Tag Archives | abantailak

Komertzio txikien heriotza?

kaleaGabonak edo udako oporrak, aste bukaera edo astegunak, zubiak edo jai egunak… edozein egunetan zerbait erosi behar badugu -bai arropa, bai oinetakoak, bai janaria, bai etxetresna elektriko edo hamar mila gauza gehiago-, dendetara jotzen dugu. Nora joaten gara, baina? Gure herriko komertzio txikietara edo merkatal gune handietara? Edozein egunetan, merkatal gune batera joanez gero, beti leporaino dagoela ikusiko dugu; gure herriko dendetara joanez, aldiz, askotan erdi hutsik edo hutsik ikusiko ditugu. Zer gertatzen ari da?, zergatik nahigo ditugu merkatal guneak komertzio txikien ordez?, zer du handiak txikiak ez duenik? Pasa gaitezen, bada, gaia atalez atal jorratzera.

Merkatal guneak ez dira atzo goizeko kontuak, aspaldikoak dira eta arrakasta handikoak gehienetan. Egia da erosotasun handiagoa, aukera anitz nahi dugun objetua aurkitzeko, promozio handiagoak produktuetan, autoentzako aparkaleku ugari, aisialdirako guneak… aurkituko ditugula merkataritza gune handietan. Hauek guztiak, orokorrean, ezin aurki ditzakegu komertzio txikietan; dena den, txikiek ere badituzte euren alderdi onak.

Hasteko, harrera. Komertzio txiki tradizional batera joaten garenean, atentzio handia eskaintzen digute. Gune handiak jendez lepo egoten direnez, korrika eta presaka hartzen gaituzte, eta edozein gauza saltzen digute. Bestetik, kalitatea. Hauetan, orokorrean, kalitate oneko produktuak aurki genitzake; izan ere, adibidez, elektronika alorrean dugun “Media markt ” delako kate handian,prezio merkeak aurkitzen ditugu, baina askotan ezin konpara ditzakegu komertzio txiki batean aurki ditzakegun produktuen kalitatearekin. Ondorioz, konfiantza ere eskaintzen digute txikiek, bere lanean espezializatuagoak daudelako.

merkatal guneBien alderdi on eta txar batzuk gainetik aipatuta, zer ari da gertatzen? Hauxe, bada, komertzio txikiak hiltzen ari direla. Bai, etorkizuna leizea baino ilunago dute komertzio txikiek! Eta hein handi batean, merkatal guneen ondorioz da, batez ere inguruan gertu badute baten bat. Jende askok, abantaila gehiago aurkituta, nahiago izaten ditu merkatal guneak; horregatik, komertzio tradizionaletara joateari utzi dio. Azken finean, merkatal guneek bai promozio, bai beherapen, bai publizitate edo mila gauza gehiagorengatik jendea irabazten dute; eta txikiek, ordea, eskaintzak edo beste edozer gauza egiten ahalegintzen badira ere jendea erakartzeko, ez dute irabaztea lortzen, ezta eta lortuko ere; izan ere, arestian esan bezala, handiak txikiak jaten ari baitira.

Are gehiago, krisian murgildurik egoteak ez du ondorio onik. Hemen ere zatirik okerrena komertzio txikiak nozitzen du,kontsumoa moteltzeak zuzenean eragin baitio komertzio tradizionalari; izan ere, jendeak diru gutxi gastatu nahi eta, behin eta berriz bai prentsan eta bai telebistan merkatal guneen eskaintza handiak ikusten ari garenez, horra jotzen du. Ondorioz, krisiak bultzatuta, urteko jai egun batzuetan, komertzio batzuk ateak ireki dituzte, mozkinak berreskuratzeko asmotan. Halere, agian ez da bide egokia; izan ere, honek merkataritza-gune handiek gauza bera egitea ekar lezake.

Aurreko guztia laburbilduz, zera esan daiteke: erosotasun edo aukera gehiago bilatzera merkataritza guneetara jotzen dugu. Nolanahi ere, merkatal zentro handiak ez du, inondik ere, merkatari txikia eta herriko bizitza sustatzen; aitzitik, faktore ilun bat da komertzio txikiarentzat. Beraz, iruditzen zait saltoki tradizionalak indartu beharrean daudela herriko ekonomia, nortasuna eta kultura galdu ez daitezen. Ez baitugu hori galtzea nahi, ezta?

Hona hemen bideo bat egungo errealitatearen erakusle:

Comments { 6 }

Nik herria nahiago!

