Archive | euskara

Igande honetan ere, urriak 16, beste egun zoragarri bat igarotzeko aukera izango dugu. Jakingo duzuenez, urtero legez, Nafarroa Oinez ospatzekotan da. Oraingoan, Iñigo Aritza ikastolari egokitu zaio festa hau prestatzea. Kilometroak jaian antzera zenbait ekintza, tailer, jolas eta kontzertu izango dira bertan. Egitaraua eta kokalekua zehatz-mehatz ikusteko klikatu hemen!

Ikastetxe hau proiektu potolo xamar batean murgiltzekotan da; izan ere, beste egoitza berri bat eraikitzekotan baitira. Beraz, euren xede nagusia babes soziala eta laguntza ekonomikoa lortzea da.

Gainera, 2005eko NAFARROA OINEZ-a berezia izango da. 25 urte beteko dira lehendabizikoa egin zenetik, eta behar den moduan ospatu nahi dugu, besteak beste, euskararen alde hainbeste egin zuen Jose Maria Satrustegi euskaltzale, antropologo eta etnografo sakandarra omendu nahi dugu.

Hortaz, berezia izanik, anima gaitezen bertara hurbiltzera. Baina, eguna iristen den artean, goza ezazue prestatu duten bideoaz eta abestiaz!

Abestia
NAFARROA OINEZ 2005 abestia jaitsi
“LANERA”
Hitza: Castillo Suarez
Musika: Ataka Kolorez

Gure basurdea basatia da
Nahiago du basoan bizi
Herrira jaistea baino
Nahiago du libreki bizi
Gure basurdea ausarta da
Belarriak tente ibiltzen da
Ehiztariengandik ihesi doa
Jende berria ezagutzeko

OINK OINK OINKNEZ
OINK OINK OINKNEZ
IBILIKO DA
OINK OINK OINKNEZ
OINK OINK OINKNEZ
IBILIKO DA

Gure basurdea nekaezina da
Traba guztiak saihestuko ditu
Nafarroa Oinezera jaitsi
(e)ta ezin hobeki pasatzeko

Ikastolan e(g)inen diogu harrera
Oinezaren alde dator lanera
Euskararen festara heldu da
Euskaltzaleekin elkartzera

OINK OINK OINKNEZ
OINK OINK OINKNEZ
IBILIKO DA
OINK OINK OINKNEZ
OINK OINK OINKNEZ
IBILIKO DA

GURE IKASTOLARA
IRITSI NAHI DUELAKO
GURE IKASTOLARA
IRITSI NAHI DUELAKO

Ilea latza eta sarria izanagatik
Letaginak luzeak izanagatik
Askotan muturka ibiliagatik
Jai giroan bera da nagusi
Maite dugu gure basurdea
Taldean ibiltzea gustuko duelako
Ikastolakoekin batera
Dantzatu egin nahi duelako

OINK OINK OINKNEZ
OINK OINK OINKNEZ
IBILIKO DA
OINK OINK OINKNEZ
OINK OINK OINKNEZ
IBILIKO DA

GURE IKASTOLARA
IRITSI NAHI DUELAKO
GURE IKASTOLARA
IRITSI NAHI DUELAKO

OINK OINK OINKNEZ
OINK OINK OINKNEZ
IBILIKO DA
OINK OINK OINKNEZ
OINK OINK OINKNEZ
IBILIKO DA

Ahotsa: Gorka Armendariz (Leihotikan)
Kitarra: Jabier Etxeberria (Skalariak, Los Hurakanes)
Kitarra: Israel Santxez (Los Hurakanes)
Baxua: Luisillo Kalandraka (Skalariak, Los Hurakanes)
Esku-soinua: Edor Zubeldia
Bateria: Koldo Lasa (Los Hurakanes)
Koruak: Olatz Aldasoro, Titi (Leihotikan), “Ikastolako neska mutilak”
Ekoizlea: Marino Goñi

Aurten lehenengoz Kultur Hamabostaldia antolatu du Hitzaro Euskara Elkarteak, urriaren 10etik 21era bitartean, bazkideei eta herritarrei orohar urtean zehar eskaini ohi dien egitasmoa osatzeko. Izan ere, euskara bultzatzea ez ezik, euskarazko kultur eskaintza ere aberastu nahi baitute.

