Tag Archives | heriotza

Ezin heriotza zigorra gainetik kendu

By on 2011(e)ko abenduak 14 in arazoak, gizartea

Orain dela gutxi jakin genuenez, hiru gizon hil zituzten AEBetan heriotza zigorra dela eta. Kasu horietatik atentzioa gehien eman zidana Troy Davisena izan zen. Gizon hau 2011ko irailaren 2an hil zuten, 42 urterekin, injekzio hilgarriaren bidez. Exekuzio honek izan du polemika gehien; izan ere, jende askoren ustez, akusatua errugabea baitzen. Troy Davis 1991an kondenatu zuten, bi urte lehenago, 1989an, polizia bat hiltzeagatik. Akusatuak hiru aldiz saihestu zuen bere exekuzioa 2007. urtetik. 2011n, berriro ere kasua atzeratu eta ez zutela hilko pentsatu zuen, baina oker zegoen. Epaimahaiak beranduago adierazi zuen poliziak hertsatuta erabaki zuela. Hau da, beraien ustez, Davis errugabea zen, baina poliziak behartu zituen erruduna zela esatera. Ondorioz, hiltzera kondenatu zuten. Ustez berak hildako poliziaren familikoek nola hiltzen zen ikustera joan ziren Jackson kartzelera. Euren aburuz, Davis erruduna zen, eta Anneliese MacPhail alarguna ados agertu zen epaiketaren emaitzarekin.

Azter ditzagun gizon honen azken hitzak:

Ez zen nire errua izan, ez neukan pistolarik eta errugabea naiz.

Esan daiteke horiek ez direla gizon errudun baten hitzak. Horren adierazle da Troy Davisen alde jende ugari ipini zela: manifestazioak egon ziren eta bai Aita Santuak eta Europar Batasunak ere babesa eman zioten.

Goian aipatutako gertakizunaz aparte, duela gutxi beste kasu zital bati buruz entzun genuen: espainiarren biloba zen Manuel Valle heriotza zigorrera kondenatua zegoen Estatu Batuetan, Floridan hain zuzen ere, polizia bat hil izanagatik. Espainiako Gobernuak eta Europar Batasunak zigorra kentzeko eskatu zieten amerikarrei, baina ez zen horrela gertatu. Okerrena zera izan zen: gizon honi jarri behar zioten injekzioa ez zen besteak bezalakoa. Injekzio mota honek kontziente uzten zaitu eta izugarrizko mina jasaten duzu beste injekzio bat jartzen dizuten bitartean.

Dena den, kasu hauek ez dira bakarrak. Berrietan asko azaldu dira eta horregatik ezagutzen ditugu, baina oraindik munduko beste hainbat herrialdetan –Txina, Ipar Korea, Irak eta AEBko estatu batzuetan esate baterako- horrelako zigorrak aplikatzen dira.

Bestalde, Amnesty International-ek adierazi duenez, aurtengo heriotzen portzentajea gutxitu egin da, eta heriotza zigorra aplikatzen duten herrialdeen kopurua ere urriagoa da. Espero dezagun, bada, urte batzuen ondoren heriotza zigorra desagertuta egotea munduan zehar.

Informazio gehiago: rtve.es/penamuerte

Comments { 1 }

Amesgaiztoari amaiera eman ezinik

By on 2010(e)ko irailak 19 in arazoak, gizartea

Nork bere erara bizi du bere bizitza. Berak nahi dituen ekintzak egin, dituen ametsak bete, helburu desberdinak lortzen saiatu…Kontua da bizitzak mugak jartzen dizkiola gizakiari . Hainbatetan ezin dugu aurrera egin. Argi dago gizakiak duen funtsezko eskubidea bizitzearena dela, baina zer gertatzen da egoera larrienetan zaudenean? Gaixotasunen bat, edo hiltzeko zorian zaudenean? Merezi al du aurrera jarraitzea? Eutanasia onargarria al da?

Eutanasia gaixotasun larri bat duen gizakia heriotzara eramatea da, bere sufrimenduarekin amaituz, eta makina baten menpekotasuna utziz. Bi iritzi kontajarri topa daitezke gaur egun gizartean gai honi buruz. Eutanasiarekin ados daudenak egokiena gaixoari hiltzen laguntzea dela pentsatzen dute. Noski, gaixoak haren zorigaiztoko bizitzarekin amaitu nahi badu. Kontrako iritzia duten pertsonei, aldiz, gaixoari heriotza erraztea gehiegizkoa iruditzen zaie. Horien ustez, gaixoa ez da gai, kasu horietan, bere bizitzari buruz erabakitzeko. Sufrimendua du, ikusten du ez dela gai ezer egiteko…eta, horregatik, heriotza iruditzen zaio biderik egokiena.

Nire uste apalean, nork bere buruarekin nahi duena egiteko ahalmena izan beharko luke, nork bere amaiera erabakitzekoa. Esperantzarik ez duenak heriotza irtenbiderik egokiena dela pentsatzen badu, hautatzeko eskubidea izan beharko luke. Erraza da pertsona osasuntsu bat izanda hitz egitea, baina ipin gaitezen une labur batez gaixoaren lekuan, makina baten menpe eta nahi duena egin ezinik bizi denaren tokian. Irudikatu zure bizimodua edozer egiteko beste pertsona baten beharra izango bazenu. Hori bizitza da? Gaixoak amesgaizto horrekin amaitu nahi badu, zergatik ez? Egia da hainbati hori bide errazenetik jotzea dela irudituko zaiola, borrokatu egin behar dela egoera latzenetan. Ados. Nik, dena den, gaixo horiei emango nieke erabakitzeko eskubidea.

Iritzi guztiak errespetagarriak direla esango nuke amaitzeko; halere, gizakiaren sufrimendua, etsipena… jokoan daudenean, muturreko iritzi eta debekuen tokian jarri ordez, sufrimendu hori pairatzen ari denaren azalean jartzea aholkatuko nuke.

Comments { 1 }
-->