Archive | 2006

Futbola teknologia berriekin bat eginik

Allianz-Arena egunez Datorren ekainaren 9an, 4000 milioi ikusle izango dira lau urtez behin gertatzen den futbol festa handi hau noiz hasiko zain. Eta ikuskizun harrigarri honek bere hasiera Municheko Allianz–Arena estadio eraiki berrian izango du , 2006ko Futbol Mundiala zabalduko duen partidua 66. 000 ikusleentzat tokia duen munduko puntako ingeniaritza duen eraikuntza harrigarri honetan jokatuko baita. Beraz, ez gara futbolaz bakarrik ari, punta-puntako teknologiaz hornituta dagoen kirol eraikuntza handienaz baizik.

Allianz- Arena estadioa eraikitzea ez da ahuntzaren gauerdiko eztula izan. 340 milioiko kostua izan du. Bere gain du argitzapenik aurreratuena non jokatzen duen Municheko taldearen arabera aldatzen den. Bayern de Munich bada protagonista, kanpoaldea eta eserlekuak gorritu egingo dira. TSV 1860 taldea bada, aldiz, urdina bihurtuko zaigu.
Alemaniar selekzioa bada, ordea, txuria izango da kolore nagusiena. Bestalde, lehena izango da alemaniar estatuan hiru altueratako eserlekuak dituena. 66. 000 eserleku hauek guztiak daude estalita eta, zauden lekuan zaudela, partidua ederki ikusteko aukera dago, eserlekuak zelairi ondo begira jarrita baitaude. Gainera, 4 752 kiloko bi pantaila erraldoi daude 16:9 formatukoak zelaiaren alde banatan, ikusleek jokaldirik onenak kalitaterik onenarekin ikus ditzaten.

Allianz -Arena gauezHala ere, ez da beharrezkoa barnera sartzea lan honen izugarriaz jabetzeko. Batzuen ustez, ovni baten itxurakoa da, eta bere presentziaz ohitu diren hiritarrek harro Schlauchboot edo gurpil flotagarria dela aipatzen dute. Itxura hau, estadioa estaltzen duten fluor erretxinez eraikitako 2 874 kuxinei zor zaie. Hauek, gainera, elurra eta euria lurrintzeko gai dira eta baita izpi ultramoreak pasatzen uzteko ere, horrela belarraren hazkundea erraztuz. Honez gain, lurrazpia berogailu batez hornituta dago 30 eta 35 gradu arteko tenperatura mantentzeko gai dena.

Bukatzeko, aipatu, paradisu honetan badagoela futbolak bezainbeste diru ekoizten duenik. Merchandising zatiaz ari gara. Estadioaren alderdi guztietan aurki daitezke dendak, jatetxeak, kafetegiak, kioskoak eta baita haurtzaindegiak ere. Zorionez, elbarriek ez dute arazorik izango, sarrera zabalak eta edonon arrapalak baitituzte. Hau guztia gutxi balitz, proiektu honek izugarrizko itxuraldaketa ekarri dio kokatuta dagoen auzoari. Metro geltoki bat eraiki da eta errepide berrien eraikuntzak izugarri erraztuko du zaleen etorrera. Horretarako, estadioak barnean 1200 autoentzako aparkalekua izateaz gain, ondoan Europan inoiz eraiki den aparkalekurik handiena izango du, 9000 auto eta 350 autobusentzako lekuarekin.

Beraz, Municheko biztanleek argi daukate: ez zaie axola Berlin eta Hamburgo handiagoak izatea, edo Francfurt finantzen erdigune izatea. Futbolaren erdigune Munich bilakatuko baita inongo dudarik gabe. Baina horretarako ekainera arte itxaron behar!

Comments { 0 }

Ill Niño taldearen kontzertua Bergaran

Rockzone musika aldizkariaren lehenengo urtemuga izan dela eta, talde gutxi batzuen kontzertuak antolatu dira. Horietako talde bat Ill Niño da, eta Espainian eskainiko dituzten hiru kontzertuen artean, datorren otsailaren 11n Bergaran emango dutena dago.

illnino

Nu Metalaren generazio berriaren barruan kokatzen da Ill Niño taldearen musika, baina beraien energiaz beteriko metala, Latinoamerikako perkusioekin eta gitarra espainiarrarekin nahastea dute bereizgarri nagusi. Beste berezitasun bat letren hizkuntzari dagokiona litzateke, ingelesa eta gaztelania nahasten baitituzte.