Bazkideei eta mintzalagunei begira antolatu dute Kultur Hamabostaldia. Kontua da, euskaldun zaharren sarea zaindu eta indartzearekin batera, euskara bigarren hizkuntza gisa eskolan ikasi duen euskaldun berriari duen hizkuntza-ezagupena sendotzen, euskal kulturaren aberastasunaz jabetzen eta bere harreman sarea zabaltzen lagundu behar zaiola.

Gauzak hala, Kultur Hamabostaldian kalitatezko emanaldiak eta adin guztiei begirakoak bildu dituzte, guztiengan euskarazko kultura kontsumitzeko ohitura sartzeko: musika kontzertua, ipuin-kontakizuna, bertsolarien kale-animazioa, ikus-entzunezkoa…

Egitarauaren 3.600 ale eman ditugu argitara eta etxez etxe banatu. Kartelak ere atera ditugu, herriko eta eskualde guztiko hormetan itsasteko. Emanaldiak, egitaraua, kartelak…horrek guztiak kostu handia ekarri dio Hitzarori; gutxi gorabehera, 5000 euro. Eta, gastuei aurre egin ahal izateko, babesle eta laguntzaile bila aritu gara, ate joka.

Ahalegin handia egin dute, bai antolatzaileek, bai babesle eta laguntzaileek ere. Erantzuna ere, maila berekoa izatea nahi lukete.

Egitaraua:

• Urriak 10 (astelehena) : Jon Arretxeren Griot ikus-entzunezkoa. Barrena Kultur Etxean, 19:00etan.
• Urriak 12 (asteazkena): Bertsoen Agerpide Interkulturala kale-animazioa. Herrigunean zehar, 13:00etan.
• Urriak 14 (ostirala): Ilhargi-min kontzertua. D’elikatuz gunean, 22:00etan.
• Urriak 17 (astelehena): Nora hoa neska, Txirene taldearen antzezlan komikoa. Barrena Kultur Etxean, 19:00etan.
• Urriak 19 (asteazkena): Pello Añorgaren ipuin-kontaketa. Barrena Kultur Etxean, 17:00etan, 5 urtetik gorako haurrentzat.
• Urriak 21 (ostirala): Kantu Jira (herrigunean, 19:30ean Udaletxe parean hasita) eta Kantu Afaria (Plaza Nagusian, 20:30ean hasita).

  Egunak inguratzen doazen heinean, ekitaldi bakoitzaren berri zehatzagoa ematen joango gara.

Lehengo egunean Kontaizu aldizkaria berriz ere martxan dela jakin izan nuen eta horren berri ematera natorkizue. Zuetako askok dagoeneko jakitun izango zarete pasa den ostiralean sustatun azaltzen zelako baina, nire ikasle askok gazteentzako espreski pentsatutako aldizkari hau ezagutzen ez dutenez, lerro hauen bidez berau ezagutzera eman nahi dut! Hasteko, esan beharra dago Kontaizuren helburua euskaljakintzaren helburuetako batekin erabat lerrokatua dagoela: euskararen presentzia komunikabideetan zabaltzea.

Kontaizu aldizkari digitalak urriko alearekin ikasturte berriari ekin dio. Gazteentzako euskarazko aldizkari digital hau euskararen normalkuntzaren ingurumarian kokatutako egitasmoa da, Ikastolen Elkarteko egitasmoa, eta euskarak komunikabideetan gero eta agerpen gehiago izatea du helburu.

Bestalde, gure kasuan hain garrantzitsuak diren helburu bi ere zuzenki ukitzen ditu: irakurzaletasuna suspertu eta euskaraz idaztea bultzatu.

Aldi berean, gazteen artean euskarazko irakurzaletasuna sustatu nahi du, baita euskaraz idazteko ohitura sendotu ere. Horretarako argitalpenean gazte jendeari interesatzen zaizkion gaiak jorratzen dira, esate baterako, musika, zinema, antzerkia, kirolak, denbora pasak, komikia, sexua… Era berean, aldizkarian parte hartzeko aukera eskaintzen zaie; euren iritziak eta kezkak azaltzeko edo erreportajeak idazteko.

BIEk (Bizkaiko Ikastolen Elkarteak) gauzatzen duen aldizkari hau atal ezberdinez osatua dago. Bertan topa ditzakegu berba bi, letra dantza, gutunak, barri music, lorea, arteder, jo eta jo, sarean, denborapasak, kirolak eta beste hainbat sail. Baina joan zaitezte bertara, horixe izango baituzue ezagutzeko modurik egokiena!