HiriaAurreko batean, lagun batekin hitz egiten nengoela, jabetu ginen hurrengo egunean Donostiara joan behar genuela enkargu bat egitera. Horrela izanik, hurrengo egunean ikastola amaitu bezain pronto, trena hartu eta Donostiarantz abiatu ginen. Trenean geundela eta nola jakin gabe, bat-batean herri eta hiri handi baten arteko ezberdintasunez eleketan ari ginela ohartu ginen eta, esanak esan, “nik herria nahiago” esaldiarekin amaitu genuen solasaldia. Esaldi hau gero eta gutxiago entzuten dugu. Zergatik? Zer dute herriek hiri handiek ez dutena?

Hasteko, herri eta hiri baten arteko diferentziak bereizi behar ditugu. Hiria biztanle dentsitate handiko leku eraiki bat da, zerbitzuak (hezkuntza, aisialdirako, osasuna…) bermatuta dituela. Herria, aldiz, populazioa txikiagoko lekua izango da, eta zerbitzu gutxiago izango ditu.

Hasieran aipatu bezala, gaur egun gero eta gehiago dira hirietara bizitzera joaten direnak, abantaila gehiago ematen dituztela pentsatuz; halere, herriek ere badituzte onurak, nahiz eta askotan ez jabetu; izan ere, elkar hobeto ezagutzen da jendea, eta horrela, laguntza behar izanez gero, errazagoa izango da elkarri esku ematea.

Herrien munduarekin jarraituz, hauek lasaitasun eta aire garbiagoa dute, ezin konpara daiteke herri bateko giroa eta hiri handi batekoa. Hirietan, nonahi aurkitzen ditugu autoak, gora eta behera, jendea presaka eta zarata handia, honek guztiak kutsadura ekarriz. Herri batean, aldiz, auto, jende eta zarata gutxiago dago. Baina ezberdintasunik nabariena trafiko aldetik dator; izan ere, hiri handietan ibilgailu kopurua pairaezina egiten da. Ez hori bakarrik, autoa aparkatu nahi izanez gero, gehienetan ordaindu beharra izaten da. Londresen, adibidez, autoz hirigunera sartzeko, tasa bat ordaindu behar da. Egia da, trafikoa arintzeko hirietan bide gorriak, tranbia, kaleak oinezkoentzat… egiten ari direla; hala eta guztiz ere, orokorrean trafikoak jasangaitza izaten jarraitzen du. Askotan, hirietatik ateratzeak minutu luzeak eramaten dizkigu.
Herria

Are gehiago, herrietan trafiko gutxiago dagoenez, segurtasun handiagoa dago. Horrela izanik, ume edo gaztetxoak lasaitasun eta segurtasun handiagoarekin ibiliko dira; izan ere, hirietan segurtasun eskasa dago alderdi honetan. Ez hori bakarrik, herrietan aztura da, adinez oso handiak ez badira ere, umeak lagunekin kalera joatea. Hirietan, berriz, segurtasun urriarengatik, adin dezente gehiago dutenean utziko zaie kalera ateratzen lagunekin.

Jarraitzeko, hiri arras handietan berdegune gutxi dago. Hiri horietako biztanle askok ez dakite zer den lurra edo belarra zapaltzea eta, jakina, jakiteak ez du ogirik jaten! Ez hori bakarrik, hiri handiko zenbait biztanlek ez du inoiz ikusi barazkiak non hazten diren, ez bada telebistan. Modu berean, herrietan paisaia berde

zoragarriak aurki ditzakezu eta aziendak belazeetan, baina hiritar askok hau oso gutxitan ikusia izango du.

Jakina denez, hiri batek herri batek baino aukera handiagoak ematen dizkigu alderdi askotan: aisialdirako, edozein motatako saltoki-guneak aurkitzeko, garraio publikoan… Herri batean hauek guztiak topatzeko zailtasun handiagoak izango ditugu. Dena dela, egun, garraio publikoa (herri askok dute, adibidez, trena) edo bakoitzaren autoa erabiliz, egun pasa hirira joan zaitezke eta listo; horrela, aukera duzu zerbitzu horietaz baliatzeko, hirian bizi gabe.

Aurreko guztia laburbilduz, zera esan daiteke: hiri handi bateko zerbitzuak herri batean ezin aurki ditzakezun bezala, hiri handi batean ezin duzu herri bateko lasaitasuna, segurtasuna edo aire garbi hori topatu. Ondorioz, zure esku dago nola bizi nahi duzun aukeratzea. Baina ez al duzu nahiago lasai, seguru eta aire garbiagoarekin bizi?

Jarraian, Goierriko herri batzuen paisaiak ikus ditzakezue bideoan:

Comments { 7 }
-->