Archive | 2006

Mare Nostrum

Betidanik uste izan dugu teknologia aurreratuena Alemania edo Ingalaterra inguruan dagoela. Beno, bada, oraingoan gertuago geratzen zaigun aurrerapen teknologiko bati buruz hitz egitera natorkizue, Mare Nostrum-a.

Funtsean ordenagailu bat da baina gure inguruko edozein ordenagailuk baino 5.000 bider potentzia handiagoa du, eta baita 18.000 ordenagailu arrunten antzeko memoria ere. Honek guztiak segundoko 40 bilioi operazio askatzeko aukera ematen dio. Sekulako ordenagailu hau Europan aurkitzen den indartsuena da eta Kataluniako Unibertsitate Politeknikoaren aldameneko gune batean aurkitzen da.

Jada ehunka zientzialari joan dira ordenagailu harrigarriarekin probak egitera, irakurri ahal izan dudanez, adar zientifiko oso desberdinetan baita erabilgarria makina hau, hala nola, farmazia, biologia, kimika, ingeniaritza edo materialen teknologietan. Baina nola? Mateo Valero BSC-CNSko zuzendariak dioenez:

MareNostrumak aplikazio asko dauzka, adibidez, unibertsoaren sorreraren simulazio kosmologikoa, abioi eta barkuen aerodinamika aztertzeko turbulentzien simulazioa, airearen kalitatea aztertzeko iragarpenak eta proteinen elkarreragina medikamentu berrien sorreran, besteak beste.

Makinaren tamaina bere ahalmena bezain ikusgarria da. 9X15X5 metro dituen kristalezko kutxatila batean kokatzen da zati nagusia. Kanpoaldean, lurperaturik, hozteko sistema eta energia transformadoreak kokatu dira. Gelaren beste alde batean segurtasun kontrolak eta etenik gabeko elikadura sistemak ezarri dira. Ea lan gastu ekonomiko zein energetiko honek tamaina berdineko fruituak ematen dizkigun.

Mare Nostrum

Gai hau borobiltzeko ideia bat gehitzea gustatuko litzaidake. Hasieran esan dudan bezala, jakina da gure herria ez dela inoiz teknologia inguruan gehiegi gailendu. Egun Euskal Herrian dugun bizi kalitate onarentzat nahitaezkoa izan da azken mende honetako industriaren garapena. Halere, azken urteotan hainbat sektorek ohartarazi duten bezala, konpetentzia indartsua datorkigu ekialdetik, eta aurrera segitzeko berrikuntzek eguneko kontua izan behar dute. Talde pribatuek bakarrik ekiten badiote ildo honi interes pribatuen menpe egongo da dena, eta ez herrialde osoaren onurarako egokitua.

Honengatik guztiagatik uste dut diru publiko gehiago igorri beharko litzatekeela horrelako zentro eta proiektuak sortzeko. Ikerketak epe motzera etekin garbiak ekartzen ez dituen arren, aurrera oso baliagarriak izango dira.

Gai hau interesatzen bazaizu, jarraitu irakurtzen.

Comments { 0 }

Etengabe etorkizunari begira

Etengabe aurrera begira, honela aurkitzen da gaur egungo gizakia eta bere ingurua. Denok ezagutzen ditugu guregana ekarriak izan diren teknologia berriak: telefono mugikorrak, internet, GPS eta abar. Baina hauen artean, ez pentsa, egon dira porrot egin duten proiektu asko ere. Hala eta guztiz, esandako azken hauek alde batera utziz, hainbat enpresa eta unibertsitate etorkizuneko kontzeptu eta teknologietan atsedenik hartu gabe ari dira lanean .

Nissan terranaut

Gaurkoan, automobilismoan murgilduko gara. Denok dakigun bezala, autoaren inguruan egindako prototipoak eta berrikuntzak asko dira. Halere, noizbait irteten bada (nire ustean laster izango da), izugarrizko oihartzuna izango duen berrikuntza hauxe izango da: mugitzeko urez baliatzen den motorra duen automobila. Imajinatzen duzue zenbat aldaraz dezakeen asmakuntza honek egungo errealitatea? Nazioarteko interesak, petrolioaren inguruan bizi dugun egoera larria…

Egia esan, ez dut artikulua horretarako idatzi, gaur egun irteten ari diren proiektu berrienak aztertzeko baizik. Duela gutxi, Arbitron Media izeneko aholku-sailak egindako ikerketen arabera, europarrek bi ordu eta erdiko batez bestekoa igarotzen dugu egunero auto barnean. Datu hauek diseinugileek lan egiteko era aldatu dute: lehen garraiobide bat besterik ez zena, bulego mugikor edo egongela bat izatera pasatzen ari da.

