Archive | kirola

Automobilismoaren zale amorratuak pozik egon daitezke, denboraldi berria hasi da eta. Aurtengoan aldaketa ugari aurkezten dira. Pilotuei dagokienez, Fernando Alonsok Renault utzi du McLaren taldera joateko; Kimi Raikkonen finlandiarrak, berriz, Mclaren alde batera utzi eta Michael Schumacherren postua ordezkatzen saiatuko da Ferrarin . Renaulten Flavio Briatorek pilotu hasiberrien alde egin du berriro, Heikki Kovalainen finlandiar gaztea taldeko gidari nagusi izendatuz.

Arautegiari dagokionez, aldaketa garrantzitsuenak honako hauek dira. Batetik, pneumatikoen hornitzaile bakarra egongo da (Bridgestone); eta bestetik, ez da motorrak garatzeko aukera izango (eraldaketa minimo batzuk besterik ez dira onartuko).

Berezitasun hauek alde batera utzita, lehenengo saria Australian ospatu zen joan den igandean, martxoak 18. Kimi Raikkonen lasterketa osoan zehar nagusi izan zen. Polea eskuratzeaz gain, bira azkarra lortu zuen eta ez zuen akatsik egin. Bitartean, Lewis Hamiltonek irteera paregabea egin zuen, bere taldekide den Alonso aurreratu eta bigarren postuari eutsi zion lasterketaren zati handi batean. Hau amaitzear zegoenean, boxetara sartu eta Alonsok aurreratu zuen, honela asturiarrak bigarren postua eskuratuz. Hamilton hirugarren postuarekin konformatu behar izan zuen, hasiberria dela kontuan hartuz, garaipen bat kontsideratu daitekeena.

Gauzak horrela, neguko entrenamenduak eta lehen froga hau ikusi ondoren, badirudi aurtengo lehiaketa ere bi talde eta bi pilotuen artekoa izango dela, Alonso ( Mclaren ) eta Raikkonenen ( Ferrari ) artekoa, hain zuzen.

Ondorengo bideoan Australiako irteera eta une zirraragarrienak ikus ditzakezue. Bertan, Hamiltonek Alonso aurreratu zuen unea eta Massak izan zuen arazoa argi agertzen dira.

Azkeneko aste hauetan zehar, prentsan berri dezente agertu zaizkigu futbola eta indarkeriari buruzkoak. Hala ere, futbolari hertsiki loturik azaldu izan zaigu betidanik gogorkeria eta gutxituz joan beharrean, handituz doa.

Denok ezagutzen ditugu ultra taldeak eta beraien jokabidea, baina ni beste indarkeria batez arituko naiz, “bigarren� mailakoa izan arren, nire ustez, aurrekoa bezain garrantzitsua dena.

Orain dela bi aste, Sevillako derbyan, honek lehenengo gola sartu ondoren, entrenatzaileari botila bat jaurtiki zitzaion. Estadioko harmailetatik erdi beterik botatako objektuak buruan jo zuen Juande Ramos (Juan de la Cruz Ramos) eta tupustean lurrera erori zen. Ondorioz, ospitalera eraman behar izan zuten eta partidua bertan behera geratu zen.

Antzeko beste gertakari bat pasa den astean eman zen, UEFAko Velentzia-Inter partiduan. Jokoaren amaieran, indarkeria nagusitu zen, baina oraingoan jokalarien artean: Navarrok, Valentziako jokalariak, aurkarietako Burdissori muturreko bat eman zion sudurra hautsiz eta aldageletaraino iritsi zen borrokaldia. Zeharo tamalgarria izan zen horrelako ikuskizuna begiztatu beharra izatea.

Dakigunez, horrelako ikuskizunak futbol maila desberdinetan ikusten dira. Kirol honek milaka pertsona mugiarazten ditu astebururo, futbolaz gozatu eta ondo pasatzeko asmotan joaten direnak, jakina. Hori dela eta, jokalariek duten tentsioa eta amorrua kontrolatzeko eskatzen dut eta, aldi berean, futbolzale amorratuenen autokontrola ere. Denon artean, horrela, indarkeriarik gabeko futbolaz gozatzeko abagunea izango dugu.