Archive | orokorra

Gero eta gehiago dira euren biziak errepidean uzten dituztenak. Horregatik, gaur, Aste Santuko oporrak amaitzera doazela jende askorentzat (guretzat, eskerrak, oraindik ez), artikulu honen bitartez gogoratu nahi dizuet autoa ez dela jostailua eta kontuz ibili behar dela; izan ere, urtero ehunka pertsona hiltzen dira errepideetan eta beste asko betiko lesionaturik geratzen dira. Azken egun hauetan komunikabideetan etengabe aipatzen ari diren kopuruak entzutea besterik ez dago!

Zenbait neurri hartu behar da kontuan autoarekin ibilbide luze bat egin baino lehen. Lehenik eta behin, autoari errebisio bat egin behar zaio zerbitzugune batean edo norberak ere egin dezake (olio kantitatea begiratu, motorreko ura, frenoetako ura… ). Beste alde batetik, gurpilen presioa eta marrazkia begiratu behar dira, beti ere, ohar guztiak kontuan hartuz eta, azkenik, ondo deskantsatu behar da, oso nekagarria baita autoa denbora luzez gidatzen egotea eta, noski, bi ordu igaro ostean, ordu erdiko atsedena egin behar da gorputzak indarrak berreskura ditzan.

Beraz, zuetako asko bueltarako prest egongo zarete. Bada, kontuz!! Abiadura zaindu! Azkarregi joatea oso arriskutsua da eta, gainera, ertzaina ere hor egongo da isunen bat jarri nahian…

Ondo izan eta buelta gozoa izan! 🙂

Duela egun batzuk munduko gizonik altuenaren berri izan nuen. Urtero egiten dira honelako sailkapenak eta aurten ez zen gutxiago izan behar. Gizon hau orain arte ezagutu den gizonik altuena da, haziera naturalez (batzuetan ez omen da berezkoa izaten).

Txinan jaio da eta bere izena Bao Xishun da. 55 urteko gizon honek ikaragarria iruditu zaidan altuera du: 2,36 metro. Medikuek ez dute ulertzen haziera izugarri hau. Bao 2005. urtean Record Guinness liburuan azaldu zen lehen aldiz, eta orain arte ez du inork gainditu bere altuera. Bere tamaina zela eta, saskibaloian jolasten hasi zen eta berak bitxikeria bezala kontatzen du tableroa ukitzen zuela eskua altxatzean.

Baina gizon honentzat bizitza ez da erraza izan. Altuegia zen Shenyang bezalako toki batean bizitzeko eta horregatik bere jaiotze herrialdera bueltatu zen, Chifeng izeneko herrira, 1973. urtean. 30 urte baino gehiago igaro dira, eta harrezkero bere altuera edozein tokitan paseatzeko ausardia izan du. Aipagarri da betidanik XinXing izeneko laguna ondoan izan duela, eta honek arazo guztietan lagun diola.

Gizon honen azkeneko albiste nabarmenena ezkondu egin dela da. Telebistan agertu zen esanez bere altuerarengatik ez zuela emakumerik aurkitzen eta, egia esan, bere kasuan ondo etorri zitzaion. 20 emakume desberdin agertu ziren gizona ikusi ondoren, baina bera batekin geratu zen. Bere izena Xia Shujian da eta berak dioenez, Bao ezagutu zuenean, ez zuen bere altueran erreparatu gizonezkoa oso atsegina iruditu baitzitzaion. Hilabete bat igaro zuen emakume honekin eta denbora gutxi horretan ezkondu egin ziren. Aipagarriena da, neska horrek 1,68 metro neurtzen duela eta, argazkian ikus dezakezuen legez, biak elkarrekin ikustean, izugarrizko aldea dagoela begi-bistakoa da.

Bizitzeko gogoa 55 urterekin iritsi omen zaio Baori; esaten denez, emakume horrek eta bere lagun onenak eragin handia izan dute horretan.

Amaitzeko, esan beharra dago, jende askok bere hazteko modu hori ez dela izan naturala esan arren, azkenaldian egin diren frogetan argi ikusi dela ez duela ezer hartu.

Sony markaren azkeneko bideojokoa maiatzaren 23an atera zen salmentara 599 euroko salneurriaz. Belaunaldi berriko bideojoko hau Nintendo Wiiarekin eta Microsofteko Xbox 360arekin lehiatzeko sortu dute; beste bi horien aurka lehia dezake beldurrik gabe eta irabazi gainera. Ez du Wiiak duen kontrola, mugimenduak atzematen dituena, baina irudiak askoz hobeak dira eta joko mota gehiago ditu.

Jarraian, Sonyren bideojokoaren alde on batzuk aipatuko dizkizuet:

• Informazio kopuru handiak kudeatzeko gai da duen prozesatze potentzia handia dela eta, horren ondorioz jokoak askoz hobeak dira.

• PSParekin konekta dezakezu askoz gehiago dibertitzeko.

• Bereizmen handiko telebista berriekin bateragarria da, irudiaren kalitatea izugarri handituz (PS3aren Blu-ray Disc erreproduzitzailearen laguntzaz)

• Datu kopuru handia gorde daiteke (argazkiak, jokoak, musika, bideoak…) bere barnean duen 60 gigako disko gogorrean.

• Jokoak imajinazio eta xehetasun handikoak dira, zerikusi handia dute Hollywoodeko produkzioekin.

• Wi-Fi konexioa du.

Playstation 3ko joko batzuen irudiak ikusi nahi badituzue, ikusi ondorengo bideoa: