VI. antzerki amateur topaketa Ataunen

By on 2005(e)ko urriak 20 in orokorra

Ekitaldia aurkezten duen kartelaDenok dakigun bezala, antzerki amateurra ez dago bere egoerarik onenean; antzerki obren eskasia, taldeen publizitate beharra nahiz festa eta antzeko egitarauetan lekutxo bat lortzeko zailtasunak dira, besteak beste, arrazoiak. Horrexegatik, egoera hau aldatu nahian antzerki talde ezberdinak elkarrekin biltzen hasi ziren eta Euskal Antzerki Amateurraren Elkartea (EATAE) sortu zuten. Talde horri esker, beraien lan berriak aurkezteaz gain, bata bestearen berri izateko aukera dute.

Antzerki amateurraren lehen topaketa 1998an Saran ospatu zen. Labaienen omenez, EATAEko talde ezberdinek euren antzerki obrak aurkeztu zituzten bertan, eta taldekideen arteko harremana sendotuz joan zen. Emaitzak denen gustukoak izan zirenez, topaketak antolatzen jarraitu zuten: 1999an Deban (Nemesio Etxanizen omenez), 2000an Elgoibarren, 2001ean Mutrikun eta 2002an Bermeon.

Topaketarik gabeko bi urteren ostean, Ataunek egin zien dei EATAEko kideei 2005.eko topaketa bertan egin zezaten. Elkartekoak berehala jarri ziren martxan eta zenbait bileraren ondoren, egitarau erakargarri eta dibertigarri bat eskaini digute.

Antzerkia izango da
egitarauaren protagonista
nagusia. Aretoetan,
tabernetan…

Adin guztietarako
prestatutako
ekintzak daude:
kale antzerkia,
tailerrak, eta nola ez,
antzerki emanaldiak.

…Orain dela zazpi urte hasi zen bidea Ataunen izango du jarraipena. Modu honetan antzerki amateurrari bere tokia zabaldu nahi diogu, aldi berean jendearen antzerkirako gutizia ere bizkortuz.

EGITARAUA

Urriak 21/ ostirala

18:00 ONGI ETORRIA udaletxean
18:30 “Dena ondo dabil” kale antzerkia San Martingo kaleetan zehar Elektrotuna eta Gilkitxaro antzerki taldeen eskutik
21:00 “Adanen poema amaigabea” antzezlana Herri Antzokian Goaz antzerki taldearen eskutik
23:00 “Arrakalak”, Gotzon Barandiaranen poesia emanaldia Gabrielenean BBK taldearen eskutik

Urriak 22/ larunbata

10:00 Gazteentzako tailerrak:
-Hankapalo ikastaroa Auzoeta kiroldegian Ekeike taldearen eskutik
-Zirko teknikak Auzoeta kiroldegian Baionako Oreka taldearen eskutik
-Perkusioa Artaldi kultur elkartean Txatunga Benbeken eskutik
13:00 Antzerki emanaldiak herriko tabernetan Goizeko Izrrak antzerki taldearen eskutik
17:30 “Garai modernoak” antzezlana Herri Antzokian Zurriola antzerki taldearen eskutik
18:30 Antzerki emanaldiak herriko tabernetan Goizeko Izarrak antzerki taldearen eskutik
19:00 “Bakarrizketak” Haitzarri Kultur Elkartean Mairuk antzerki taldearen eskutik
22:00 “Inprobisazio martxa” Gabrielenean Gilkitxaro antzerki taldearen eskutik

Urriak 23/ igandea

11:00 EATAEren batzar nagusia Grabielenean
13:00 Tailerreko lanen erakusketa San Martingo kaleetan zehar
15:00 Bazkaria Aizkoate Kultur Elkartean
17:00 “Nire jostailuak kutxan” antzeslana Urrup antzerki taldearen eskutik

Comments { 8 }

ITSASONDON LIBURUAK DOHAIN

By on 2005(e)ko urriak 18 in orokorra

liburuak Liburuak erabat maite dituenak hemen dauka aukera paregabea! Izan ere, liburutegian berriketa lanak egin behar direla eta bertako liburuak oparitzea otu zaie Itsasondoko liburutegiko arduradunei. Arazoa zera da: obrak burutu bitartean, liburutegian biltzen joan diren 5000 liburuak gordetzeko tokirik gabe geratu dira.

Lehenengo itsasondoarrek izan zuten aukera hori. Gureak elkarteak ere bereganatu zituen hainbat ale eta beste hainbatek Martuteneko kartzela izan zuten helmuga. Orain, goierritarron txanda da. Edozein pasa daiteke bertatik eta hainbat elkarte, ikastetxe edota beste liburutegi batzuei ere eman zaie egitasmo honen berri. Ordutegia hauxe da: goizez, egunero 09:00etatik 13:00etara eta, arratsaldetan, 18:30etik 19:45era baina astelehen, asteazken eta ostiraletan bakarrik.

