Archive | orokorra

Estatu Batuetan eztabaida berriro ere pizturik dago. Oraingo honetan heriotza- zigorraren inguruan sortu da izugarrizko iskanbila. Izan ere, orain dela hamaika urte saltoki bateko langile bat hil zuen gizona exekutatu baitzuten duela egun batzuk. Horrela, Shawn Paul Humphries hilarazia izan den 1001. presoa bihurtu zen, lurraldean 1976.ean heriotza-zigorra berrezarri zenetik. Hala ere, 1000. heriotza ordu batzuk lehenago gertatu zen, Kenneth Lee Boyd presoak emaztea eta aitaginarreba hiltzeagatik zigor latza jaso zuenean.

Boydek orain dela hamazazpi urte hil zituen bere emaztea eta honen aita seme-alaben aurrean. Errudun zela ziur zegoen arren, horrelako hilketa Vietnamgo gerran bizi izan zituen esperientziei, alkoholarekiko dependentziari eta adimen urriari egotzi zion defentsak. Hala ere, gizonak bere nahigabea agertu zuen justiziak zigortutako 1000. presoa izateagatik eta heriotza- zigorra mendeku bat besterik ez dela azpimarratu zuen.

Thomas Maherek, Boyden abokatuak, adierazi zuenez:

Heriotza honek ez du lortuko mundu seguruagoa edo hobea.

Honek hamaika zauri ireki ditu eta Amnistia Internacional eta antzeko erakundeak hainbat ekitaldi martxan jartzen ari dira. Hauen aburuz:

Gero eta estatubatuar gehiago dago bidegabekeria honen aurka eta hori erabat nabarmendu da espetxeen kanpoaldean bildu den jende kopuruarekin.

Baina, dirudienez, George W. Bush ez da iritzi berekoa eta heriotza- zigorraren aldeko agertu da berriro ere, argudio triste batekin oraingo honetan. Azken neurri bezala, kaleak seguruagoak izatea ziurtatzen omen du. Gogorarazi, Texasko gobernadore izan zen sei urteetan 152 heriotza- zigor onartu zituela Bushek.

Gaur egun, Estatu Batuetako espetxeetan 3400 preso daude heriotzaren zerrenda honetan. Horietako bat Pablo Ibar dugu, Urtain eukal boxealariaren iloba dena eta, 1994. urtean, bi modelo eta klub pribatu bateko jabea hiltzeagatik epaitua izan zena.

Beraz, garbi gelditzen da Estatu Batuak hainbat arlotan punta-puntako lurraldea den arren, beste batzuetan asko dutela hobetzeko eta aldatzeko. Eta zeregin horretan, giza eskubideak errespetatuz has daitezke, adibidez. Ez al zaizue iruditzen?

Gehiago jakin nahi izanez gero, klikatu hemen.

Durangoko Euskal Liburu eta Disko azokak eta Gerediaga Elkarteak, azokaren antolatzaileak, 40 urte betetzen dituzte aurten.

40. edizio hau abenduaren 7tik 11ra ospatuko da Landakoko eraikinean. Aurten 309 stand muntatuko dira: 163 argitaletxe, beste hainbat diskografika, elkarte eta administrazio, denak euskal kulturarekin erlazionatuta. Urte honetan 361 liburu, 34 disko, 43 dvd eta 49 aldizkari ikusteko aukera izango dugu.

Edizio honetarako hautatutako gaia zentsura izango da. Jon Irazabalek, erakusketaren zuzendariak, aitortu zuenez:

Zentsura, zoritxarrez, gaur egungo gai bat da, nahiz eta orain dela 40 urte bezala eman ez, Euskal Liburu eta Disko azoka lehenengoz egin zenean.

Gerediaga Elkarteak eskaintzen duen saria, Argizaiola, aurten Gotzon Garateri emango zaio euskararen alde egiten duen lanarengatik, adierazi zuen Nerea Mujikak, Gerediga Elkarteko zuzendariak. Saria abenduaren 8an emango zaio San Agustinen.

