hala nola, Urretxu eta Zumarragako Santa Lucia edota Donostiako Santo Tomas beti bezala ospatuko dira, azoka antolatzaileek argitu dutenez. Alkate donostiarrak – Odon Elorzak- dioenez, jarraitu beharrekoak aintzat hartuko ditu izurriteari uko egiteko, legeari dagozkionak eta baita osasunari dagozkionak ere.

Dirudienez, aipatutakoetan eta Gasteizko azokan baino, Euskal Herriko beste guztietan ez da Europako Batasuneko esana beteko, adituen ustez hegazti bizietan soilik baitago arriskua. Halaber, Ordiziakoa salbu dago (eskerrak!!), eta salneurriak betikoak izango dira. Nolanahi ere, hegazti gripea ez da txantxa eta, beti ere, gizartearen ongirako, ingurugiro diputazioak dira arduradun hegazti agerraldiak ahalbidetu edota debekatzeko ere.

Gaitzaren azken berriei dagokienez, orain dela pare bat egun kasu berri bat agertu da Kroazian, zisne talde batek pairatzen zuelarik eritasuna. Erresuma Baturaino ere iritsi da, Hego Amerikatik ekarritako loro bat hil baita gaixotasunak jota.

Oraingoz gizakietan ez da gaixotasunaren eramailerik agertu, baina, badaezpada ere, zientzialari hungariar batzuek lanean aritu eta gripearen kontrako txertoarekin topo egin dute. Zorionez, %100 eraginkorra da, baina, ba al dago fidatzerik baieztapen horretaz? Mundua salbu al dago?

Honi guztiari buruz zer edo zer gehiago jakin nahi baduzu klikatu hemen (telebista pixka bat ere ikus dezakezu, edota egunkaria irakurri). Zure iritzia jakitea ere gustatuko litzaidake. Horrela bada, klikatu azpian.