Hala ere, liburutegiaren sorrerari buruz honela dio bertako arduradun den Olatz Imazek:

Herritar batzuek eskatuta jarri zuten liburutegia martxan duela 35 urte. Harrezkero, etengabe hazten joan da liburuen kopurua. Gaiei dagokionez, denetik aurki daiteke bertako apaletan: artea, filosofia, politika, pedagogia… eta nola ez, literatura.

Berrikuntzei dagokienez, lanak egin eta irakurtzeko leku egoki bat jarriko dute, mahai handi batez horniturik. Hainbat egunkari ere ekarriko dute egunero eta KZ guneak betiko martxan jarraituko du. Beraz, leku paregabea irakurleen grina asetzeko, bai horixe!

Comments { 1 }

Arrakasta Nafarroa Oinez-arentzat

By on 2005(e)ko urriak 16 in euskara

Junek argitaratutako artikuluan ondo baino hobeto iragartzen zen bezala, urriaren 16 hau Nafarroa Oinez ospakizunaren eguna izan da, ezbairik gabe; jai eta festa giroaz gozatu ahal izan dugu Olaztira hurbildu garen guztiok.

Olazti. Asteburuz asteburu aitona-amonak han direla-eta hamasei urtez bisitatzen daramadan herrixka aspergarria; nork esango zidan, azkenean, tankera honetako jaialdi baten kokaleku bilakatuko zenik? Inoiz ez nituzke neuretzat bigarren herri bilakatu den Olaztiko kaleak gaurko egunean ikusi ditudan bezala imaginatuko: gizon zein emakume, gazte zein zahar, frontoian zein igerileku ondoko parkean… guzti-guztiak festa giroan!! Harritzekoa eta arraroa izan da benetan, horrenbeste jende eta ekintza aztertzea hain aspergarri eta bakartia kontsideratzen nuen Urbasa magaleko herrixkan.

Eguraldiari dagokionez, goizaldeko laino mehatxugarriek zeru urdin-urdin bati paso eman diote arratsaldean. Tenperaturak, aldiz, ez du hainbesteraino lagundu. Baina, zer demontre, eguraldia primerakoa izan da! Haize leuna, zerua eguzkitsu eta euriaren arrastorik ere ez. Ezin gara, bada, izan den giroaz kexatu.

“http://www.ikastola.net/ikastola/festak/Nafarroa_Oinez/Nafarroa_Oinez_logoak/Logo_handiak/NO_2005.jpg� irudia ezin da bistaratu, akatsak dituelako.

Goizaldeko 9ak aldera, hortxe abiatu naiz, beraz, familiarekin batera ibilbidea osatzera. 8km inguru izan dira; lan erraza, beraz. Horrela, ibilbidea osatu duten sei guneak banan-banan bisitatu ditugu: musika, idi-frogak, herri-kirolak, ziza-erakusketak, umeentzako jolasak… hamaika ekitaldi antolatu dituzte bisitarion entretenimendurako eta egia esan, primeran funtzionatu dute guzti-guztiek. Ibilbideari polita irizten diot, herri eta mendi inguruak konbinatu baititu. Beraz, belardi, baso eta mendi dotoreen paisaia zoragarriaz gozatzeko aukera izan dugu ibilbidearen zati handi batean zehar: askok eta askok egunaren zatirik handiena zelai zabaletan etzanda igaro dutelakoan nago. Siesta ederra bota du batek baino gehiagok!!

Baina pasa gaitezen punturik garrantzitsuenera: EUSKARAREN PRESENTZIA. Olazti bezalako herri batean ematen den euskararen erabiliera ikusita (datuek erakusten dutenaren arabera Olaztin, konkretuki, ez da %1eraino ere iristen!!!! Eta zoritxarrez, hainbeste urte bertara gerturatuz igaro ondoren, kopuru hori lasai asko guztiz erreala izan daitekeela esaten dit esperientzia pertsonalak), euskararik entzungo ez zen beldur pittin bat banuela aitortu behar dizuet. Dena dela, gauzak espero nuena baino hobeto atera dira azkenean. Kanpoko jendetzaren eragina ote? Guztion zorionerako, euskara dezente entzun dudala esatea garrantzizkoa da, gaztelaniak bere betiko lekua bete duen arren. Euskararen presentzia, beraz, gainditzeko modukoa iruditzen zait. Euskal Herri osoan gaur Olaztin izan den euskararen erabileraren portzentaia beteko balitz, ziur gure hizkuntzak gora egingo zukeela. Ondorio pozgarri eta garrantzitsu bat dugu hau, bederen.

Laburbilduz, Nafarroa Oinez ospakizunaren 25. urteurren hau arrakastatsua izan da, nire uste apalean. Norbaitek aurkakorik pentsatzen al du? Eguraldi ona, antolaketa hobea eta espero ez nuen euskararen erabilera estimagarria. Zorionak, beraz, jaialdiaren arrakastaren erantzule zareten antolatzaile guztioi.

Comments { 3 }
-->