Archive | kirola

Espero zen bezala, Samuel Eto´o jokalari kamerundarrak eraman zuen Afrikako urrezko baloia, Nigeriako African Conference Hall-ean ospatu zen galan. Bertan, bere taldeko presidente eta zenbait ordezkari alboan zituela, Afrikako futbol jokalari onena dela adierazten duen saria jaso zuen hirugarren urtez jarraian.

Aurreko urteetan ez bezala, aurtengoan izan ditu sari hau bere eskuetan erortzea arriskuan jarri duten lehiakideak. Chelsea taldeko Didier Drogba jokalari marfildarrak, Eto´ok baino bi puntu gutxiago bakarrik lortu zituen. Talde ingelesarekin egindako denboraldi bikainak, futboleko onenen artean tarte bat egitea balio izan dio.

Bartzelona taldeko presidentea eta taldekideak eskertu ondoren, Afrikako umeei eskaini zien saria. Ez dugu ahaztu behar, Eto´ok beste edonork baino gehiago bultzatu duela hirugarren munduko umeenganako laguntza, eta kirolean lortutako arrakastengatik ez ezik, bere herrialdeko umeen alde egindako lanagatik ere ezagutzen dugula jokalari hau.

Beraz, Samuel Eto´o futbolaria zoriontzea besterik ez zait gelditzen, eta futbola gustuko duzuenok, hemendik aurrera, sari honen banaketa arreta handiagoz jarraitzea espero dut, herrialde hauetatik ateratako jokalarietan egon baitaiteke, futbolaren etorkizuna, azkeneko urte hauetan ikusi ahal izan dugun bezala.

Gaia interesgarrria iruditzen bazaizue, jarraian topa dezakezue informazio gehiago:

Bartzelona taldeko webgunea

Chelsea taldekoa

Samuel Eto´o

Asteazken gauean, Gasteizko Buesa Arena pabilioian jokaturiko partiduan, Tau Baskonia suertatu zen garaile Lietuvos Rytas talde lituaniarraren aurrean, 96-89ko markagailuak islatu bezala. Partidu hau Euroligako Top 16ko 3. jardunaldiari zegokiona izan zen eta garaitza honekin Tau bi garaipenekin kokatzen da, sailkapenean 2. dagoelarik. Izenburuak ondo dioen bezala, Tau etxeko partidetan garaiezina da, urte eta erdi daramalako konpetizio honetan etxean porrotik jaso gabe. Hala ere, etxetik kanpo gabezia ugari erakusten du eta bere benetako kasta galtzen du, iragan astean Moskun CSKAren aurkako porrota lekuko.

Lehen laurdenari lo ekin zion Tauk eta baloi galtze eta kontraeraso azkarren ondorioz, erraz nagusitu zen Lietuvos aurreneko minutuetan. Hala ere, Erdogan, partiduko izarrak, pare bat hirukorekin eta Drobnjak berpiztuaren aportazioari esker, Tau abantailarekin iritsi zen laurdenaren amaierara (20-17).

Bigarren laurdenean, ordea, partiduaren kolorea guztiz aldatu zen eta han bildu ginen 9.000 zaleok azken urteetako Baskonia onenaz gozatzeko parada izan genuen. Aipagarriak dira Erdoganen hirukoak eta baita Jacobsenenak ere. Beraz, Tauk ondo aprobetxatu zuen 6,25eko marra, baina atsekabe handiz hartu genuen ( IBAIk gehienbat!) Hansenen aportazio urria. 48-38ko markagailuarekin joan ziren, horrela, aldageletara.

Hirugarren laurdenari dagokionean, Tau berriro ere prezipitazioan erori eta estu eta larri ibili zen lituaniarren hiruko zaparradari eusteko. 64-63ko markagailuarekin eta denok ahal genuen presio guztia egiten genuen bitartean, pabilioian talde lituaniarra kikiltzeko, partidua gori-gori jarri eta zenbait ika-mika sortu ziren jokalarien artean. Horrela uler daiteke, Lietuvoseko entrenatzaile Spahija epaileek egotzi izana bi teknika adieraziz. Ezbairik gabe, jokaldi horrek ordura arteko berdintasuna Tauren alde jarri zuen balantza, sartutako lau jaurtiketa libreez gainera, psikologikoki ere eragin zielako kanpotarrei. Gustura asko hartu genuen oparia izan zen, dudarik gabe. 71-66ko markagailuarekin bukatu zen laurden hau.

Azken laurdenari nagusitasunez ekin zion Tauk eta aldea handitu zuen Erdoganen eskumutur finari esker. Hala ere, denok garaipenaz konbentzituta eta jai giroan geundenean, pare bat baloi galtzek Lietuvos partidara bueltatzea suposatu zuten. Baina Tauk zuen aldea nahikoa izan zen 96-89ko markagailua bere horretan utzi eta garaipen on eta borrokatu bat lortzeko.

Partiduko izarra Erdogan izan zen 27 punturekin, Jacobsenek ondo lagundua 14rekin eta aipagarria da Drobnjak-en suspertzea 9 punturekin.
Bestalde, esan behar dut nire Hansen eta Splitterren aldeko pronostikoa amutsa gertatu zela (Hansen gaizki, eh, IBAITXO?).

Azkenik aipatu 160 ordiziar inguru bildu ginela bertan eta etxerakoan autobusean nabari zela alaitasuna.

Hona hemen Gasteizko Jon Rejadok partiduari buruz BERRIAN idatzitakoa.

Dakigun bezala, Ordizia Rugby taldeak orain dela bi asteko larunbateko partiduan Donostiako Bera-Bera Rugby taldearen aurka ez zuen zorte handirik izan, baina bihar Monte Ciencias Rugby taldearen aurka jolastuko du eta denok irabaziko duelakoan gaude. Ordiziako taldeak 15 puntu gehiago ditu sailkapenean eta horrek itxaropen handia ematen digu.

Oraingo honetan, irabazteko aukera garbia dugu. Baina, kontuz! Sevillakoek azkenak doaz sailkapenean eta, suposa dezakegu, ahal duten guztia egingo dutela garaile suertatzeko.

Ordizia Rugby elkarteko foruan ikus ditzakezue espero dituzten emaitzak eta parte har dezakezue nahi baduzue. Foru honetan, gainera, jokalariekin hitz egiteko aukera izateaz gain, hainbatek sartzen dituen argazkiak ere topa ditzakezue.

Partiduari buruzko informazio gehiago nahi baduzu, klikatu hemen.