Archive | 2006

Pello Ramirezen kontzertua Ordizian

Aupa, denoi! gaur, otsailaren 3a, ostirala, Pello Ramirez izango dugu protagonista Ordiziako Herri Antzokian. Betidanik izan duen musikarekiko zaletasunak diska paregabe bat kaleratzera eraman du: Haize oihalak, hain zuzen ere, non primerako konpositore eta musikagilea dela erakusten digun.

Pello Ramirez

Sarrerak Barrena kultur etxean daude salgai (9€) eta ikuskizuna 20:00etan hasiko da. Nahiz eta diskan agertzen diren instrumentu guztiak menderatu, bihar arratsaldeko kontzertuan, Juantxo Zeberiok pianoa joko du eta Maider Zapirain eta Juan Joxe Erauskinek biolontxeloa joko dute. Ikuskizun atsegina izango dela dirudi, beraz, animatu zaitezte eta bihar arratsaldean eskaini iezaiozue tartetxo bat ordiziar honi, bere izena gero eta ezagunagoa egiten ari baita.

Haize Oihalak Argazki hau bere diskaren portada da. 14 abestiz osatuta dago eta iraupen osoa 55 minutu ingurukoa da. Jende guztiari eskainita dagoela esan daiteke, eta edozein momentutan entzuteko aproposa da.

Besterik gabe, agurtzen naiz. Informazio gehiago nahi izanez gero klikatu hemen edo hemen.

Pello Ramirezen musikaz gozatzea espero dut.

Entzuteko klikatu irudian

Klikatu hemen entzuteko Gudu zelaia

Comments { 2 }

MARRAZKI BIZIDUNAK ETA KIROLA BAKARRIK?

Aurreko batean, gure blogean zer idatzi pentsatzen ari nintzela, Euskadi Irratiko saio batean, gai interesgarri baten inguruan hitz egiten ari zirena entzun nuen. Eztabaida Euskal Telebistari buruzkoa zen, honen programazioari buruzkoa zehazkiago esanda. Bertako hiztunek ETB1eko saio guztiak kirolean edo marrazki bizidunetan oinarritzen zirela zioten. Hori dela eta, arlo honi buruzko eztabaida artikulu batean publikatzea aproposa zela otu zitzaidan.

Ukaezina da, gaur egun, telebista kate hau sintonizatu orduko, kirolen bati buruzko (gehienetan futbolari buruz) informazioa ari digutela igortzen, bai ligako partiduren bat bai kirol ezberdinen kronikaren bat. Hau izan ezean, haurrentzako marrazki bizidunak aurkitzen ditugu.

Soilki bi atal hauek izanik, arazo honi aurre egiteko egokiena irtenbideren bat aurkitzea izango litzateke. Aukeretako bat gainontzeko kateek ezartzen dizkiguten kalitaterik gabeko programak ipintzea izango litzateke, Operación Triunfo edo http://www.granhermano.telecinco.es/ bezalakoak. Egia esan, honelakoek ez liokete onurarik egingo ez gure kulturari, ezta ikusle askori ere.

Beste bide bat euskal kulturan oinarrituriko saioak aurkeztea izan liteke. Hala nola, bertso saioak, pilota partiduak…. Baina ez al litzateke egokiago izango denetik eskaintzen duen euskal kate bat izatea??? Nik uste dut baietz. Txikiei eta gazteei zuzenduriko programazioa eskaintzea, kirola gogoko dutenak kontuan hartzea, telesailak eta zinema atsegin dutenei horixe ematea…hauxe izan daiteke, nire uste apalean, irtenbiderik egokiena.

Zuek zer deritzozue honi? Zein programa mota duzue gustukoen? Ikustea gustatuko litzaizuekeen zer ez duzue gaurko programazioan topatzen?

Comments { 0 }

Adi matematikari! SOKEN PROBLEMA: soluzioa aurkitzeko gai al zara?

Aurreko batean matematikaren inguruko jolas edo buruketekin etorri nintzaizuen, logikaren mundu zirraragarriaren ateak ireki nizkizuen eltxo “supersonikoaren” problema harekin.

Ingeniariaren bitakora pertsonalean zehar nabigatzen aritu ostean, bestelako problema batekin egin dut topo, eltxoarena baino zailagoa, agian, baina, noski, politagoa. Horrela, bada, modu honetako kuestioak maite dituzuenontzat, matematiken benetako zaleentzat edo erronka zailagoen bila zabiltzatenontzat, hona hemen beste problema bat:

    SOKEN PROBLEMA

Bi soka dauzkagu, ezberdinak elkarren artean eta materiaren egiturari, luzerari eta konbustio abiadurari dagokienean, zeharo irregular eta bestelakoak. Elkarren artean guztiz desberdinak diren bi soka, azken finean; su ematen badiegu, oso abiadura ezberdinetan erreko direnak. Eta, noski, pospolo kaxa bat ere badugu, honen barneko pospoloekin, sokei su emateko erabiliko ditugunak, alegia.

Sokek, ordea, badute antzekotasun bat: ordubeteko erretze edo konbustio denbora dute biek.

Eta jarraian, planteatzen zaigun arazoa: 45 minutu kronometratzeko eskatu digute. Ordea, ordularia galdua dugu. Nola lortuko dugu sokak erretzearen metodoa erabiliz denbora hori zehatz-mehatz determinatzea?

(Gogoan izan ezazue erregelarik nahiz neurri unitaterik ez daukagula eta soken egitura materiala zeharo irregularra dela: zati batetik bestera sokaren erretze abiadura asko alda daiteke. Beraz, ez dago, aurretik halako daturik ez daukagunez, sokaren zati bakoitzari erretze denbora bat iradokitzerik).

Galdera planteatuta geratzen da. Soluzioaren arrastorik bai? Zeuen lana da orain hura bilatzea; konplikatuxeagoa dugu hau, baina ea zorterik duzuen! Azken ariketa honen soluzioa ere egun batzuen buruan agertuko zaizue publikatuta. Bien bitartean, bizkorrena nor den itxarotea baino ez. Nor izango dugu irabazle berria? Anima zaitez!!

Aurreko artikuluan erreferentzia ematen banizuen ere, oraingo honetan ere Josep Maria Albaigés i Olivart-en bitakoraren helbidea ezin utzi dezaket aipatu gabe. Beraz, honelako problemak gustuko badituzue nahiz Albaigésen matematika kontuei buruzko informazio gehiago nahi izanez gero, ingeniariaren bitakora pertsonalean izango duzue honen guztiaren berri.

Comments { 0 }
-->