Talde gaztea izan arren, ikaragarrizko erreakzioa sortu zuten metal musikaren jarraitzaileon artean beraien lehenengo diskoko “God save us� singlearekin. Ondoren, Kittie, Soulfly eta Snapcase bezalako taldeekin kontzertuak eskaini izatea eta New Jerseyko jaialdi bateko kartelaren buru izateak sekulako bultzada eman zien.

Orain 2005. urtean kaleratutako One Nation Underground hirugarren diskoa eskuartean dutela, hau aurkeztera etorriko dira Jam aretora. Ez da Bergarara etortzen diren lehenengo aldia, aurreko diskoren bat aurkeztera ere etorri izan baitira; beraz, argi dago areto euskalduna gogoko dutela eta harrera ona izan dutela hemen, nahiz eta Euskal Herrian musika mota honen jarraitzaile ugari ez garen.

Taldearen disko berri honetan 13 abesti aurki daitezke eta Ill Niñoren abeslaria den Christian Machadok dioenez:

(itzulia)

Gure ustez, orain arte egin dugun diskorik hoberena da, eta hau da jendeak pentsatzea nahi duguna. Gure kultura eta musikari buruzko elementu asko sartu ditugu, horregatik du hainbeste erritmo eta aurreko diskoak baina askoz biziagoa da. Nik dudan estudio batean grabatu genuen, beraz, erraza izan zen lan egitea beharrezkoa zen denbora guztia izan genuelako. Horrela erlaxatuago ibili ginen eta hori diskoan nabari da

One Nation Underground

Kritikoak, dirudienez, nahiko ados daude hitz hauekin, baina taldearen jarraitzaileak zaretenok oraindik entzun ez eta egia den edo ez frogatu nahi baduzue, klikatu hemen bi abesti berri entzuteko.

Honekin guztiarekin soilik geratzen zait aipatzea larunbatean ez direla bakarrik egongo. Ill Niñok bi talde gonbidatu izango ditu: NdNo eta Infinner.

Beraz, metalaren jarraitzaileok ikaragarrizko kontzertu on batera joan eta ahotsik gabe gelditzeko aukera paregabea izango dugu 🙂

Comments { 0 }

Nik ere aurpegi bat dut!

Isabelle Dinoire prentsaurrekoan 2005eko azaroaren 27an munduko lehenengo aurpegi transplantea egin zioten 38 urteko Isabelle Dinoire emakume frantsesari. Honek, arazo pertsonal batzuen ondorioz, pilula batzuk hartzen zituen, eta, dirudienez, bere gorputzak ez zituen behar bezala asimilatu eta konortea galdu eta lurrera erori zen. Orduan, bere txakurrak esnatzeko asmoz bortizki eraso zion eta Isabellek, esnatzean, aurpegia txikituta zuen.

Orduan, erietxera eraman zuten. Eta lehen aipatutako egunean, bere familiak aurpegi transplantea egiteko baimena eman zuen, honela, txakurrak suntsitutako kokotsa, ezpainak eta sudurra konpontzeko nahiaz. Ondoren, beste emakume baten azala, larruazaleko gantza, giharrak eta odol hodiak ipini zizkioten aurpegia berregiteko.

Aditu batzuek transplantearen aurka azaltzen ziren, honek arazo psikologiko handiak ekarriko zituelakoan. Baina, azkenean, Isabellen familiak transplantea egiteko baimena eman zuen.

Hau dena egin ondoren, 2006ko otsailaren 6an prentsaren aurrean azaldu zen Isabelle Dinoire. Pozik agertzen zen nahiz eta oraindik erreabilitazio lanak egin beharko dituen aurpegi berria ondo egokitzeko. Berak, beste edonoren antzera, aurpegi bat duela adierazi du eta ebakuntza dela eta, gutxienez, jendearen begiradei aurre egin diezaiekeela. Honekin batera, esan beharra dago bi alabaren ama dela, eta horregatik oso pozik azaldu da, orain beraiekin egoteko aukera izango duelako.

Hau dena esan ondoren, adituek zuten beldurra ezerezean geratu dela garbi dago eta lehenengo ebakuntzaren esperientziaren ondoren, ondorio psikologikoak bideragarriak direla azaldu zuen Isabelle Dinoireri ebakuntza burutu zion medikuetako batek, Bernard Devauchelle delakoak, hain zuzen.

Honela, esan beharra dago transplante honen jarraipena eraman duen Jean-Michel Dubernard sendagileak beste bost transplante egiteko baimena eskatu diola Frantziako Osasun Ministerioari.

Gai honi buruz gehiago jakiteko:

Berria: Beste edonork bezala nik ere aurpegi bat dut orain.
Diario Vasco: La epifanía de Isabelle

Comments { 0 }
-->