Archive | 2006

Teilak

Nereak arrazoi osoa zuen, DBHOko ikasleak oso gozozaleak gara! Gauzak horrela eta aurrekoan atal honetan azaldu zen txokolatezko pastelak izugarrizko arrakasta izan zuenez, ni ere errezeta batekin natorkizue.
Teila batzuk egingo ditut oraingoan. Beraz, mantala jarri eta sukaldera!!!

OSAGAIAK:

– 250 gramo gurin
– 10 goiarakada azukre
-10 goiakarada irin
– 2 laranjen azala
– 5 arrautza zuringo

NOLA EGIN:

Teila goxo-goxoakLehendabizi, gurina azukrearekin nahastu eta laranja azala birrinduta erantsi. Nahasten zoazen bitartean, arrautza zuringoa pixkanaka-pixkanaka botatzen joan. Azkenik, irina erantsi gutxinaka. Masa bat egitera iristen zarenenan, labeko xafla batean gurina eta irina jarri. Xaflan masa guztia zabaldu eta laranja azala bota gainetik, zati txikietan moztuta. Xafla labean sartu 160 Cºra teilak eginda daudela ikusi arte.

Informazio gehiago nahi izanez gero, Karlos Argiñanoren orrian aurki dezakezue. ON EGIN!!

Comments { 0 }

Eta handik gutxira gaur

Eta handik gutxira gaurEider Rodriguez Oreretan jaio zen 1977ko maiatzaren 18an. Joseba Jaka literatur bekaren laguntzaz, bere lehen lana argitaratzeko aukera izan zuen, Eta handik gutxira gaur, 2004. urtean, izugarrizko arrakasta lortuz. Gaur egun, ETBko Sautrela literaturari buruzko saioan parte hartzen du, erredaktore lanetan. Idazleak irakurle proiektuan ere parte hartu du, Arrasateko Udal Liburutegiak euskarazko (idazle euskaldun zein itzulpen) liburuei buruzko iritzi hoberenetarikoak jasotzen dituen liburuskan. Bertan, Eiderrek ez ezik, Arantxa Iturbe, Harkaitz Cano eta beste 7 idazlek ere beraiek gustukoen dituzten hamar liburu aipatzen dituzte, honela 100 liburuko zerrenda osatuz.

Eta handik gutxira gauren hitzaurrea Joseba Sarrionaindiak idatzi zuen, benetan ohore handia Rodriguez bezalako idazle gazte batentzat. Liburua narrazio ezberdinez osaturik dagoenez, 16 denera, arina bihurtzen da, benetan, irakurtzerako orduan. Gainera, idazkera zaindu eta txukun batez idatzirik dagoenez, oso irakurterraza izango da, irakurle gazte eta hain gaztea ez denarentzat ere.

Lehen esan bezala, liburua narrazio ezberdinez osaturik dago, Susana, Gudaria eta Poeta, Anai artea eta Zu eta Ibanen izan ezik, pertsonaiak eta egoerak berdinak dira, hari berari jarraitzen diote.

Gaiak denetarikoak dira, baina oso ohikoak dira sexu harreman edo euskal politikari buruz (euskal presoak…) hitz egiteko orduan autoreak pertsonaiei ematen dien askatasuna eta naturaltasuna. Garaiak askotarikoak dira, Gerra Zibila (lehenengo narrazioan) eta XXI. mendean murgildutako istorioak esate baterako. Narrazioen kokapena guztiz ezberdina da kontatzen duen istorioaren baitan, Euskal Herria, Chiapas, Madril…

Niri gehien gustatu zaizkidan narrazioak Sofako Amodioak eta Galtzerdiak izan dira. Lehenengoan, emakume baten bizitza sentimental nahasiari buruz hitz egiten du. Monike Mikel eta Karlen artean zalantzan dabil, ez daki nor aukeratu. Baliteke hori geure bizitza eta aldamenekoan bizitzatik hain urruti ez egoteak sinesgarritasuna ematen diola istorioari eta oso gustura irakurri dut. Nor izango da gizon aukeratua?

