Archive | orokorra

Hainbat astronomo Apophis izeneko asteroide baten ibilbidea aztertzen ari dira eta, dirudienez, aukera bat dago 45.000tik 2036ko apirilaren 13an lurra jo dezan. Hori gertatuz gero, herrialde edo hiri handiren bat deusezta dezake asteroide honek 146 metroko luzera baitauka. Eta ez da bakarra, David Morrinson zientzialariak dioenez, %0,1eko aukera dago “2004 VD17� meteoritoa lurrarekin talka egiteko 2102. urteko maiatzaren 4an. Azken honek lurra joko balu, Apohis asteroidea baino askoz deuseztagarria izango zen. Ideia bat izan dezazuen, existitzen diren bonba nuklear guztiek batera eztanda egitea bezala izango litzateke eta ziurrenik dinosauroen antzera amaituko genuke. Azken honek 500 metroko luzera du eta 1000 tona inguru pisatzen du. Eta bi meteorito horiek ez dira bakarrak NASAren ustez, 20 mila objektu arriskutsu gehiago daude oraindik lokalizatu gabe.

Nahiz eta hori gertatzeko aukerak oso txikiak diren, NASAko kideak hasi dira objektu hauek lokalizatzeko eta hauen ibilbidea hobeto aztertzeko neurriak hartzen. Ez hori bakarrik, beraien ibilbidetik desbideratzeko ideiak aztertzen ere ari dira.
Gainera, objektu hauek zertaz eginak dauden aztertzea ere oso garrantzitsua da. Hori jakin ezean, Armageddon filmaren antzera bonba bat jaurtitzea ezinezkoa litzateke, agian, alderik alde zulatuko zuelako baina bere ibilbidetik urrundu gabe.

Beraz, ideia desberdinen bila ari dira astronomoak. Ideia horietako bat ondorengo hau da: espazio ontzi batez eta grabitateaz baliatuz, bidetik desbideratzea. 12 egunen buru egingo luke bere zeregina eta 300 milioi dolar kostatuko litzateke proiektu hau aurrera eramatea.

Greenpeacek bere gunean elikagai transgenikoak naturaletatik bereizten dituen zerrenda bat egin du. Zerrenda honen bidez, bakoitzak ikus izango du zein produktu diren benetan naturalak eta zeintzuk, bestetik, transgenikoak. Honi esker, supermerkatuetara joatean, bien arteko bereizketa egin ahal izango dugu.

Erakunde honek honekin lortu duena legearen aldetik produktu transgenikoei buruz dagoen informazioa eza konpontzea da. Webgune honetan bi zerrendekin egingo dugu topo. Bata berdea izango da eta bertan agertuko dira zeintzuk diren benetan naturalak. Bestean, zerrenda gorrian, produktu transgenikoak azalduko zaizkigu. Hauekin izan beharko dugu kontu. Elikagai transgenikoen izenak emateaz gain, gune honetan hauek ekoizten dituzten enpresen izenak ere agertzen dira. Gai honek benetan kezkatzen bazaituzte, egin klik helbide honetan edo, bestela, informazio gehiago eskuratzeko lortu Greenpeacek argitaratu berri duen Zerrenda gorria eta zerrenda berdea izeneko liburua.

Baina zer esanahi du transgeniko hitzak? Ezaugarri berriak izateko material genetiko berriren bat txertatutako izakia da, hau da, genetikoki eraldatua izan dena. Zenbait multinazionalek produktu hauek erabiltzen dituzte etekinak handitzeko.

Edonola ere, elikagai transgenikoek osasunean eta ingurunean eragin kaltegarriak izan ditzakete:

• Elikagai hauek naturalak direnen inguruan jarriz gero, beste barazki espezien arteko kutsadura gerta daiteke.

• Osasunerako arriskutsuak izan daitezke. Hauek dituzten geneek antibiotikoenganako erresistentzia eragin dezakete, bakterioak gero eta indartsuagoak bihurtuz.

• Erasotzen dituzten intsektuen aurka egiten dutenez, ekosistemaren oreka apur dezakete.

• Baimendu gabeko produktu bat zabaltzeak, bestalde, izugarrizko hondamendiak ekar ditzake.

Garbi dago, gaur egun, honelako produktuak areagotzen ari direla. Gainera, daukagun informazio urria dela eta, ez gara ohartzen hauek gure osasunean izan ditzaketen ondorio latzez. Dena den, Greenpeacek egin duen lanak arrisku hauek guztiak aintzat hartzen lagunduko digulakoan nago.

Teknologia aisialdiaren zati handiagoa bilakatzen ari da aurrera egin ahala. Izan ere, telebistak, Internetek, eta abarrek esfortzu ñimiñoa eskatzen dute aisialdiko ekintza tradizionalekin alderatuz gero. Hori dela eta, kirolak, mahai jokoak edo irakurketak, besteak beste, ospea galdu dute.

Egia esan, ez da harritzekoa teknologiaren aurrerapenak eragindako lan gutxiagoren beharrak gero eta alferragoak bilakatu baikaitu. Irensten errazak diren telesail, film eta lehiaketek denbora ugari kentzen duten eta ahalegin nabarmena eskatzen duten ekintzak ordezkatu dituzte.

Baina, kaltegarria ote da azken urteotako joera hau? Dirudienez, indarra galtzen joan diren ekintzek bizi-kalitatearen hobekuntza dakarte; adibidez, kirolak osasuntsu mantentzeko egokiak dira, mahai jokoek burmuina lantzen laguntzen dute edo irakurketak hizkuntzaren erabileraren trebetasunean eragin zuzena du.

Hala ere, teknologia berriak ezin dira suntsitzailetzat hartu gaurkotasunezko berriez informatzeko modu aproposa dira eta. Telebistak eta Internetek, esate baterako, informazio eza ikaragarri gutxitu dute.

Ondorioz, arazoa konpontzeko bidea ez da teknologia hauek alde batera uztea, esfortzuaren eta aisiaren arteko oreka aurkitzea baizik.