Tag Archives | euskaljakintza6

Aurten ere Buber Sarietan hautagai, lagun askorekin batera

By on 2010(e)ko azaroak 18 in euskaljakintza

Iaz, euskara ondoen sustatzen duen weba kategorian Buber Sarietarako proposatu gintuztenean, ilusio handiz hartu genuen izendapena. Kursaalean ospatu zen finalean izan ginen, eta gau oso atsegina igaro ere bai. Hala ere, ez genuen saria Ordiziara ekartzea lortu; izan ere, txoko honetan ibiltzen zaretenok jakingo duzuen bezala, Tropela izan zen gure mailan garaile.

Aurten, sarien 8. edizioa abian da eta, oraingoan ere, norbaitek eman du gure izena. Oso eskertuta gaude, gurekin batera euskararen alde lan izugarria egiten duten webguneak -horietako asko lagunenak- baitaude. Guretzat ohore izugarria da haiekin batera hautagaien zerrendan egotea.

Alabaina, Gasteizen ospatuko den finalean egoteko, zuen laguntza behar dugu. Beraz, inork botoa eman nahi badigu (igandera arteko epea dago), hona hemen jarraitu beharreko pausoak.

  • Iaz sarietan botoa eman bazenuten/bazeniguten, ez duzue berriz kontua sortu behar; nahikoa da iaz sortutakoan sartzearekin (hementxe sartu, eta email-a eta pasahitza idatzi)
  • Kontua sortu behar baduzue, jo helbide honetara ( http://buber.interneteuskadi.org/web/index.php/login ) eta jarraitu ondorengo pausoak:

Buber sarietan bozka egin

Comments { 3 }

Euskaljakintza6kook hementxe gaude, lanerako prest!

By on 2010(e)ko urriak 24 in euskaljakintza

Oraingo honetan, euskaljakintza6ko kideak izango gaituzue gertu, gune honen kontrolpean. Bene-benetan eskerrak eman nahi dizkizuegu, urtez urte, ahalegin eta lan handiz webgunea aurrera atera duzuen guztiei, eta, oroz gain, Maiteri; izan ere, bere ekarpenak -eta bere etengabeko lana gune honek bere bidean aurrera egin dezan- izango ez bagenitu, web honen etorkizuna pikea baino beltzagoa izango bailitzateke!

Argi dago aurreko belaunaldiek burututako guztiak eragin ikaragarria izan duela gaur egungo ikasle askoren euskararen erabileran. Aurten guri dagokigu horren guztiaren ardura, baina aitortu nahi dugu oso lagungarria gertatu zitzaigula, bere garaian, EGAko azterketa prestatzeko hemen topatu genuen guztia (berridazketak, aditzak, irakurmenak…). Guk sortuko ditugunak ere zuentzat baliagarri eta mesedegarri izango direlakoan gaude; hortaz, gure onena ematen saiatuko gara.

Gure txoko honetan, euskarari eta haren lanketari buruzko eduki mordo bat topatuko duzue. Ez hori bakarrik, hemendik aurrera argitaratuko ditugun artikulu eta elkarrizketak ahalik eta interesgarrien egiten ahaleginduko gara. Hori da, behintzat, gure asmoa. Lanean jarraitu nahi dugu, euskararen presentzia sarean zabalduz eta guk sortutako guztia zuekin partekatuz; horregatik, zuek ere ongi etorriak zarete gure txoko honetara. Sartu deitu gabe!

Comments { 2 }

Ez adiorik, euskaljakintza5! Orain, euskaljakintza6, zuen txanda da…

By on 2010(e)ko urriak 20 in euskaljakintza

Ziurrenik, hau izango da orain arte idaztea gehien kostatu zaidan bidalketa. Ziurrenik, hau izango da gehien hausnarrarazi didana. Behin baino gehiagotan idatzi dut, buelta asko eman dizkiot buruari… Uste dut, baina, lortu dudala nik nahi nuen kutsuaz blaitzea azkenean.

Hasiera-hasieratik sinetsi nuen Euskal Hizkuntza eta Literatura lantzeko eskaini zitzaigun aukera berritzaile honetan. Euskaltzaindiako arauak landu ditugu, literatura ere bai; elkarrizketak egiten ikasi dugu, iritzi artikuluak idazten ere bai… baina hori guztiaz gain, internetek izan dezakeen indarraz jabetu gara. Ikasgaiari zegozkion konpetentziez gain, sarea baliatuz sakonagoa den filosofia bat transmititu digu Maitek, sortu eta partekatzearena. Segurtasuna eman didan esperientzia izan da, bete egin nauena eta, zinez diotsuet, ez nuke ezerengatik aldatuko.

Urtebete igaro da iaz esperientzia honi hasiera eman genionetik, eta gaur bi sentimendu kontrajartzen zaizkit. Alde batetik, lana nahiko txukun egin dudan susmoak ematen didan poztasuna; bestetik, tristezia, iritsi baita lekukoa pasatzeko eguna. Ziklo bat bete dudala argi dago eta, Maitek uzten badit, beste bat hasiko dut, aurrekoa hasi nuen ilusio eta gogo berberaz (edo handiagoz). Nire asmoa parte hartzen jarraitzea da, euskaljakintzako  partaide izateari eustea.

Amaitu baino lehen, aholku bat eman nahi nizueke, horretarako norbait banaiz bederen, ondoren zatozten horiei: aprobetxatu eta gozatu Maitek eskaintzen dizuen aukera hau. Uler ezazue blog hau zuen ideiak mundura zabaltzeko gunetzat, euskararen ikaskuntzan laguntzeko txokotzat; eta ez eginbehar hertsigarritzat. Ereindakoa bueltan etorriko zaizue. Nire aldetik, ezer gehiago ez. Ez adiorik euskaljakintza. Ongi etorri, euskaljakintza6!

Comments { 0 }
-->