Mercedes Benz Bionic Car

“Berrikuntzak ezin dira teknologiaren ingurukoak bakarrik izan, kontzeptualak ere. Bulego mugikor bat izango balitz bezala irudikatu behar dugu autoa.� Shiro Nakamura (Nissaneko lehendakariordea)

Kontzeptu berri hauek gauzatu nahian, langileak hasiak dira dagoeneko lanean eta ez kanpoaldeko diseinuan bakarrik, non materialek eta diseinuek gidarien eta oinezkoen segurtasuna hobetu duten, barneko material berritzaileetan ere bai. Bestalde, segurtasun sistema berriak ere jarri dituzte martxan: segurtasun distantzia uzten duten autoak, talka egin aurretik automatikoki autoa gelditzen duten sistemak, GPS hobekuntzak, pantaila likidoak, konexio berriak, automobilaren bolantean konektaturik duaden Bluetooth, eta Wi-Fi sistemak…

Hau guztia ikusirik, inork ez du atzean geratu nahi eta enpresa bakoitzak bere moldaketak egin ditu.

    Nissan-ek high-tech izeneko lan zientifikoak egiteko prestaturik dagoen bidaiari-leku bat sortu du.
    Toyotak informazioa jasotzeko sistema berriak sortu ditu.
    Renault eta Mercedesek erregaia aurrezten duten diseinuak sortu dituzte.
    BMWek iluntasunean ikusten laguntzen duten izpi infragorriak jarri dizkio autoari.
    Fiat sistema guztiak zuzentzen dituzten bolanteak garatzen ari da.
    …

Toyota Endo

Azkenik, datu interesgarri bezala aipatu nahi dut Mojako desertuan gidaririk gabeko auto batek 215 kilometroko ibilaldia egin duela. Zorionez, hau hasiera besterik ez da. Ez al dira benetan harrigarriak teknologia berriak?

Comments { 0 }

Euskal Y-a

Eusko jaurlaritzak orain gutxi adierazi du Euskal Y-aren obrak aurten hasiko dituztela. Gure kasuan gainera, etxetik oso gertu ezagutuko ditugu berrikuntza hauek, Gipuzkoaren kasuan Ordiziatik Itsasondorako tartean hasiko baitira eraikuntza lanak.

Euskal Y-aren proiektuak izango duen kostua “eskandalagarria” dela esan daiteke, euskal Y-aren kostu osoa 4.178 milioi eurokoa izango baita, horietatik 1.642 miloi euro Gipuzkoako zatia egiteko bideratuko direlarik. Eusko Jaurlaritzak Espainiako Gobernuarekin egindako hitzarmenean, 2010.urterako AHT martxan jartzeko konpromisoa hartu zuen, bidaiarientzat eta merkantziak garraiatzeko balioko duelarik.

Honen haritik, gure herrietako udaletxeetan erreakzio ezberdinak izan dira, zenbait eragile, alderdi eta sindikatuk kontrako jarrera hartu dutelarik.

Proiektua exekuzio-planean dagoela jakin dugu, eta aurrerantzean gurekin bilduko direla espero dugu, obrak hasten badira zuzenean eragingo gaituelako.

Bestalde, Itsasondoko udalak albistea prentsaren bidez jaso dutela salatu eta proiektua gelditzeko eskatu du abiadura handiko trenak ondorio “txikitzaileak” izango dituelako.

Lotsagarria da egitasmoaren berri prentsaren bidez jakin behar izatea; sekulako desinformazioa dago.

Bestalde, aipagarria iruditzen zait AHT geditzeko mila arrazoi daude: eman zeurea! lemapean abian jarri duten kanpainari buruz berri ematea. Helburua herritarrei, gizarte eragileei eta alderdi politikoei AHT gelditzeko zer egiteko prest dauden galdetzea dela azaldu zuten. Bakoitzak bere arlotik konpromisoak hartzea ezinbestekotzat jo zutelarik.

Bukatzeko, AHTren Aurkako Asanbladak lanean jarraitzen duela argi utzi nahi izan zen, egitasmo antiekologiko eta antisozial horren inposizioaren kontrako mugimendua azkartu nahi dutela esanez. Asanblada honi buruzko informazio gehiago nahi baduzu, sakatu hemen.

Comments { 0 }
-->