Bigarren narrazioan, Galtzerdiak, protagonista goiz batean aurreko gaueko ezertaz oroitzen ez den gizon bat dugu. Lanera abiatzen da eta bertan bereak ez diren galtzerdi batzuk jantzita daramatzala konturatzen da:

Jantzirik dituen hauek (galtzerdiak) nerabe batenak dirudite, pailazo batenak, urdinak marra laranja eta ubelekin. Galtzerdi absurduak nola edo hala ezkutatu nahi ditu. Prakei beheraka tira die izterretatik, baina ezer ez, ez du lortu. Azkenean, bidaia zutik bukatzea deliberatu du.

Rosari, bere emaztegaiari, kontatu nahiko lioke dena, ez baita ezertaz gogoratzen, baina ez daki zergatik, nahiago du ezer ez esan. Lanean dagoela mugikorrari mezu bat iristen zaio. Zer gertatuko zitzaion gure protagonistari?

Galdera hauei erantzuna bilatu nahi izanez gero, klikatu hemen, Susa Argitaletxeak liburu osoa bere web horrian baitauka. Liburua irakurtzeko aukera izateaz gain, Sarrionandiak idatzitako hitzaurrea irakurtzeko parada ere baduzue. Bestalde, oso interesgarria iruditu zait Xabier Mendigurenek egiten duen kritika, Paperjalearen dieta blogean, bai lan honi buruzkoa baita Lander Garroren Orain galdera berriak ditut lanari buruzkoa ere.

Comments { 0 }

OIANGU BIZIRIK!

Oianguren ParkeaAzkenaldi honetan, ordiziar eta goierritarrok badugu inguruan proiektu iraultzaile bat. Proiektu iraultzaile onuragarria batzuentzat eta kaltegarria besteentzat, hain zuzen ere: Oiangu Parke naturalean egingo dena.

Ez dakizuenontzat, Oianguren Parkea Ordizian dagoen gune naturala da. Bertara askotan joan ohi gara batzuk eguna pasatzera, umeekin jolastera…baina gehienbat natur guneaz gozatzera.

Herri honetako udalak bertan hainbat aldaketa egin nahi ditu, naturarentzat kaltegarriak izango diren aldaketak, dudarik gabe. Proiektuaren ardatza bertan eraikiko diren igerilekua, golf zelaia eta paint-ballera jolasteko gunea dira. Honetaz gain, tabernaren handitzea ere aurreikusten da. Beste hitz batzuetan esanda, Oianguko zati handi bat pribatizatu egingo da.

Udalak dio honekin ez dituela gune publikoak kenduko, baina jakin badakigu hauek izugarri eskastuko direla. Gainera, pribatizatuko dituen eremuak ez dira gehienon poltsikorako lorgarriak izango.

Lehen aipatu bezala, naturari egingo dion kaltea izugarria izango da, baita izango duen inpaktu bisuala ere. Hau azaltzeko, ondorengo argazkiak ikusi besterik ez duzue. Bata orain dagoena da: tabernatik gertu dagoen gunea eta aldamenetik pasealekua. Bestea, ordea, montajetxo bat eginda azaltzen da: proiektua burututakoan, hesi hori hor egongo litzateke, eta ez argazkiko tokian bakarrik, seguruenik pribatizatuko den eremu guztietan baizik!

Oiango orain

Oiangu gero

Dena den, artikulu honetan gainetik baino ez dut azaldu proiektua; beraz, klikatu hemen, Oiangu Bizirik Plataformaren eskutik, proiektu honen nondik norakoak ezagutu nahi badituzu. Bertan planoak ere ikusgai dituzue.

Duela hilabete batzuk, Ibaik Ordiziako bazterrik ederrenak deituriko artikuluan (gure herriko beste hainbat leku zoragarriren artean) Oianguko parkea aipatu zuen.

Comments { 0 }
-->