Archive | euskara

RSS feed for this section

ORTOGRAFIA ARIKETA BAT

By on 2005(e)ko abenduak 14 in hizkuntzarekin arazoak

Agur t’erdi atal honen jarraitzale zareten guztioi! Esan nizuen aurrekoan filosofia pixka bat aldatuta nuela edo, behintzat, aldatze bidean nindoala (azalpen errazagoak, ariketa osagarriak eta abar). Eta horri jarraituz, gaurkoan, ez dut azalpenik emango; gaur, zuzenean ariketa batekin hasiko gara. Egin behar duzuen gauza bakarra jarraian azaltzen den esteka klikatzea da. Esteka honek ariketa batera eramango zaituzte eta zuen zeregina dauden bi idazkera ezberdinetatik bat aukeratzea izango da. Bukaeran erantzunak ikusi-ri ematearekin batera, ortografia kontuetan nola zabiltzaten jakingo duzue. Animatuta? Ekin lanari, bada!

klikatu hementxe ariketa egiteko

Comments { 7 }

GUZTI HAU EDO HAU GUZTIA?

By on 2005(e)ko abenduak 6 in hizkuntzarekin arazoak

jolaus Gaur, gramatikaren txoko honetara, askotan oker erabiltzen dugun egitura baten berri ematera natorkizue. Ikusita azken azalpenak izan zituen oihartzun eta kritika konstruktiboak, arrazoiak eta azaldu beharrean, erabilera zuzenaren gomendioa ematera mugatuko naiz. Ziur nago batek baino gehiagok eskertuko duela! Gatozen, bada, harira.

GUZTI HAU EDO HAU GUZTIA?

  • Guz(t)i hau zurea al da?
  • Hau guz(t)ia zurea al da?

    • Erabilera hau hobesten da!

* Parentesiak adierazi nahi du bere barneko elementua aukerazkoa dela, hots, hau guztia edo hau guzia biak ondo daudela.

Euskaltzaindiak gogorarazi nahi du hau guz(t)ia, bide hartan guz(t)ian, horiekin guz(t)iekin eta kidekoak hobestekoak direla batasunaren izenean. Eta orobat gauza hauek guz(t)iak eta honen kidekoak.

Beraz, hau guz(t)ia eta guz(t)i hau esapideen artean, lehena da hobesten dena. Eta berdin gertatzen da bide hartan guz(t)ian / bide guz(t)i hartan, horiekin guz(t)iekin / guz(t)i horiekin eta hauen antzeko bikoteetan. Denetan lehen aldaera da hobestekoa. (Euskaltzaindiak, Bilbon, 1994ko urriaren 28an onartua)

Ikasitakoa praktikan jarri nahi duzu?

Arau hau bere ñabardura guztiekin irakurri nahi baduzu, jo ezazu hona.

Oharra: azalpen hau nire lagun eta lankide den jolaus IKTeroari eskaini nahi diot bereziki !!

Comments { 3 }

Irakurri eta oparitu euskaraz!

By on 2005(e)ko abenduak 3 in euskara

Urtero bezala, aurten ere badatoz Eguberriak eta, Eguberriekin batera, Olentzero eta Hiru Erregeak. Hamaika buruhauste sortzen zaizkigu opariak aukeratzeko orduan, eta are gehiago liburuak oparitzea erabakitzen dugunean.

Horretan laguntzeko asmoz, euskarazko 100 liburuen zerrenda helarazi digute ordiziarroi. Bertan ez da jasotzen merkatuan dagoen euskarazko liburuen eskaintza osoa. Mondragon Unibertsitateako Humanitate eta Hezkuntza zientzien Fakultateko (HUHEZI) Haur Liburu Mintegiaren laguntzarekin, 2004an argitaratutako liburu gomendagarri eta irakurrienak biltzen saiatu dira Hitzaro Euskara Elkartea, Udaleko Euskara Zerbitzua eta Udal Liburutegia herriko Mujika liburudendaren laguntzaz, IRAKURRI ETA OPARITU ekimenean. Hona hemen zertan datzan:

  • Zerrendatuta azaltzen diren euskarazko liburuak eskuartean izateko aukera izango duzu Udal Liburutegian, atarian jarriko ditugun panel batzuetan.
  • IRAKURRI ETA OPARITU paneletan, liburuak begiratu ahal izango dituzu; eta liburuaren bat oparitarako erosi nahiko bazenu, %25eko deskontu txartela emango dizugu.
  • Deskontu txartel horrekin Mujika liburudendara jo eta han eskuratu ahal izango duzu, ohi baino prezio merkeagoan. hitzaroko bazkide denak prezio erdian! %25eko deskontuari beste %25ekoa egingo baitio Euskara Elkarteak!
    • LEKUA: Udal Liburutegian
    • EGUNAK: Azaroaren 28tik urtarrilaren 5era
    • ORDUAk : astelehenetik ostiralera, 09:00etatik 13:00etara eta 16:30etik 20:00etara. Larunbatetan, 09:00etatik 13:00etara

    Ekimenak, irakurzaletasuna bultzatzea du helburu, batetik, eta euskarazko liburu produkzioari bultzada ematea, bestetik. Interesekoa eta erabilgarria izango zaizulakoan, IRAKURRI ETA OPARITU EUSKARAZ.

100 liburu horiek zeintzuk diren jakin nahi baduzu, onena Barrena Kultur Etxera joatea izango da eta bertan eskuratu ahal izango duzu zerrenda osoa. Dena den, libururik oparitu nahi ez eta beste euskal produkturen bat nahi baduzu, begira ezazu Euskarazko produktuen katalogoa.

Comments { 0 }
-->