Aurtengo iragarkia, zirkoko uitu batekin, Txelu Angoitia argazkilariak egin du (argazkian ikus dezakezuena da). Jon Irazabalek esan zuen lehengoz Euskal Liburu eta Disko azokari buruzko aldizkari bat aterako zela. Agerkari honek Gerediaga Elkartea eta azokari buruzko historia bilduko ditu, bertan protagonistekin egindako elkarrizketak azalduz.

Azokarekin batera, Plateruena Kafean hainbat talde euskadun aurkeztuko dute:

Abenduak 7 (asteazkena): Berri Txarrak eta Lor
Abenduak 8 (osteguna): Kuraia eta Sorkun
Abenduak 9 (ostirala): Mikel Urdangarin
Abenduak 10 (larunbata): Lauaxetari omenaldia
Abenduak 11 (igandea): Korrontzi

Azokari buruzko informazio gehiago nahi baduzue, sartu azokaren web orrian, durangokoazoka.com.

Ez galdu aukera paregabe hau euskal literatura eta musikari buruz gehiago jakiteko eta gozatzeko!!!.

Gizonezkoaren jazarpen edo indarkeriagatik etxetik alde egin behar izaten duten emakumeek ez dute berehalakoan nora jo. Babes judiziala lortu dutenentzat gero eta zerbitzu gehiago dagoen arren, larrialdi egoerei erantzuteko hiri etxebizitzak besterik ez daude Euskal Autonomia Erkidegoan. Hori salatu du Esteban Beltran Amnesty International erakundeko Espainiako idazkariak.

Ez da hori Beltranek azaldu duen kezka bakarra. Izan ere, gogor kritikatu baitu Bizkaian dauden epaileen jarrera, gainerako herrialdeetan ez bezala, atzera bota dituztelako babes eske joan zaizkien emakume askoren eskakizunak. Oso larria da epaileon jarrera, babesik gabe utzi baitute gizonaren kontra salaketa ipintzera ausartu ziren bi emakumeetatik bat. Onartezina da hori!

Beltranek jakinarazi duenez, uztailaren 31z geroztik, ez dabil larrialdi egoeretarako gau eta egun erabilgarri zegoen 900 lineako telefonoa. Gasteizen baino ez dago une honetan halako telefonoa, bertako Udalak kudeatuta. Argi utzi nahi izan du, gainera, emakumeen kontrako indarkeria giza eskubideen urraketa dela, baldin eta estatuek ez badiete emakumeen salaketei egokiro erantzuten.

AIko idazkaria Bilbon izan da bertako Udalarekin batera bultzatu duen kanpainaren berri ematen. Hilaren 25ean emakumeenganako indarkeriaren kontrako eguna zela eta, Carmen Garcia (Emakume Saileko zinegotziak) arazoak Bilbon duen eraginari buruzko datuak eman ditu. Joan zen urteko urriaz geroztik, 401 emakumek jo dute Udaleko arduradunengana laguntza eske. Bilbon zazpi harrera-etxe daude une honetan, etxetik alde egin behar izan duten emakumeak hartzeko. Udaz geroztik, gainera, horietako bat larrialdi kasuetarako gorde dute. Azken urte honetan Udalak 22 emakume eta haien 28 ume babestu ditu etxeotan.

Garciak jakinarazi du bestalde, Udalak GPS sistemadun telefonoak banatu dituela hirian mehatxupean bizi diren emakumeen artean. Larrialdi egoera batean, emakumeari berehalako sorospena eta laguntza emateko aukera eskaintzen dio gailuak. Segurtasunaz gainera, telefonoek laguntza psikologikoa edo gizarte zerbitzuetan sorospena lortzeko balio dute, gau eta egun harrera zentro batekin harremanetan jartzeko aukera ematen baitie. Emakumeen aurkako indarkeriarekin amaitzeko Adierazpen Instituzionala irakurtzeko, klikatu hemen.